هي مش مشكلة علي قد ما اني بفضفض، اتعرفت علي بنت في شهر ٩ اللي فات عن طريق صديقة مقربة ليا ، وقتها كنت عرفت عن حياتها أن والدها متوفي بقاله سنتين و دخل البيت عندهم محدود جدا ، و اعمامها بقالهم سنتين بيحاولوا ياخدوا بيتها علي اسم الورث لأنها بنت وحيدة ووالدتها في المستشفي بسبب عدم اهتمامها بصحتها. المهم، اتعرفت علي البنت دي و لقيتها طيبة جدا ، حبيت فكرة اني اقف جنبها و احتويها ، انا في حياتي ناجح جدا الحمد لله و محبوب من ناس كتير ، أول الفترة عرفت أن شغلها كان ستريم علي Twitch، حاولت اعرض عليها مساعدة اني اجبلها جهاز جديد تشتغل عليه، وقتها كان كل تفكيري اني اقف جنبها و احسسها أن الدنيا لسة بخير . رفضت برغم اني عارف ان ممكن اي حد تاني يوافق لو في ضيقة زيها و مصدر دخلها كله جاي من شغل الاستريم دة، بتحكي فيه حواديت ظريفة :) المهم مع الوقت فضلت اقف جنبها ، في مزاكرتها ، في شغفها ، و في حياتها عامة ، و مع الوقت لقيت نفسي بحبها جدا، اتعودت خلاص وقتها عليها في يومي اللي كان ممل ، بقينا بنبعت لبعض كل يوم قهوة و مخبوزات و نشوف أفلام سوا بليل و نشجع بعض و نعيط سوا حتي. عدي فترة و كان فترة عصيبة عليها و عليا ، للأسف من اللي حولينا بالاخص ، صحابي بتوع زمان اذوني ، و هي اتأذت من قرايبها ، مع الوقت حسيت أن في حاجة غلط، انا وقتها كنت الحمد لله مش حارمها من اي حاجة، واقف جنبها خطوة بخطوة ، و حرفيا مسلم نفسي. لقيتها بتقوللي اني لو هسافر برة بحكم شغلي و كدا ، يبقي مش هنعرف نكمل سوا ، قلتلها خلاص اكنسل شغلي بتاع برة عادي ، و فعلا عملت كدا، و بعدها طلبت مني اني اتقدملها ، المهم انا بكل بساطة وافقت بدون تفكير حتي ، اخيرا هتكون من نصيبي ؟ لقيتها في الاخر بتقوللي مامتها مش موافقة لغاية ما هي تخلص دراسة ، قلت عادي مفيش مشكلة. و اذ فجأة مع الوقت ، لقيت البنت معاملتها معايا اختلفت تماما ، لسة بقف جمبها و كل حاجة ، حتي في آخر لحظة كنت دفعت فلوس كتير علي كل حاجة علشان اساعدها ، و مش هقول أنها استعملتني بتاتا لأنه كله كان اجتهاد شخصي مني من بعيد لبعيد من غير ما هي تعرف . بس لقيتها بتقوللي أنها استخارت ربنا و مش حاسة براحة من ناحيتي و عايزة تبعد... كنت فاكرها بتهزر في الاول لأني حرفيا معملتش اي حاجة وحشة ليها نهائي ، بالعكس أنا حاولت اعوض عليها حنان الاب و الاخ قبل ما اكون حد بيحبها.. و في اخر ٣ شهور حاولت افهم ايه اللي حصل و ملقتش اجابات...بكل بساطة باعتني علشان استخارت ربنا و حست بعدم راحة؟.. هو الكلام دة بجد ؟ في ناس ممكن تعمل كدا في حد كل اللي كان بيعمله انه يقف جمبك و يشجعك و يسندك في كل مشكلة ؟.. اخر جملة قالتهالي انا مش مستوعبها لغاية دلوقتي . "انت نعمة انا مستاهلهاش و مقدرش علي مسؤوليتها ، انا اتعودت علي شوشرة الحياة و متقبلة النهاية لأني عارفاها ، لكن مش عايزة اضغط نفسي و خايفة اظلمك في اني محبكش بنفس الكمية اللي بتحبني بيها ..." حاولت بكل الطرق الاقي اجابات ، بس كله كان مسدود. انا مش مستوعب لحد دلوقتي كم الطاقة اللي حطيتها علشان أخلي حد كان عايش كاره لحياته يبقي فرحان شوية ، و في الاخر رجعت لنقطة الصفر. حاليا انا كل اللي بعمله بصلي و بروح الچيم و بخرج خروجات كتير علشان اشغل بالي..بس شغلي انا موقفه من شهر ٥ من ساعة ما الموضوع حصل..الحمد لله اني كنت مستريح في حياتي ماديا و بعرف اتصرف و ارجع زي الاول بس و الله الموضوع صعب لما يكون الواحد منطفي. انا مختصر اللي حصل لأن الموضوع اكبر بكتير من كدا...و التضحيات و الألم اللي انا وقتها كنت حاسس بيه مكنش يتوصف. انا المشكلة كان نفسي تديني سبب مقنع علشان ابعد عنها من غير ما انجرح و احس اني قصرت مثلا فيها أو حاجة، لكن موضوع أن حد في يوم و ليلة يقرر يختفي تماما عن حياتك و يعملك بلوك في كل حتة من غير سبب...اي حد يعمل كدا الصراحة شخص غير ناضج بتاتا... بالرغم اني شاكك أنها عندها مرض نفسي ، بس اللي هقوله أن قلوب الناس مش لعبة يا بشر :") ربنا يصبرني و يرزقني الخير و ارجع زي الاول انشاء الله .. يتعافي المرء بأخيه، و الحمد لله .

2

2