Ice Cream_70019 🇪🇬
منذ أسبوعين
.
شعور فخور
رحلة بنت صغيرة نحو القوة بابا وماما اطلقوا وكل واحد فيهم راح لحياته الجديدة أنا كان عندي أخ وأخت… وأختي كانت صغيرة جدًا، لدرجة إنها لسه ما راحتش الحضانة من يومها وأنا بقيت أم وأخت… وأحيانًا زوجة كمان. كنت أنا اللي أصحي أختي الصبح، أعمل لها اللانش بوكس، أنزلها الحضانة، وأرجع أطبخ، وأروّق، وأغسل، وأكنس. ومع بابا… كنت بعمل له كل حاجة أكوي له لبسه، أرتب هدومه، أظبط طلباته، وأتأكد إن الأكل جاهز قبل ما يرجع من الشغل. كنت لسه في أولى إعدادي… سن المفروض أكون فيه بتعلّم، بتدلع، وباخد من الدنيا أكتر ما بديها لكن أنا كنت بدّي كل حاجة، وباخد الصبر من ربنا. كنت محتاجة حب واحتواء، لكن ما لقيتش… فادّيت أنا الحب ده لإخواتي. التجربة دي كانت قاسية، الأيام فيها كانت تقيلة، لكنها صنعت مني إنسانة جديدة. علمتني إزاي أكون صامدة، حتى لو جوايا مكسورة. كبرت وأنا بعرف أعمل كل حاجة، وأطبخ أكل يخلي كل اللي حواليَّ يقولوا: "يا بخت عيالك وجوزك… هتطبخيلهم كل يوم." تعلمت إزاي أتصرف في مصاريف البيت، وأدبر الموجود مهما كان قليل. حتى بعد ما ماما وبابا رجعوا لبعض… أحيانًا بابا بيعتمد عليا أنا في مصاريف البيت، ويديني أنا الفلوس، عشان عارف إني بعرف أظبط كل حاجة وأحسبها صح. لسه بيحبوا أكلي، ولسه أختي الصغيرة بتعمل فرح في البيت لو عرفت إني أنا اللي هطبخ. يمكن لو ما كنتش مريت بالرحلة دي، ما كنتش هطلع بالقوة والشطارة دي الحمد لله… على الابتلاءات اللي بتكشف جوانا أجمل الحاجات ❤️🩹
7
11
.png)
