مشكلتي إني بحب شخص، وإحنا بقالنا ٩ سنين نعرف بعض. أنا عرفته من وأنا صغيرة جدًا، وبعد فترة حبينا بعض. لكن بسبب مشاكل كتير بينا، وبعد سنة سبنا بعض. ومكنش سهل عليا أبدًا إني أنساه، بس اتعايشت وعدّت خمس سنين. ويشاء القدر إننا نتكلم تاني، ورجعنا لبعض. كنا كبرنا خلاص، وكنا قربنا نتخطب. بس ظروفه المادية مكنتش أحسن حاجة، وكان متغرب عشان يعرف يكون نفسه. عدّى عليّه ضغط نفسي كبير، وكنت دايمًا معاه وجنبه، لكن هو كان بيضغط عليا جدًا في كل حاجة، وكان متحكم بشكل كبير. وفجأة، لحد النهاردة أنا مش عارفة سبنا بعض إزاي. بقالنا ٨ شهور مش بنتكلم. حاولت أكلمه كتير، وهو مفيش أي رد. ومش عارفة ليه، مع إني متأكدة إنه بيحبني، والله متأكدة. وعرفت إن الحاله اتحسن في شغله، وبقى مرتاح شوية، بس محاولش يكلمني. مع إني بعِت له كتير جدًا، وقلت له كل اللي جوايا. أنا حاسة إني خايفة. خايفة أكمل حياتي مع حد غيره. كان نفسي نكمل. قولت، أكيد اللي خلانا نتجمع بعد كل السنين دي، مش هيخلينا نسيب بعض بسهولة. أنا عارفة إني مكنتش مرتاحة في العلاقة، بس بجد كنت نفسي أكمل حياتي معاه. فكّرت إنك تعرفي حد من وإنت صغيرة، وتعيش معاه كل حاجة، وكان بيحبك وبيخاف عليك… صعب تتكرر. أنا عارفة إن أكيد ده نصيب، بس بييجي عليّا وقت بيوحشني، وببقى عايزة أكلمه. وساعات فعلًا بكلمه، وبرضو مش بيرد.

4

10