بصراحة مش عارف أبدأ منين، بس حبيت أفضفض هنا يمكن ألاقي حد حاسس بيا. اليومين دول حاسس بوحدة كبيرة أوي، كأني دايمًا لوحدي مهما كنت فين أو وسط مين. أنا أول سنة جامعة، وكل ما بروح الكلية بحس إني غريب وسط الناس. كل واحد عنده صحابه وشلّته، بيضحكوا وبيتكلموا مع بعض، وأنا قاعد لوحدي مش عارف أشارك أو أفتح كلام. مش إني مش بحاول، بالعكس بحاول أندمج أو أتكلم بس بحس إن مفيش كيمياء، أو إن الناس خلاص متعودين على بعض ومش فاضين يعرفوا حد جديد. النتيجة إني دايمًا حاسس بالوحدة، حتى وأنا في وسط الزحمة. عندي ٣ صحاب من زمان، بس كل واحد فينا بقى في طريق مختلف، ومش بنتكلم كتير زي زمان. فبقيت برجع البيت حاسس إن مفيش حد أحكيله يومي، أو أضحك معاه، أو حتى يشاركني تفصيلة بسيطة. بقيت أعيش كل يوم كأنه نسخة من اللي قبله، نفس الروتين، نفس الإحساس بالوحدة اللي مش راضي يسيبني. ويمكن أكتر حاجه مخلياني حاسس بكده اني حبيت مره واحده بس في حياتي كنت مرتبط مرة واحدة بس في حياتي وهي كانت الشخص الوحيد اللي كنت بحس معاه إن الهم ده بيخف. كانت اكتر حد بيحبني بجد كنت دايمًا حاسس إن في حد معايا، بنتكلم ونضحك مع بعض، وكل حاجة كانت بتبقى أبسط وأجمل. كنت بحس إني كويس لمجرد إنها موجودة، بس إحنا بعدنا من فترة. ومش عشان خناقة أو وجع، لأ إحنا قررنا سوا نسيب بعض وإحنا مبسوطين، بس برضه بعد ما بعدنا حسيت بالفراغ كله بيرجع مرة واحدة. وحرفيًا بدأت أسأل نفسي هو المشكلة فيا أنا هل أنا اللي مش بعرف أتعرف على الناس ولا دي حاجة طبيعية بتحصل لكل الناس في الأول يمكن عادي، ويمكن لأ، بس بصراحة الإحساس صعب ومؤلم أكتر مما كنت متخيل. نفسي يكون عندي حد أحكيله كل حاجة من غير ما أحس إني تقيل أو مزعج. أنا بس نفسي الكابوس ده ينتهي، وأعرف إزاي أخرج من الدايرة دي، لأني تعبت من إحساسي ده

6

7