حاسس إني مش عايش، مش قادر أشرح أنا حاسس بإيه، مش لأني مش فاهم، لأ، عشان اللي جوايا أتقل من الكلام، كأنك شايف نفسك بتغرق، بس كل الناس شايفاك واقف، طبيعي، بتضحك، بس من جواك مفيش حاجة، كل حاجة حواليا باهتة، الناس باهتين، الكلام باهت، الألوان باهتة، وأنا نفسي باهت، كأن حد نزل الفلتر الرمادي على الكون كله، حتى الضحك بقى بايخ، حتى الأكل ملوش طعم، حتى أنا مليش وجود، بصحى كل يوم مش عشان عايز، بصحى عشان لازم، عشان خلاص بقيت متبرمج إني أفتح عيني، وأقوم، وأمثل، وأعدي يوم تاني في نفس الدوامة، مفيش جديد، مفيش فرق، مفيش طاقة، وكل يوم بيعدي بياخد مني حاجة، بياخد حتة، بيقص فيا حتة، لحد ما بقيت حاسس إني مش بني آدم كامل، بقيت نصّي، ويمكن أقل، بقيت شايف الناس بيتكلموا، وبيتحركوا، وبيضحكوا، وأنا ولا شايفهم ولا سامعهم، ولا حتى حاسس إنهم شايفيني، كأن وجودي اتكسر، كأني بقيت شفاف، كل حاجة بتمشي فوقيا ومن تحتيا، بس مفيش حاجة بتلمسني، مفيش حاجة بتحسسني إني لسه حي، حتى السواد اللي تحت عيني بقى هو الحقيقة الوحيدة اللي بحس بيها، بحس إني مستهلك، مستنزف، متآكل، من بره و من جوه، كأن في حاجة بتاكلني وبتفضل ساكتة، مش بتسيب أثر واضح، بس أنا حاسس، وقلبي حاسس، وروحي حاسة، وكل ده مش باين، ومش مفهوم، واللي حاولت أقوله مابيوصلش، واللي جوايا مالوش ترجمة، كل حاجة تقيلة، النَفَس تقيل، التفكير تقيل، الكلام تقيل، حتى الصمت تقيل، وليل ورا ليل بيعدي عليا كأن الوقت واقف، وأنا قاعد وسط الدنيا والناس، بس جوه جدران روحي، محبوس، وساكت، وبصرخ💔

0

2