عارف إن الكلام ده ممكن يثير الجدل، ومش كل الناس هتفهمه أو تتفق معاه، لكن ده رأيي الشخصي، وأنا مقتنع بيه. كل واحد ليه تجربته وظروفه، وده مجرد تأمل شخصي في الحياة والعلاقات من وجهة نظري. --- انا عندي 23، ولما بشوف الدنيا حواليا بحس إن الجانب الإنساني والعاطفي بيتقلص مع مرور الوقت وسط دوامات الحياة وسرعتها الكبيرة. التعامل بين الناس بقى "هات وخد"، على حساب الأحاسيس الحقيقية والرغبات اللي جوه كل واحد. ولما بشوف الموضوع من قريب، خصوصًا التجارب اللي عشتها وشوفتها حواليا، سواء من أهلي أو من ناس قرايبي، بحس إن الست مش مجرد شريك، لكنها بركان من المشاعر المكبوتة، محتاجة تتفرغ طول الوقت، محتاجة حد يسمعها ويحتويها باستمرار… وده حقها الطبيعي. أنا متفهم ده، ومتفهم إن اللي بيتصرف بالشكل ده مش بالضرورة يقصد استنزافك أو ضغط عليك، لكن عندي إحساس شبه مؤكّد إن أنا شخصيًا مش هعرف أتحمل البركان ده لو اتكرر معايا بنفس شكل النموذج اللي شفته عند والدتي. مهما كنت بحب الشخص ده، الفكرة دي مرعبة بالنسبة لي، وممكن تكون صعبة جدًا على نفسيتي. كلنا في البداية، وفي وقت الهدوء والسعادة، بنكون لطيفين وجميلين جدًا، لكن وقت الغضب والخلاف، الموضوع بيكون حاجة تانية تمامًا… وده اللي بيخليني أحس بضغط واستنزاف نفسي لا أستطيع تحمله. النموذج اللي شفته عند والدتي مأثر عليا جدًا، وده اللي بيخلي الموضوع أصعب… حجم المشاعر، المبالغة في التعبير، الفضفضة، وحتى الحزن، كلها حاجات صعبة السيطرة عليها، وبتخلق عندي شعور بالمسؤولية والعبء اللي مش مستعد له. أنا مش ضد الحب أو المشاعر، ومش ضد التعبير، لكن من حقي أكون صريح مع نفسي، وأكون واعي لقدرتي على التحمل. الدنيا سريعة ومليانة تحديات، وأنا محتاج أعيش تجربة إنسانية متوازنة، فيها دفء واهتمام وحب حقيقي، مش مجرد ضغط ومبالغات مستمرة ممكن تكسر أي توازن نفسي.

0

3