تعبت من انفي الكبير وعدم ثقتي في نفسي

Question

انا ملامحي حلوه بس عدا الانف لانو ورثته عن ابوي وجدتي انف كبير جدا وعريض وشكله مايليق علي تنف بنت يعني حتي لو انف ولد يكون واضح انو غريب دايم اخبي وجهي لما اتصور مع اصحابي ودايما مش بحب اخرج ومش بحب اقابل حد ودايما شايفه انو كل البنات احلي مني لان فعلا الشكل مش الطف حاجه وكنت بحاول اتفادي اني اركز معاه بس فعلا شكلو بقا واضح ومش حلو جدا انا تعبت بجد وسني صغير وميسمحش اني اعمل عمليات تجميل غير كده اهلي مش هيوافقو ومع ذالك انا نفسي مش هوافق لاني بحس اني مصطنعه جربت تمارين اليوجا فيس وبقا شكلو اكبر واغرب فعلا وكمان مش بحب المكياج مثلا اني اعمله بالكونتور غير برضو أن اهلي بيرفضو تماماً المكياج وانا فعلا مش متقبله الشكل مش قادره اخرج ولا اتكلم ومفيش ثقه بالنفس خالص وبسبب كده ملامحي كلها بقت وحشه يعني لما اشوف عيني لوحدها بتبقي حلوه جدا بس اشوف صوره لوشي كلو بحس اني وحشه اوي بجد مش انا بس الي ملاحظه حتي اخواتي من زمان بيقولو نفس الكلام واخويا الصغير بيفضل يدايقني مع أنه مش فايدي حاجه اعملها بجد تعبت الي يعرف طريقه او اي حاجه يقول

Tofu_51955 🇪🇬 · Accepted Answer

عايزة أقولك إنك جميلة بشكلك ولازم تكوني راضية علشان ربنا خلقنا في أحسن صورة حبي نفسك زي م إنتي 🤍

Avocado_49352 🇪🇬 · Answer

ربنا ما خلقش حد وحش.
وكلنا فينا حاجات اجمل من بعض

Avocado_49352 🇪🇬 · Answer

ربنا ما خلقش حد وحش.
وكلنا فينا حاجات اجمل من بعض

Lemon_50969 🇪🇬 · Answer

حاولت كتير بقالي اكتر من تلت سنين فنفس الحاجه مش قادره اتقبل مش قادره اشوف نفسي حلوه ابدا وكل حاجه بقت وحشه ف نظري معرفش ليه حصل كده بس انا تعبت بجد

Pineapple_30838 🇪🇬 · Answer

بصي أنا بردو نفس الشيء انفي من النوع اللي الطويل والعريض شويه بالنسبة لي ماكنش فارق معايا زمان وماكنتش حاسة باختلاف لحد ما صاحبت ناس كان كل شوية يتنمروا عليا كنوع من أنواع الهزار وكنت اهزر معاهم بس لما ارجع البيت كنت بنهار وبقيت اشوف نفسي وحشة واتكسف لما امشي معاهم كلهم ملامحهم جميلة والناس بيفضلوا يمدحوا فيهم وفي جمالهم وكل شويه واحده فيهم تيجي تقول إن في حد معجب بها والكلام دا بتاع المراهقه 👇🏻

Pineapple_30838 🇪🇬 · Answer

وكنت اقعد اقول اشمعنا انا ووصلت لدرجة اني ما بقتش حابه نفسي وبقيت استخسر في نفسي اي حاجه واقول ما انا وحشه ما استاهلش فعلا حد يبص لي وكان نفسي أعمل عملية تجميل وكنت كل شويه بدعي واعيط إن ربنا يخليني جميلة دا حتى لما كان يجي حد يعاكس فينا واحنا ماشيين كنت اقول اكيد طبعا مش ليا ومواقف من كدا كتير لحد بس بدأت أجرب ارجع احب نفسي تاني واتقبل الحاجات اللي ما أقدرش أغيرها في نفسي لاني مش ضامنه 👇🏻

Pineapple_30838 🇪🇬 · Answer

لاني مش ضامنه لو عملت العمليه هيبقى حرام ولا لا وهيبقى شكلي عامل ازاي بعدها مش يمكن يبقى اوحش قولت طالما ربنا خلقني كدا وما عنديش أي عيوب خلقية تستاهل تتعالج الحمدلله يبقى أكيد ربنا شايف إني كدا أحلى حتى لو دا مش زوق معظم الناس ولما بدأت أحبني بجد فعلا بقيت أشوف نفسي أحلى وانفي عادي جدا وبالعكس شكله حلو ولاقيت عادي إن في ناس كانت معجبه بيا بس كانوا خايفين يصارحوني عشان شايفني جادة ومش بتاعت الهبل

Pineapple_30838 🇪🇬 · Answer

ومش بتاعت الهبل وجو المراهقه وإن اصحابي كلموا ولاد واتصاحبوا ودخلوا في مشاكل وقلوبهم اتكسرت وانا الحمد لله ربنا رحمني من دا كله ف دي بالنسبة لي نعمه ولما قدرت نفسي بقيت أشوف إن استحق الأحسن بس مش غرور الفكرة من كل دا عاوزة اقولك إن ربنا لما خلقنا على هيئة معينه هو أعلم بالحكمة في كدا ومش لازم احنا نشغل بالنا ونسأل ليه حبي شكلك زي ما انت احنا هنعيش مرة واحدة نعيش واحنا مبسوطين ومش مكسوفين

Pineapple_30838 🇪🇬 · Answer

طالما مش بنعمل حاجه عيب أو حرام وكدا كدا كلنا في الجنة هيبقى شكلنا حلو انا عارفه اني طولت بس دا حاجه من ضمن حاجات كتير اتعرضت لها معلش لو الكلام مش مترتب بس اتمنى تكوني فهمتي قصدي واتصوري عادي وعيشي وماتشليش في نفسك حاولي تكوني احسن في بقيت جوانب حياتك من غير ماتيجي ع نفسك

Lemon_50969 🇪🇬 · Answer

فعلا انتي قويه انك قدرتي تعملي كده وتحبي نفسك انا كنت بحب نفسي جدا زمان وكنت متقبله شكلي وشايفه أن اي حد هيحبني لاني حلوه وفعلا كنت بلاقي حب من ناس كتير وصحابي ومحدش كان يقدر يكلمني او يتنمر عليا أنا بدأت اضايق من الموضوع لما بقيت اشوف ناس حلوه بجد لما بدأت اتصور مع صحابي مثلا بيبان شكلو وحش اوي لما اتصورت امبارح ف المدرسه مع الأوائل كنت الوحيده الي شكلي مش حلو حرفيا ف الصور كلهم حلوين وشكلهم جميل