أنا حاسة بإكتئاب حقيقي لأني مباخدش حقي ولا كفايتي في أي حاجة.. مباخدش كفايتي في المرض لازم أقوم بسرعة مهما كنت تعبانة عشان أكمل. مباخدش كفايتي من النوم مبنامش من كتر التفكير في اللي راح واللي جاى، وفي القلب اللي طول الوقت منهك وتعبان. مباخدش كفايتي من الزعل حتي لو جوايا نار لازم أبين طول الوقت إني بضحك وتمام وامثل عشان الناس فيها اللي مكفيها ملهاش ذنب تشيل حمل زعلك لازم نهون على بعض الدنيا. مباخدش كفايتي من الحزن مهما كنت موجوعة عشان متشافش نكدية أو كئيبة أو مأفورة عشان لازم الحياة تمشي حتى لو هتمشي من غير روح. مباخدش كفايتي من الحب معرفش العيب فيا ولا في مين، بس كل اللى متأكدة منه إني لما بحب بدي كل الحلو اللي جوايا ومبكونش منتظرة أي مقابل تمامًا إلا إني أكون اتحبيت وبس. مباخدش كفايتي من الضعف زيي زي أي إنسان طبيعي حقه يوقع ويقوم، لأ لازم طول الوقت أبان قوية عشان أعرف أعيش. مباخدش كفايتي من الراحة مهما كنت تعبانة نفسيًا أو جسمانيًا أو قلبي واجعني، عشان معنديش رفاهية الإنهيار برغم إني إنسانة ودة أبسط حقوقي بس طول الوقت حاسة إني بجري وبصارع على حاجة أيه هي وليه معرفش. طب بعمل في نفسي كدا ليه؟ معرفش. في النهاية أنا حزينة حزينة أوي ووحيدة أوى مهما كنت ف لمة وناس.. وكنت محتاجة أقول دة جدًا.

4

0