بكره أبويا من أفعاله.. هل ده حرام؟

Question

جماعه بتعملوا ايه لما تحسوا انكم بتكرهوا ابوكم بجد من افعاله
ومش عايزه اسمع نصايح من فئة ده مهما كان ابوكي و يعمل اللي عايزه هو اب و هتندمي لو حصله حاجه وبتاع
انا حقيقي بتمنى يموت من كل قلبي علشان كلنا نرتااح ومش قادره ابطل ادعي نخلص منه
هل ده حرام؟

Pistachio_56798 🇪🇬 · Accepted Answer

مقصدش حاجة والله بس انا اهو راجل 22 سنة و ابويا اتوفى و انا 4 سنين و مش فاكر اي حاجه عنه و رغم اني اهو كبرت و الدنيا مشيت غير و انا حاسس اني ناقصني الجزء دا و بتمنى اجرب الشعور لو لحظة.
ف هل هو سيء اوي كدا مفيش حاجة صح بيعملها ؟ فرعون يعني ؟ معملش فبل كدا موقف كويس ولا حنية ولا دفع ولا ضحك ؟
يعني لو هو للدرجة دي ف ربنا يعينك يارب و يعوضك خير و بلاش تدعي عليه جربي تدعيله و تتجنبيه علشان متتصادموش

Blueberry_57809 🇪🇬 · Answer

بيعمل ايه يا حبيبتي؟

Strawberry_56499 🇪🇬 · Answer

كتيير بيعمل كتير 
خناق زعيق ضرب بدون اي سبب 
جدتي بتسخنه علينا يطلع يتخانق من غير حتى ما يفهم 
بنتعامل على اننا خدامين بس نطبخ وننضف و نغسل وبس ولو جه من الشغل ولقاني انت او اختي قاعدين مش بنعمل حاجه حتى لو مخلصين اللي ورانا يخرب الدنيا  وماما بتشتغل ف مفيش حد يحوشه عننا او يقفله

Cookies_57911 🇪🇬 · Answer

هما حلين ملهمش تالت الدعاء انه يلهمك الصبر و القوه و يبعده عنك و اوعي تيأسي من رحمه ربنا
 و انك تشتغلي علي مستقبلك و كاريرك عشان تعرفي تستقلي عنه

Strawberry_56499 🇪🇬 · Answer

ادعيلي اشتغل او اتجوز او ابعد. عن هنا ب اي شكل

Blueberry_57809 🇪🇬 · Answer

أنا كمان بابا عاوزني شغالة ٢٤ ساعة 💔 لو قعدت مع قرايبي بيكلمني قدامهم اقوم أعمل وأسوي💔 ميصبرش يمشوا حتى وأنا ببقا قعدت معاهم عشان واجب الضيافة ومينفعش أعمل المواعين وهما قاعدين 
وخناق وزعيق وكله قصاده المصاريف
لازم أصبر ولا يسحب مصاريف البيت

Strawberry_56499 🇪🇬 · Answer

حنيه لا عمري ما شوفتها منه 
ولا عمره كان معايا ف اي حاجه لا يعرف انا بعمل ايه ولا بخلص ورقي  ازاي ولا اي حاجه و لو اتدخل ف حاجه بيبوظها بعصبيته وزعيقه وانا اصلا مبقتش احب ادخله ف حاجه وبتجنبه ع قد ما اقدر

Blueberry_57809 🇪🇬 · Answer

بس بصراحة مقدرش أتحمل فكرة وفاته 💔💔💔💔

Avocado_57147 🇪🇬 · Answer

كلامك لمسني جدا...💔

Carrot_57524 🇪🇬 · Answer

انا زيك كدا وهقولك ع اللي بيحصل واللي لازم يحصل.
اللي بيحصل انه ماسكم من ايدكم اللي بتجوجعكم اللي هيا الفلوس والمصاريف وانتم مش عارفين تبعدوا عنه علشان المصاريف ومن كلامك ف هوا بخيل ومش فقير.
اللي لازم يحصل انكوا تعتمدوا علي نفسكم لازم يكون ليكم مصدر دخل محترم علشان متحتاجوش ليه شوفوا أي حاجه واعمليها مشروع بقا تتعلمي حاجه محترمه تخليكي تشتغلي شغل فلوسه حلوه بس فعلا لازم يكون معاكوا فلوس تبعدوا.

