صباح الخير أو مساء الخير حسب هتشوفوا البوست ده إمتي النهارده حابة أشارك درس جديد اتعلمته وأضيفه صفحه لكتاب حياتي، درس عمري ما فكرت فيه قبل كده. زمان كنت فاكرة إن أنا اكيد الاختيار الأحسن لأي حد، وده مش غرور ولا نرجسية، والله أبداً، بس كنت حاسة من جوايا إن اللي هايختارني أكيد مش هيخسر، لإني هساعده بكل طاقه عندي وكنت كمان متأكدة إني لو اتحطيت مكان أي حد في موقف صعب، هعرف أتصرف وأحل المشكلة. لكن من كام يوم، أدركت حاجة مختلفة تماماً... اكتشفت إن المواقف الوحشة اللي بنمر بيها مش دايماً حاجة سيئة، بالعكس، أحياناً بتكون فرص نتعلم منها دروس مهمة. وللأسف،او خليني اقولك الحمدلله الدرس اللي اتعلمته كان إن أنا مش دايماً الاختيار الأحسن، ولا حاجة! زعلت؟ أكيد زعلت... وسألت نفسي سؤال: ليه عمري ما فكرت في العكس؟ ليه ما حطيتش في اعتباري إن ممكن أكون أنا مش الشخص المناسب لحد معين؟ ليه كنت دايماً مقتنعة إني هعرف أحل أي مشكلة؟ ليه مفكرتش إننا مختلفين، وإن الطريقة اللي أنا شايفاها الحل الأمثل ممكن تكون بالنسبة لغيري مش الحل الصح، وإنه ممكن يكون في حل أحسن مفكرتش فيه؟ أسئلة كتير جداً دارت في دماغي، وإجاباتها مش عندي، بس اللي متأكدة منه دلوقتي إن الدرس ده خلاني أعذر ناس كتير ما اختارونيش، لأن ببساطة... يمكن أنا فعلاً ما كنتش الاختيار الأحسن ليهم.

8

0