اهلي اذوني وخليوني شخص مهزوز بلا ثقة

Question

أهلي علشان هما اكتر ناس اذوني في حياتي من اول ما وعيت علي الدنيا واحنا في مشاكل وقرف واللي يسوي واللي ميسواش يدخل في حياتنا فكنت بروح عند جدتي وعماتي ودول بقي اكتر اذوني بعد ابويا وأمي كانوا ديما بيتريقوا عليا ويشخطوا فيا ويقللوا مني قدام الناس كلهم مش سالكين ومش بيحبوني مش عارف ليه وفي الآخر طلعت ايه شخص عنده رهاب اجتماعي ، معندهوش اي ثقه في نفسه ، مهزوز وضعيف الشخصية ، مش بعرف اتعامل مع الناس مش بعرف ارد لو حد ضايقني بخاف 
بخاف من كل حاجه مش عارف ليه ومش بعرف اعبر عن مشاعري وحاسس اني تايه انا مش عارف انا مين وعايز ايه 
بقي عندي 25 سنة وخريج كلية تجاره بقالي 3 سنين متخرج ومعملتش اي حاجه انا فاشل وضايع في كله وبقيت جعان حب واهتمام عايز حد يشوفني ويحس بيا بس مفيش حد حاسس بيا مفيش حد مهتم بوجودي انا هوا ولا حاجه

Hazelnut_52786 🇪🇬 · Accepted Answer

إنت مش فاشل، إنت مجرد شخص اتوجع كتير ومحدش ساعده يوقف على رجله.
ابدأ بنفسك، حتى لو بخطوة بسيطة كل يوم، وافتكر إنك تستاهل تكون محبوب ومتقدر.
الناس اللي وجعوك مش هما مقياسك، قيمتك من جواك مش من كلامهم

Chocolate_55964 🇪🇬 · Answer

يعني اللي انت عايز تقوله اللي انت جدع مع الناس كلها بس مش جدع في حق نفسك صح

Mango_55973 🇪🇬 · Answer

جدع في حق نفسي ازاي؟

Chocolate_55964 🇪🇬 · Answer

انا قصدي مش جدع في حق نفسك

Mango_55973 🇪🇬 · Answer

اه هعمل ايه يعني

Chocolate_55964 🇪🇬 · Answer

هي اول حاجه ما تديش اهتمام لحد ما تتلقلقش في الكلام مع اي حد خلي كلامك قليل قوي يعلي صوته علي صوتك عليه يعني تعوج على كل الناس اللي شايفها مش جايه معاك

Mango_55973 🇪🇬 · Answer

كده كده الكلام قليل يعني وانا مش بعرف اتعامل واتخانق انا مرة اتخانقت مع واحد جاري وهو تطاول عليا وكان هيضربني وقل مني قدام الناس ومعرفتش اخد حقي منه هو اطول واعرض مني الكلام ده كان في يوليو 2023 ومن ساعتها كل لما بشوفه بحس بخوف جوايا واعصابي بتسيب وببقي مخنوق اوي ببقي عايز امسكه افشخه واموته مش عارف ده تفسيره ايه هي دي صدمة ولا ايه

Chocolate_55964 🇪🇬 · Answer

لا دي حاجه جامده قوي مش بتلاقي رعشه في ايدك وقلبك نبضت وبقت سريعه

Mango_55973 🇪🇬 · Answer

ايوه بحس برعشه في جسمي ونبضات قلبي سريعة

Chocolate_55964 🇪🇬 · Answer

انت في اللحظه دي لو كنت ضربته ايدك هتبقى زي المرزبه ولو هو ضربك مش هتحس بحاجه هتحس بكان واحد بيزغزغك اسمع مني انا بقول لك ايه يا معريك وفهم الموضوع ده كويس

Mango_55973 🇪🇬 · Answer

حصل انا محكيتش كل حاجه كمان 
الكلام حلو بس مش عارف اخد اي خطوة حاسس اني مستحقش اي حاجه