ازاي الست تتعافى من زوج مش بيبطل يتعرف على ستات.. عنده مليون مبرر انه مش بيسعى لكده وأنه مش حرام وإنه عادي بيتعرف عشان يتجوز وده من حقه مع انه مش في مقدرته ماديا أصلا يفتح بيت تاني وان مش من حقي أتضايق واني لازم اكبر دماغي عشان مياخدهاش عند ولازم أسيبه براحته ومدورش وراه مع اني ولا بدور وراه طول الوقت ولا بنيل وبتبقى صدفه بتخليني افضل فعلا أدور وحظي الأسود بحلم بيه أصلا في كل قصة وبشوف تفاصيل في الحلم حقيقية جدا.. أنا معدتش قادرة أعيش خلاص صحتى بتروح ودمي حاساه بقى مسرطن من كتر الغليان كل شوية واهملت ولادي اللي مليش غيرهم… ولا راضي يبطل ولا راضي يسيبني ابعد عنه واخد هدنة منه ابطل فيها حرقة دم وأفكر بهدوء أنا اقدر أكمل في الوضع ده وللا لأ… بقيت حاسه انه رابط رقبتي وقلبي بحبل تخين وملففني في مداره هو وبس لحد مافقدت هويتي وفقدت نفسي.. أنا إنسانة ابويا ميت وامي ربنا يديها الصحة إنسانة سلبية لا تاخد منها رأي ولا فعل.. وأخ وجوده زي عدمه.. ومعقده من حوادث تحرش وانا طفلة سنتين وكمان وانا في ابتدائي لحد إعدادي وهو عارف كل شيء واني في الدنيا بطولي مليش غير زوجي.. وهو بيعرف كويس قوي يلعب على احتياجي ليه النفسي واحتياجه ليا ويحسسني بالذنب لما بقرر ابعد وبيعرف يرجعني لحضنه تاني كويس قوي. ويرجع تاني يلففني حواليه بالحبل اللي على رقبتي لما خلاص فقدت هويتي وفقدت رغبتي في الحياة وفقدت الأمل انه يتغير وكل مبعد يرجعلي ويحسسني انه تحت رجلي ومفيش في الحياة غيري وكل مرة نفس المنوال. أنا نفسي حد يساعدني أتصرف ازاي عشان اتعافى من التعلق بيه ومن حبه ومن أفكاره المغلوطة وحياتي مع تصرفاته دي عشان اعرف اربي عيالي والاقي نفسي وصحتي وبالتالي اخد قرار صح في حياتي معاه.

6

9