حيران في مستقبلي بين البرمجة والجيم والرياضيات

Question

جماعة انا حيران ف مستقبلي جدا من نحية الكارير والشغل وكده ... انا بدرس ف كلية حاسبات ومعلومات بس مش مرتاح للمجال ومش بحب الكمبيوتر خالص .. وانا بلعب جيم بقالي ٣ سنين وبحب مجاله جدا ودارس فيه ومتعمق .. وبحب مادة الرياضيات جدا وكنت مقفلها ف ثانوية عامة ... حيران اشتغل مهندس برمجة ف شركة مثلا وانا مش حابب المجال اوي ولا افتح سنتر رياضة واشتغل مدرس رياضة وادي دروس ولا ابقى كوتش جيم مشهور وشغال ف جيم براند وادرب ناس اونلاين ... محتاج اسمع اراء حضراتكم

Mango_29671 🇪🇬 · Accepted Answer

ايدا انا اسف قراتها جيمز 😂

French Fries_40095 🇪🇬 · Answer

بحكم اني في مجال الچيمات بقالي شوية حابب اقوللك انت ممكن تشتغل اون لاين ترينر وتوصل ارباحك لنص مليون جنيه في الشهر مش في السنة كمان ، بس عشان تبدأ في ده انت محتاج تتأكد انك مؤهل لتدريب الاشخاص ، يعني لازم مهارة انك تعلم حد حاجة اصلا تبقي عندك ، ممكن تبقي اشطر حد بيعرف يطبخ بس مش شرط تبقي مدرس طبخ ناجح ، فاهمني ؟
ف نصيحتي ليك ، اشتغل في مجالك عادي اللي انت بتدرسه ، هات منه فلوس

Almond_26266 🇪🇬 · Answer

اشتغل فيه ازاي وانا مش بقبله ومبحبوش .. صعب انجح فيه

French Fries_40095 🇪🇬 · Answer

تعالي علي نفسك بس سنة او سنتين وبعدين شيل زء شهريا من الفلوس اللي بتطلع من شغلك وواحدة واحدة سور محتوي واعمل دعاية علي السوشيال ميديا واهتم بيها واشتغل في الاول جامد علي دايرة معارفك ، مرن صحابك وقرايبك ، واللي يجيلك تبعهم مرنه بسعر كويس ، وذاكر كتييييير في مجال التمرين وطور نفسك كويس فيه ، ومع الوقت اول ما تمسك فلوس كويسة انت من نفسك هتاخد الريسك وهتسيب شغلك الاساسي وهتجري ورا اللي بتحبه

Orange_35634 🇪🇬 · Answer

هو السؤال الاهم ف شغل اساسا ف مصر ؟ 😂😂😂

French Fries_40095 🇪🇬 · Answer

يا اما هتقتنع ان الموضوع كان مجرد حاجة شداك لفترة معينة وهي مثلا حاجة مش مريحة او انت مش هايز تكمل فيها ، فاهمني ؟

French Fries_40095 🇪🇬 · Answer

نصيحة تانية بحكم اني في المجال ده ، لو خلاص ناوي تشتغل في چيم ، لو انت مش من القاهرة حاول تنزل تعيش في القاهرة ، شغل الچيمات كله في القاهرة

Mango_29671 🇪🇬 · Answer

طيب يصحبي مانت عمليا مرحتش بعيد شوف كورس خارجي عن تصميم الالعاب وهكذا وغالبا هتبقى نفس المبادئ طلاما الحاجه الي بتحبها في اطار تفكيرك والي اوريدي درسته ف هتلاقي الموضوع حلو بالنسبالك وغير انك هتشجع نفسك عليه بس يكون جمب الكليه لحين تخلصها

Almond_26266 🇪🇬 · Answer

فاهم حضرتك طبعا .. طب م ممكن اجيب فلوس من تدريسي لمادة الرياضة من خلال اني افتح سنتر وكده وعالاقل حاجة بحبها ومن خلالها اطور ف حوار الجيم .. ايه رأي حضرتك

Almond_26266 🇪🇬 · Answer

انا كنت بفكر اقدم ف حاجات زي la7 وكده ايه رأي حضرتك.. وهل حضرتك عندك خلفية عن المرتبات فالجيم البراندات وكده وايه المناصب والرواتب وهكذا لو تعرف حضرتك استأذنك تفدني

Almond_26266 🇪🇬 · Answer

ايه علاقة تصميم الالعاب ب الي انا بحبه وحيران اشتغل فيه ؟؟

French Fries_40095 🇪🇬 · Answer

ماتبدأش بيزنس غير وانت شاربه وعارف كل ايجابياته وسلبياته ، انزل اسعي شوية گ ترينر في كام چيم ع الاقل في الفترة اللي جمب دراستك ، وبعدين فكر بقي تفتح سنتر تفتح چيم ، تمرن اون لاين ، أياً كان

French Fries_40095 🇪🇬 · Answer

في شغل في كل حتة والله بس توكل علي الله وقبل ما تدور ع الشغل اللي انت عاوزه دور انت ايه احسن حاجة فيك تخلي الشغل ده هو اللي عايزك ، وربنا يوفقك

