بقالي فترة معنديش صحاب، الحقيقة من وأنا طفلة كنت طول عمري بعاني في موضوع الصحاب دا بس جت فترة عملت فيها شوية صحاب وحسيت ان خلاص الموضوع عدى بعدين رجعت تاني لنقطة الصفر. حاليًا مليش حد في الدنيا غير صاحبة واحدة ومش بنتكلم غير كل فين وفين ومش بنشوف بعض حتى. بقالي ٤ سنين في الجامعة ومعرفتش اعمل صاحبة واحد، يمكن في أول سنة كنت قافلة الباب شوية عشان نفسيًا مكنتش تمام بس بعد كدا لقيت الفرصة ضاعت ولحد دلوقتي مش عارفة الاقي شخص واحد اتكلم معاه. فيه شوية ناس عارفاهم بس معرفتي بيهم مقتصرة على الكلية والمواد بس، حتى لما بنروح نفطر مع بعض الموضوع بيبقى غريب ومش راكب كأننا مش عارفين ازاي نتعامل مع بعض و غير كدا بحس ان أنا مش جذابة اوي كصديقة بالنسبة ليهم. أنا معرفش بصراحة أنا عايزة ايه من اللي أنا بكتبه دا نصيحة ولا مجرد فضفضة بس الموضوع شاغل دماغي وبفكر فيه كتير اوي بالرغم من إني بحاول ابقى تمام لوحدي واتقبل دا، وفي العادي انا اصلا مش شخص اجتماعي اوي وبحب ابقى لوحدي كتير بس حاسة ان الموضوع ضرب مني وبقيت لوحدي على طول ومعرفش ازاي اغير دا. ساعات بحس انا مش عارفة انا عايزه ايه اصلاً، يعني اوقات ابقى مع ناس واحس اني عايزة ابقى لوحدي واوقات ببقى لوحدي وبحس اني عايزه ابقى مع ناس وصحاب بس مفيش. كلامي متلغبط جدًا بس الفكرة كلها اني تايهه وحاسه اني عايزه الاقي نفسي واعرف ازاي اتعامل مع الناس بجد.

3

15