Blueberry_57809 🇪🇬 · Answer

خليني اقولك أن الي عايش على ذكرى وشرف أب كان صالح ممكن يبقا أفضل من الي عايش وأبوه بيعمل حاجات وحشة تسيء ليهم وسط المجتمع وكمان بيعاملهم وحش فأنت ربنا يصبرك ويقويك

Cookies_57911 🇪🇬 · Answer

انت ليا رابط تجربتك مع باباك بنفس تجربتها 
ربنا يرحمه و يحسن إليه 
بس انت متعرفش هي بتمر بأيه ولا حجم الاذي اللي بتتعرضله و لاكن حقيقي في ابهات مبترحمش و دا شوفته في تجارب حقيقيه حواليا 
و بعدين هي لما تاخد منه علقه و لا تتشتم و تتهزأ هتفتكرله انه دخلها مدرسه او جاب اكل النهارده في البيت؟!

Carrot_57524 🇪🇬 · Answer

وبعدها تشتروا شقه او تأجروا شقه بقا اي حاجه بس تكونوا استريحتوا

Blueberry_57809 🇪🇬 · Answer

أنا زيها وفعلا هو بيذلنا بالمصاريف بس أنا مستحملش فكرة وفاته

Strawberry_56499 🇪🇬 · Answer

تعرف المفجأه هو مبيصرفش ماما اللي بتصرف 
او بيصرف بس مرتبه اقل منها 5 مرات

Banana_57704 🇪🇬 · Answer

اسلوبك ف الكلام مستفز لدرجة انى عاوز اديكى بالشبشب ع بؤك بصراحة جدتى سخنته !!!!! يتخانق يموت حد يقفله !!! فاضلك تكة وتقولى الراجل الصايع أو النطع بصي يامو شخة لولا وجوده وتعبه عليكو مكانتش عيلة زيك هيجيلها قلب تتكلم بالاسلوب دة وجوده حواليكو هو اللى مخلى قلبك جامد كدة عشان مجربتيش كسرة قلب اللى ملوش ضهر وسند ثانيا دة سيدنا ابراهيم اطاع ابوه بالرغم من كل شئ وقال وفضل بار بيه برغم اى سوء شافه منه

Pistachio_56798 🇪🇬 · Answer

ربنا يعينك و ييسرلك حياتك بجد
زي م قولت حاولي تتجنبيه و متحتكيش معاه علشان ميبقاش عقوق
و ادعيله ربنا قادر يصلحه ف لحظة و اشتغلي على نفسك و قربي من ربنا لحد ك يرزقك ب زوج صالح يعوضك كل دا ان شاء الله و وقتها هيكون بإختيارك ف استعدي علشان تختاري صح

Pistachio_56798 🇪🇬 · Answer

والله انا متأكد انها مفكرتش ف  النصيحة بالشكل دا انتي هجومية زيادة عن اللزوم 🗿

Strawberry_56499 🇪🇬 · Answer

تعب ايه وبتاع ايه انا امي اللي بتصرف علينا و عالبيت 
سيدنا ابراهيم نبي و كان طول حياته بار ب ابنه 
ده لما جاله امر ربنا قال ل ابنه ربنا قلي اعمل كذا كذا انت رأيك ايه 
انت متخيل نبي بيسأل ابنه اعمل ايه؟؟؟  
ف قله افعل ما تؤمر  
ابويا ولا نبي ولا بار بينا

