جوزي بيتعامل بلطف زايد مع زميلاته ومش قادرة أسامحه

Question

انا وحده بحب جوزي اوي وبحب بيتي وولادي وكل حياتي ليهم وانا حابه ده لان شايفه ان الاسره السعيده المستقرة أهم حاجه ممكن الواحد يعملها في حياته وعشان اطلع ولاد سويه نفسيا ونكون قدوه ليهم جوزي راجل محترم وبيحبني ويقدرني بس للأسف بيتعامل بلطف زايد مع زميلاته فالشغل ويخلي العلاقه بدل ما تكون رسميه بتقلب بحاجات تانيه وبكتشف ده وتحصل مشكله وبيبعد عنهم اخر موقف حصل انه كان مسافر وفي وحده كانت مسافره معاه من الشغل ومقليش عليها وفضل يكدب ويحور ويخبي ولما عرفت حب يقلب الترابيزه عليا ولما مقبلتش باسلوبه وكبرت المشكله عامل انه هو اللي زعلان وانا ظالماه انا مش قادره اسامحه ومش عارفه اخد قرار بسبب ولادي خايفه يتأذو نفسيا واكون ظلمتهم مش عارفه اعمل ايه

Grape_61307 🇪🇬 · Accepted Answer

الكلام ده موجود مع اغلب الرجاله ده لو مكنش كلهم الا من رحم ربي نصيحة مني عشان جوزك ميعندش بزياده لان الرجاله مبتخبش العناد
اتعملي معاه ولا كأن فيه حاجه ومتحاوليش تدوري وراه وتكتشفي كدبه لان نهايه الطريق ده مش حلوه واحتويه وخليه هو اللي يجري عليكي ويجيلك ويبطل من نفسه يعمل كده لان لو اجبرتي الراجل على حاجه اما يعاند او يسمع كلامك بس هيكون عايش معاكي جسد بس من غير روح وساعتها هتتعبي

Coffee_52706 🇪🇬 · Answer

حاجة كويسة جداً إنك عامله حساب ولادك لو هو ليه رصيد عندك وشايفه إنك هتقدري تعدي ماشي شايفه إنك مش قادره تعملي ده وشايفه ان الانفصال هو الحل لازم بس تفكري هل هتقدري تعيشي بولادك لوحدك وهل ليكي مصدر دخل غير جوزك ولا لا الطلاق بيتك في ثانيه بس هتفضلي ندمانه العمر كله لازم تفكري كويس قبل اي قرار واي خطوة

Grape_61307 🇪🇬 · Answer

كلامي ده مش معناه انه جوزك صح او ليه حق في اللي بيعمله ولكن الراجل لما يلاقي حاجه سهله ادامه بيحس انهها فرصه ومش لازم يسبها فكبري دماغك عنه شويه وهو هيرجع متقلقيش زي ما انت خايفه على البيت والعيال هو كمان خايف ومش هيعمل حاجه تهد البيت

Grape_61307 🇪🇬 · Answer

بقالكوا كام سنه متجوزين وعندك منه كام عيل

Marshmallow_68367 🇪🇬 · Answer

طيب مانا مقصرتش معاه في حاجه هل يكون جزاتي انه يخوني انا مش مستحمله انه يجي علي كرامتي وميحترمنيش في غيابي هل انا المفروض عليا اعيش معاه جسد من غير روح

Marshmallow_68367 🇪🇬 · Answer

بقالنا 14سنه ومعايا 3اولاد وهو كويس معايا بس انا مش مستحمله منه ده وبتأذي نفسيا اوي وبفقد الثقه فيه ومقدرش اعيش وانا متغاضيه عن كده وبتعذب جوايا ومفيش حد ممكن احكيله ولا اقدر اطلعه بصوره مش كويسه ادام حد عشان ولادي يفضلو متشرفين بيه

Marshmallow_68367 🇪🇬 · Answer

انا مش خايفه من فكره انه يهد البيت او يتجوز لان كل واحد بياخد نصيبه اللي ربنا كتبهوله وطالما مقصرتش في حاجه ربنا عمره ما هيضرني ولا يخزلني بس فكره ان اكون بحبه ومدياله حياتي وعمري وهو بردو بيحبني وبعدين يعمل اللي مضايقني ده انا مش متقبلاها وحاساها كبيره علي كرامتي

Grape_61307 🇪🇬 · Answer

دي حاجه كويسه انك عاوزاه يفضل بصوره كويسه وانا عارف ان الموضوع صعب عليكي بس صدقيني اصبري عليه واتكلم معاه باللين بلاش عنف في الكلام وربنا يهديه وده مش معناه انك تيجي على كرامتك بس عرفيه انه كده بيقل بيكي ومينفعش حد يقل من كرامتك عشان كرامته من كرامتك

Grape_61307 🇪🇬 · Answer

عندك حق بس ساعات الراجل بيبقى مضغوط في شغله وفي البيت ومش شرط يكون ضغط البيت منك بس ممكن متطلباته صدقني انا مش بدافع عنه بس اصبري

Strawberry_68026 🇪🇬 · Answer

انا زيك بالظبط لسه كنت هكتب مشكله زيك طلعتي في وشي.. عاوزة اقولك ان جوزي معاه بنات كتير في الشغل وكل تعاملاته معاهم وفي واحدة مش متجوزة عندها 40 سنة بتكلمه اليوم كله كنت مخنوقه وعملت مشكله معاه بعد اكتر وبقي اليوم كله برا البيت.. صدقيني الرجاله اغلبهم كدا الا ما رحم ربي حبي بيتك وولادك ونفسك قبلهم.. هو الوحيد اللي، فاهم طبيعه اللي بيعمله لا هو غبي ولا مش عاقل وربنا فوق كل دا مضيقيش نفسك

Pineapple_51151 🇪🇬 · Answer

تقريباً بدات اقتنع ان الرجاله ف طبعها الخيانه للست

Marshmallow_68367 🇪🇬 · Answer

مش عارفه بس فكره اتقبل وضع غلط عشان كل الدنيا كده مش متقبلاها وخصوصا اني حجات كتير جايه علي نفسي فيها عشانهم منهم شغلي واصحابي مش حابب يكون ليا اصحاب اخرج معاهم ووافقت وانا مضايقه لاني قولت بيتي اولي ومحدش هيخرب بيته عشان اصحابه بقيت حاسه اني بدفن نفسي في مقابل انهم يعيشو لكن حته اني اجي علي كرامتي لا مش قادره اعمل كده

Watermelon_68415 🇪🇬 · Answer

أغلب الرجالة بتميل لنفس الشىء
والموضوع مش خيانة الموضوع بيكون وحدة قدامة طول الوقت وهى كمان ما بتصدق تحس باى اهتمام بتزود فى التواصل علشان تحس بنفسها وطول الوقت عامل أساسى 
انصح بالتعامل افضل للحفاظ على كل شيء 
شدى وارخرى بلاش تكبير الموضوع اوى علشان العواقب مش هتكون كويسة

Orange_68509 🇪🇬 · Answer

براحه يا اختى لو هو عينه زايغه ودي طبيعه معظم رجاله اليومين دول بسبب اغراءات كتير من الستات او حتى قله رضا من الرجاله ونكران نعمه ربنا عليهم بزوجاتهم.كلمتين ف ودنك قربي منه ومدلوش فرصه انه يبص برا وانا قصدي علاقه ست بجوزها .