كان ليا واحدة صاحبتي، صحاب 6 سنين احنا دلوقتي يعتبر ف تانية جامعة، السنة اللي فاتت انا وهي كنا بنشتغل ف مكان سوا بابايا يبقى المدير بتاعه، حصل كدة مرة عجز ف الفلوس بطريقة غير طبيعية وكتير وكانت كل الادلة متوجهة لصاحبتي دي، اهلي منعوني اكلمها واقطع معاها واخد كل حاجة تخصني عندها وانا الموضوع كان تاعب نفسيتي، مش هاين عليا عشرتنا دي كلها ولا مصدقة انها ممكن تعمل حاجة زي دي، واكتر حاجة واجعة قلبي اني معرفتش اقولها سبب او أواجه، طلبت من ماما اني اواجها واقولها انا بتغير معاها ليه، حقها عليا تدافع عن نفسها حتى لو غلطانة، حتى لو مش هنرجع زي الاول،محدش ف الدنيا يستاهل يتساب لدماغه خصوصا انها كان شخص مهم ف حياتي، ماما رفضت دة وقالتلي العتاب دة لشخص مش واخد باله من تصرفاته، بس دي سرقة وهي اكيد عارفة بتعمل ايه، معاملتي اتغيرت معاها ومبقتش بكلمها وهي لاحظت دة لحد ما جت فمرة بعتتلي مسدج عتاب كبيرة كدة وبعدها عملت بلوكات من كل حتة، كان ع عيني اشوفها كدة او يوصل بينا الحال لكدة بس انا اهلي كانوا متحكمين فيا اوي خصوصا ان علاقتي بماما دايما متوترة ودايما مختلفين وهي عمرها ما حبت صاحبتي دي بالذات دونا عن باقي صحابي، عدت سنة تقريبا ع بعدنا عن بعض ولما كنا نتقابل ف مكان عام كنا بنتعامل زي الغرب وانا مكنتش كويسة طول الفترة دي وفارق معايا غيابها، لحد من حوالي شهر شوفتها ف الشارع، هي ساكنة جنبي اصلا بصراحة حزنت اوي اللي بينا مش قليل وهي واحشاني وعايزة اكلمها، كلمت صديقة ليا تانيه قولتلها ع احساسي دة قالتلي كلميها اطمني عليها، قولتلها طيب كدة بابا مش هيبقى هان عليا؟ قالتلي انتي هتتكلمي معاها تسلمي عليها مش هترجعوا زي الاول يعني ،كلمتها واتعاتبنا كتير معرفتهاش برضو سبب بعدي، قولتلها ماما عازت دة وهي عارفة ان ماما شديدة معايا شوية ومن زمان بتحاول تبعدني عنها، الهم اتكلمنا كام يوم عادي وحكينا حاجات كتيرة، من جوايا حاسة ان البعد دة عمل فجوة بينا ومش عارفة من جوايا شعور اني عايزة ابقى معاها وفنفس الوقت خايفة منها وانها ممكن تكون فعلا مش كويسة وعملت حاجة زي كدة، صارحتها قولتلها حسانا زي ما احنا ولا البعد عمل بينا فجوة؟ قالتلي الصراحة كل م الاقينا بنتكلم بفضل متنحة شوية ف الشات مش مصدقة ان دي صاحبتي اللي قعدنا كل دة سوا عدى سنة من عمرنا منعرفش حاجة عن بعض وساعات كانت تحسني غريبة لحد ماتاخد بالها انه لا دي كانت أقرب صحابي، كان احساسنا متفق ف اننا الحاجز دة ممن يتشال لما نتقابل ونقعد ونتكلم، بالفعل بعد ما اتكلمنا ب حوالي اسبوعين اتقابلنا إمبارح وقعدنا وقضينا اليوم سوا وكنا مبسوطين ومحستش ان في مدة بُعد حصلت بينا اصلا واننا زي ما احنا سوا، بس إحساسي اني كدة أنانية وبابا هان عليا ورجعت اكلمها من ورا اهلي، وانا الفترة دي اهلي باعديني عن كل صحابي حرفيا وهي الوحيدة اللي رجعت كلمتها وبنتكلم دلوقت، مش عارفة اعمل ايه، وأهلي استحالة يوافقوا اننا نرجع حتى لو جربت اصارحهم ولو عرفوا اننا اتكلمنا دة ممكن يعمل مشاكل وموبايلي ينسحب وحاجات كتيرة، خصوصا اني دايما ف خناق مع ماما لاني اكبر اخواتي وهي محملة علىا كتير اوي ودايما بحسني لوحدي وانها بعيدة عني عمرنا ما كنا قريبين، كتير عدى من عمري كنت بحتاج ماما ف حاجات كتيرة لازم تبقى حاضرة فيها معايا بس مكنتش بلقاها مع انها موجودة وعايشين سوا وأهلي مش منفصلين بس كانت تهتم ب اخواتي الأصغر اكتر مني وانا كنت معاها ف تربية اخواتي الأصغر مني وحقيقي رغم اني سني صغير انا شايلة مسؤولية كل حاجة ف البيت من نضافة لاكل لكل مايخص بابا يحتاجه ومواعيد شغله ومواعيد دروس اخواتي والمدرسة بتاعتهم والتمارين بتاعتهم ف النادي ولو حد فيهم تعب انا اللي باخد بالي منهم لحد ما يبقوا كويسين، بس احيانا الأخ الأكبر هو كمان بيحتاج اخ أكبر منه

4

0