Cookies_57911 🇪🇬 · Answer

يا رب تشتغلي احسن شغل و في احسن اماكن و ربنا يعوضك بزوج حنون اهم حاجه اشتغلي علي نفسك الاول و علي مستقبلك و بعدين كل الفرص الحلوه هتجيلك و خلي عندك يقين ب ربنا 
 اهم حاجه يا حبيبتي مشاكل حياتك و بيتك متطلعيهاش برا لا صحاب و لا اي راجل هيدخل حياتك في المستقبل الحاجات دي بتبقي نقط ضعف ممكن حد يستغلها ضدك 
و الدعاء كنز ادعي كتير و متيأسيش من رحمه ربنا

Pistachio_56798 🇪🇬 · Answer

وجهة نظر تحترم
بس فعلا كل واحد و ليه حياته و قدره ربنا. يقوينا على الابتلاء لحد م ندخل الجنة ان شاء الله او نبني عيلة بدل اللي اتحرمنا منها

Banana_57770 🇪🇬 · Answer

انتي تستاهل ابوكي يؤدك قسما بالله

Strawberry_56499 🇪🇬 · Answer

مش هرد عليك بس يارب متدوقش من اللي انا دوقته وربنا يحميك من شر ان يبقا اهلك هما اسوأ ناس ف حياتك

Banana_57704 🇪🇬 · Answer

وحدى الله بالعقل نحسبها وبالدين كلكم راع وكلكم مسؤول عن رعيته الرزق اد ايه دى بتاعة ربنا مش بتاعتك ولا بتاعته ثانيا اى اب ف ظروف صعبة زى دلوقتى بيربي جيل حافظ مش فاهم زي جيلكو بيكون عصبي لانه شايف ف عنيكو اللى لسانكو لسة منطقهوش وهو ما باليد حيلة

Strawberry_56499 🇪🇬 · Answer

حاضر

Strawberry_56499 🇪🇬 · Answer

تعرف انا مش فارقلي الفلوس مش فارقلي اي حاجه 
انا مكنتش محتاجه اكتر من اني اتحضن والله 😅

Strawberry_56499 🇪🇬 · Answer

اتمنى لو عندك. نفس الابتلاء ربنا يرفعه عنك

Banana_57770 🇪🇬 · Answer

متعرفيش بجد ابويا بيعمل معايا اي

Banana_57704 🇪🇬 · Answer

حلو دة شكلك عصبية من اللى بيطلعو يطلعو وينزلو على مفيش نصيحة من اكبر منك سنا وخبرة واب على فكرة مفيش اب بيكره عيله دة بالعكس الإنسان لو نفسه يخلى حد احسن منه نفسه يخلى عيله احسن منه بس مش كلنا بنتحمل الضغوط احيانا حنيتنا بتبان ف شكل قسوة عشان خايفين نفشل ف تربية أو إحساسنا من ناحية عيلنا أننا مقصرين وكأن عينك بتقوله كل العك اللى قولتيه هنا فغصب عنه بيكون قاسي لانه معندهوش مبرر هو كمان نفسه ف الحضن

Avocado_57147 🇪🇬 · Answer

نصيحه حضرتك متغلطش فيها لانك ما عيشت اللي عاشته 
انا عارف هي نفسها تقول اي لاني في نفس الزفت المشكلة اللي هي فيها انا اللي عامل كومنت فوق *كلامك لمسني جدا*
انا شاب و شغال الحمدلله انا جالي كل امراض الدنيا بعد ما اشتغلت بفعل التراكمات اللي شغاله عليا من عشرين سنه بسبب ابويا وتصرفاته الزفت مع والدتي بخل و قلة قيمة واهانه لينا كلنا فبالله عليك متحكمش على حد انت ما عيشت ربع اللي عاشه