French Fries_40095 🇪🇬 · Answer

بص يا معلم 
في أي چيم محترم أو ليه اسم حتي لو مش معروف
بتبدأ گ Junior Trainer بعدين شوية مجهود وصبر ومذاكرة بتبقي Senior Trainer بعدين شوية ربنا بيكرمك بتبقي Fitness Manager ، ده اللي بيدير المدربين اللي في الچيم ، ال Title اللي بعده اسمه Fitness Director ودي في الغالب بتبقي في الچيمات اللي ليها اكتر من فرع ، بتبقي انت مدير مديرين المدربين ، او مدير منطقة مثلاً

French Fries_40095 🇪🇬 · Answer

نصيحتي لو انت لسه في الأول ماتحرقش نفسك في براندات كبيرة ، أجل الشغل مع الاسامي الكبيرة زي LA7 و CORE EGYPT و Nexus و غيرهم لقدام شوية ، وخاصة ان الچيمات دي بتحناج انك تكون واخد كورسات وشهادات وعندك خبرة كبيرة
إبدأ مع أماكن زي H2O او حاجات نفس ال Level وكل حبة طور في نفسك كام حاجة وطير علي مكان احسن ، واهتم بالانستجرام بتاعك جدا جدا جدا "هتفتكر النصيحة دي قدام شوية"

Mango_29671 🇪🇬 · Answer

بس هوا عموما لازم تكمل الكليه وفوقت مانت ماشي فالكليه حاول تشتغل عالجمب التاني في حاله انك وقت متتخرج تكون عملتلك اسم ومكان فالجيم والناحيه دي هيكون احسن تكمل فيه وفي حاله لا قدر الله ومحصلش يكون عندك بديل

Almond_26266 🇪🇬 · Answer

طب ايه متوسط المرتبات لو حضرتك عارف وكده وهل ك شاب لوحده مش متجوز يقدر يعيش عيشة كويسة ويحوش فلوس منه

Almond_26266 🇪🇬 · Answer

انا بحاول اظبط جسمي على مدار الكام سنة الي جايين دول وهدرس كذا كورس واخد كذا شهاده كمان ف حوار الجيم والتغذية وكده عشان ابقى مطلوب اكتر .. ايه رأي حضرتك

Mango_29671 🇪🇬 · Answer

حلو جدا بالذات صحابي الي فالمجال ده ومعاهم شهادات فعلا الجيمات ومراكز التدريب بتبقى طالباهم اكتر بس برضه عايز اوضحلك حاجه انك لازم الاول تشوف جيم تشتغل فيه او تعملك بيدج تبدا تتكلم فيها عن الي درسته يعني ك معلومات للناس بالعربي تسوق لنفسك وباذن الله يكون فتحه خير عليك ف الموضوع حلو يعني باذن الله طلاما بتحبه وهتحط شغفك فيه

French Fries_40095 🇪🇬 · Answer

ال Trainer في اي چيم بيكون عنده Target زيه زي ال Sales ، ف انت بيكون ليك ثابت وكوميشن علي التارجت اللي بتحققه ، خلينا متفقين اننا گ ترينرز او سيلزجية عايشين ع الكوميشن مش ع البيزك ، البيزك ممكن يبدأ من 3500 ل 8000 وممكن يعدي ال 10000 وده طبعا ع حسب المكان اللي هتشتغل فيه وهتبيع نفسك ازاي في الانتر ڤيوو ، ممكن في الاول نتنازل ونقبل ب بيزك قليل بس عشان نكبر السي ڤي وبعدين ربنا يكرمنا ونروح مكان احسن

French Fries_40095 🇪🇬 · Answer

الكوميشن ده بقي يا سيدي بيكون نسبة من مبيعاتك ، ممكن يكون 20 / 30 / 40 % وزي ما قولنا ده بيختلف من مكان للتاني ، ف لو مثلا تارجتك 50,000 وحققته بتقبش عليه 10,000 / 15,000 / 20,000 وممكن اثل وممكن اكتر وانت وشطارتك ، فكرة بقي هتعرف تعيش بالفلوس دي ولا لا ، انت بقي اللي تقدر تحدد التزاماتك وهتصرف كام لبس ومكملات وأكل عشان تفضل ع الفلور الترينر الأكثر طلباً

French Fries_40095 🇪🇬 · Answer

ف لو في الآخر كانت الحسبة انك بيخشلك حتي 10000 اول عن آخر في الشهر حاول تخش جمعية بقي وتعمل اعلان ممول علي انستجرام برقم كويس ، حاول تشتري موبايل كويس وتصور ڤيديوهات كويسة 
المهم : اتقي الله ، توكل علي الله ، وتأكد إن الله لا يضيع أجر من أحسن عملاً

Almond_26266 🇪🇬 · Answer

حبيبي تسلملي تعبت حضرتك معايا .. لو عايز اتواصل معاك او استفسر منك على اي حاجه ف اي وقت .. اتواصل معاك ازاي؟