مش عارفة أقرر أقابله ولا لاء.. هو عايز إيه؟

Question

انا عندى 22 سنه لسه متخرجه اتعرف عليا شاب عنده 36 سنه اصر انه يكلمنى مع انى كنت رافضه تماما بس هو بعتلى وحلف كتير انه مش. بيتسلى خصوصا انه كبير وعارف اهلى م زمان وانا عارفاه م صغرى بس متعاملتش معاه  بس عايز فرصه مده مش كبيره هو حاليا مسافر برا اديله ست شهور ونازل بعد يومين وبيكلمنى ديما انه عايز يقابلنى ..هو مخدش اى خطوه خالص وحساه تايه كده مش عارف يعمل حاجه... كلامه كويس ومحترم بس مفيش اى سبب واضح يخلينى استمر معاه ..انا لحد الآن مش عارفه أخد قرار انزل اقابله بس المقابله دى ع اساس اعرف هو عايز اى واجيب اخر ولا بلاش ..انا معجبه بيه اه بس عايزه اعرف نيته اى لانى معرفش شخصيته ولا حياته ماشيه ازاى..

Cherry_20253 🇪🇬 · Accepted Answer

لا اوعي أبداً تنزلي تقابليه نهائي
كلنا بنسمع عن قصص خطف وبهدلة، لو عاوزك يجي يتقدم زي اي انسان محترم غير كده لأ

Apple_70037 🇪🇬 · Answer

خطف وبهدله ايه بتقولك عارفين بعض وعارفين اهل بعض يعني جيران او قرايب

Toast_64046 🇪🇬 · Answer

لو عايزه رايي فكك تماما منه ومتتعاطفيش مع اي حد وخصوصا الناس اللي تبدأ الكلام بالطريقه العبيطه دي اسف اني بقول كده بس بجد يعني هو انا ليه اتحايل على واحده انها تكلمني وبعدها اقولها مش بتسلى ؟
مش بتسلى يبقا اخش البيت واتقدم وربنا ييسر انما العبط ده اسمه استعباط 
ف فكك منه

Cherry_20253 🇪🇬 · Answer

قرءت نفس القصة دي بالظبط يعرفني طول العمر ويعرف اهلي وفي النهاية قابلها خطفها وتحر+ش بيها وسجلها فيديو وهددها بيه.
بتحصل برضو

Apple_76811 🇪🇬 · Answer

قابليه بس قوليله ييجي البيت تتكلموا إذا كان اهلك قاعدين في نفس القعدة أو استأذنتوا على جنب بس يبقوا اهلك موجودين

Chocolate_40055 🇪🇬 · Answer

طالما عارف اهلك و انت مش غريبه عنه يعني يقدر يوصلك اكيد فلو فعلا مش بيتسلي هييجي يطلب ايدك علي طول ده بالمنطق طبعا ، و لكن اخر جمله و انك معجبه بيه و كده مخلياكي مش عايزه تصدقي اي حاجه وحشه عنه او اي كلام مش علي مزاجك غالبا ، بس انا قلت لك الكلام اللي بيقوله العقل اما القلب فأنت ادري هو بيقولك ايه ، و فكك من انه ممكن يطلع خطر و يخطفك و جو افلام ابيض و اسود ده اه طبعا الحياه فيها خطر بس مش نتشائم

Chocolate_40055 🇪🇬 · Answer

و نصيحه مني الراجل ده كبير عليكي ، انت طبعا اللي عارفاه و لكن فرق السن مش صغير عشان اقولك عادي نعديها لكن ده فرق حوالي 14 سنه ، طبعا مش بالضروره يطلع الفرق ده مشكله و لكن لو هيبقي في خطوه رسميه فكري في كل الجوانب من الناحية دي قبل ما توافقي لأنك هتبقي في زهرة شبابك و هو بيعجز ، و لكي حرية الاختيار طبعا