Avocado_57147 🇪🇬 · Answer

انا شاب عشريني جاله القلب بفعل التراكمات 
نظري راح من زعلي 
و غيره وغيره من ابتلاءات ربنا اللي معظم سببها تراكمات بطبيعتي محبش اتكلم عن الابتلاء بس كلامك معاها استفزني لانك مستحيل تفهم هي عايزه تقول اي وبتمر باي 
ادعيلنا وادعي لنفسك

Avocado_57147 🇪🇬 · Answer

يا رب يا رب اللهم آمين

Avocado_57147 🇪🇬 · Answer

انا راجل و كدا ما بالك هي بنت لا حول ليها ولا قوة هيكون شعورها اي دلوقتي

French Fries_57830 🇪🇬 · Answer

طفل اهو عنده 11 سنه و عنده نفس الموضوع
بصي عموما انا بتجنبه على قد ما اقدر

Ice Cream_54235 🇪🇬 · Answer

هو طبعا حرام بس سعات من كتر المواقف مبتقدرش تستحمل انا فهمك و حاسس بيك نصيحتي ليكي لما يحصل موقف يزعل حاول تروح تقعد في حته تانيه

Mango_55403 🇪🇬 · Answer

للاسف مفيش حاجه تتعمل غير الصبر وانك تحاولى تشتغلى ع نفسك عشان لو فى المستقبل زوجك كان نفس ابوكى تقدرى تنفصلى وانتى واقفه على ارض صلبه ادعى ربنا يصبرك وياخد حقك لكن مفيش ف ايدك غير التعايش لو حسيتى بأى خطر على حياتك فى لحظه حاولى تمشى لكن اوعى تمشى فى طريق غلط لو مشيتى حافظى على نفسك لان الحياة مبقتش امان

Watermelon_55402 🇪🇬 · Answer

بصي يا بنتي 
للاسف لسه ماره بنفس التجربه الوسخه مع اللي اسمه ابويا 
ضرب و زعيق و قله قيمه ع يبعد ع حياتنا 
و هو انسان بلا كرامه عاوز يندم مراته ع كل حاجه و بيعها اللي وراها و اللي قدامها و مش مستكفي بده 
و كمان بيشك فينا و بيقول علينا كلام وسخ و بيقارنا بالبنات الشمال 
بس هتقتليه انت هتضيعي حياتك اصلا و هيا ضايعه كفايه 
و الفكره انهم ملهمش كبير و مبيقدروش عليهم 
مفيش حل غير انك تدعيله بالموت

Mushroom_52326 🇪🇬 · Answer

متفهمك جداً صراحة لان ابويا يعتبر نفس الحالة و كان عندي نفس الاحاسيس :// و من صغري عمري ما حسيت باي انتماء او حب اتجاهو بأي شكل 
بس يعني من ٣ شهور حصلت خناقة جامدة و من وقتها بدأ يتغير و يتحسن معانا 
بس لأمانة انا لسا حاسس اني عندي عقدة مش عارف اطلعها
اللي هوا بعد ١٨ سنة سنة عذاب المفروض اسامح بس كده بالسهولة ديه؟
بدون اي اعتذار بدون اي حاجة حاسسني مش قادر اتخلي عن الاحساس بس اهو اديني بحاول 
١..

Mushroom_52326 🇪🇬 · Answer

٢..
لانه بردك بيتغير و لاحسن فا يعتبر مبقاش عندي سبب حالي جديد اكرهو عليه بس تراكمات المشاعر القديمة هيا اللي لسا عايشة عندي
فا اهو اديني بحاول احسن نفسي و ابقي انسان بار بوالده عشان الذنب كذلك 
بس متفهمك جدا و طبيعي تحسي بكرهك ده ليه
و بعتذرلك عن كل الكومنتات القذرة و السلبية اللي جاتلك من الناس اللي فالكومنتات ديه و سيبك منهم عامة ://

