ماما وبابا منفصلين من زمان، وعايشه مع ماما وعلاقتي ب بابا مش احسن حاجه معرفش اصلا يعني ايه اب يبقى في حياتي، المهم انا عرفت من كذا سنه ان ماما بتعرف راجل وبتكلمه وبتقابله، وماما محجبه والمفروض انها متدينه وبتحفظ قرآن وبتقولنا انا واختي دايما نصلي ولو شافت شعره باينه من الطرحه بتقعد تزعق وتقولنا مش هتنزلوا كدا، وفي نفس الوقت انا مره دخلت عليها الاوضه عادي لقيتها فاتحه فيديو كول مع الراجل ده وهي بشعرها وبلبس البيت مكشوف، عملت نفسي عبيطه ومش واخده بالي وخرجت وانا ساكته. ومن حوالي اسبوع قالتلنا انا خارجه مع صحابي بكره من بدري ف مش هعرف اعمل اكل ابقوا اعملوا انتوا، واليوم ده هي نزلت من 9 ونص ورجعت 11 بالليل ، وانا عارفاها هي صعب اوي تخرج مع صحابها كل المده دي اولا هي بتشوفهم كل يوم في الشغل ف مش هيقعدوا كل ده مع بعض ، ثانيا انا سألتها انتوا هتعملوا ايه مع بعض قالتلنا هنقعد في كافيه، وبس مقالتش اكتر من كدا (يعني اكتر من 13 ساعه قاعدين في كافيه!) وقتها قالتلي لا ما احنا هنروح الشغل الصبح يعني مش طول اليوم هنبقى خارجين، المهم ان بعدها ب كذا يوم فتحت تليفونها لأن انا مكنتش مرتاحه نهائي ( وانا فعلا غلطانه ) المهم لقيت كلامهم مع بعض وده عادي انا كدا كدا عارفه لكن لقيتها بقى باعتاله الصور الي اتصوروها، وشوفتها متصوره وهي راكبه القطر وكانت متاخده الساعه 10 تقريبا ( هو عايش في القاهره) ف احساسي كان صح وكانت خارجه معاه مش مع صحابها وهي الي راحتله القاهره ، ومراحتش الشغل ولا حاجه. طب هي ست متدينه وبتقولنا اعملوا كذا وكذا وفي نفس الوقت بتخرج مع راجل وبتبعتله صور من غير حجاب وفي الصور مقربين اوي من بعض، وفي مره بتسألنا لو سافرت يومين تلاته مع صحابي محافظه تانيه ك خروجه، هتعرفوا تتعاملوا ولا هوحشكوا؟ وانا عارفه ان ده مش مجرد سؤال او هزار وانها بردو متقصدش صحابها ، طب هي لو عملت كدا فعلا وبتفكر تعمل كدا، هتسافر معاه يومين تلاته هيباتوا مع بعض؟؟ مفيش بينهم اي علاقه رسميه اصلا ولا خطوبه حتى. المشكله انها فاكرانا عبط ومش عارفين حاجه لكن انا عارفه كل حاجه، وبعرف لما بيتخانقوا وبعرف لما بيتصالحوا وبيبقوا سمنه على عسل، لأن بردو هي لما بتتخانق معاه بتطلع كل ده فينا ، ولما بيتصالحوا بتبقى رايقه وبتعديلنا كل حاجه، انا فاهمه كل حاجه لكن بسكت، وهي عارفه اني مش غبيه لكن بتتجاهل ده، هي مش حاسه بيا ولا عارفه ايه الي بيدور في دماغي وبفكر في ايه،فاكراني معنديش مشاعر ، علطول بتقولي انتي بارده ومبتحسيش، بس لأن ده الي انا بظهره ليها. وانا بتفرج على صورهم في دمعتين نزلوا مني ، انا معرفش ليه فعلا، لكن ده الي حصل

3

10