Carrot_55533 🇪🇬 · Answer

محدش هيفهمك هنا غير قليل يا مر بنفس التجربة أو يكون زيي عندي خلفيه عن طباع الآباء و الامهات النرجسيين إللي بيعيشوا أولادهم في جحيم حرفيا و اضطرابات نفسيه طوب حياتهم ... الله يكون في عونك ... ربنا هو سلاحك الوحيد خليكي قريبه في علاقة بربك و ادعي دايما إنه يطلعوا من إللي أنتوا فيه و يلين قلب الراجل إن شاء الله و يغيره معاكوا

Strawberry_56499 🇪🇬 · Answer

كل اللي حضرتك قلته مش هيفرقلي حاجه والله لانه هو فشل ك اب و اللي حصل حصل  ومفيش حاجه هتصلح ده للاسف  مع العلم انا مش صغيره او طفله او كده انا انسان كبير ناضج الحمدلله

Kiwi_46314 🇪🇬 · Answer

عارفه انه الموضوع صعب بس حرام الدعاء ويعتبر عقوق هتتحاسبي عليه 
ولو هو ظالم فكل واحد ليه جزاءه عند ربنا

Strawberry_56499 🇪🇬 · Answer

شكرا انك انسان♥

Chocolate_57955 🇪🇬 · Answer

انا زيك يمكن علشان بسببه بقيت مريضه يعاني من البوردلاين 
يمكن لانه طول الوقت اداني شعور اني يتيمه يمكن لانه خلاني اشحت الحب يمكن لانه عرفني معني الفقد والاحتياج والقسوه والاهمال في سن صغير
انا كمان يعاني زيك من حاجات ماليش يد فيها بتموتني كل يوم

Strawberry_56499 🇪🇬 · Answer

الله يهون عليك وتقدر تتغلب على الماضي

French Fries_57946 🇪🇬 · Answer

انا أعتبر نفس الحاله بس يمكن أسوأ

Cookies_56544 🇪🇬 · Answer

ادعيله بالهدايه ، فاهم أن الموضوع صعب و أن السلام النفسي اللي يخليكي تدعيله بالهدايه ده مش سهل ، لكن حاولي تكوني انت الاحسن 
غالبا ف يوم هتشوفي ابوكي ف موقف ضعف جدا و هيكون بيستنجد و يستغيث بمساعدتك اوعي و قتها تقسي عليه ، هو ده الامتحان و الاختبار

مفيش ظلم اكبر من الكفر و أن جاهداك علي أن تشرك بي فلا تطعهما ، ولكن صاحبهما ف الدنيا معروف

تجنبيه حاليا و حاولي تتخلصي من جبروته عليكم لكن بالمعروف

Chilli_55831 🇪🇬 · Answer

انا متفهم اللي بتمري بيه ومشاعرك تجاهه ، تقريبا مريت بنفس المشاعر مع والدي الله يرحمه 
خلاصه تجربتي انك محتاجه تعيشي حل المشكله ، لانك معندكيش قدره علي تغيير الناس ف الحل انك تقبليه زي ما هو 
حاولي دائما تبصي علي الجانب الإيجابي فيه ، موقف كويس عمله ، حاجه حلوه فكراهاله .. لان مفيش إنسان كامل ، ومفيش انسان سلبي وسيئ طول الوقت

Cookies_56544 🇪🇬 · Answer

اتمني تكوني فهمتي تعليقي ، ربنا يهديه عليكم

Chilli_55831 🇪🇬 · Answer

والحاجه التانيه تجتهدي وتتعبي وتشتغلي علي نفسك .. لحد ما تكوني قادره تستقلي عنه 
متفهم احتياجك العاطفي انك تحسي بدوره في حياتك كأب
لكن محاولاتك لتغييره مش هتزيدك الا وجع

Carrot_57524 🇪🇬 · Answer

أنا اسف ليك علي كل حاجه هوا عملها معاك حاول تقف علي رجلك بقا واهرب بجد اهرب من بيتك💔