قلبي انقسم نصين بسبب أهلي اللي مش بيحاولوا يفهموني

Question

مش عارفه بس حقيقي عمر ما أهلي حاولوا يفهموني هما بيختاروا في كل موقف يقللوا مني بحس الموضوع ده سهل بالنسبهم احسن ما يقفوا جنبي 
يعني كان من كذا سنه حصل موقف سوء تفاهم ليا ولصحبتي 
لما بصيت على رده فعل ام صحبتي وأنها قالت إنها واثقه ف بنتها 
بس أمي ضربتني جامد مع اني معملتش حاجه 
وقتها قلبي انقسم نصين 
وما زال 
حتى لو زودت ف الاكل حبه يتم شتمي والتنمر عليا 
بجد قلبي مقسوم

Guava_65081 🇪🇬 · Accepted Answer

ادعي ربنا اكتر و الجأي للصلاة.. وارد انهم مروا ب اوضاع صعبه خلتهم مش شايفين تصرفاتهم.. كلنا عندنا الاهالي دول والله.. الدنيا اهون من كدا.. و صدقيني كل دا وقت و بيعدي.. و هيبقى ليكي حياة و عيلة.. و هنا هتلاقي نفسك اتعلمتي درس ازاي تعاملي ولادك بدل ما كنتي تقسي عليهم.. هتديهم حنيه و هتعرفي تساوي بينهم.. و هتبقي ام كويسه معاهم.. دا درس والله.. اه صعب شويه.. بس بتهون

Broccoli_65324 🇪🇬 · Answer

معلش 
مرحله صعبه و شعور صعب لما الواحد يحس بالخذلان من اكتر ناس هو مستني منهم دعم

بس لازم تعرفي بردو انك محتاجه تدي الدعم ده لنفسك لأنك غالبا مش هتلاقيه منهم و ده مش معناه أن في حاجه وحشه أو غلط فيك بس هما للأسف محدش كان حنين عليهم ف طلعوا قياسيين عليكي بردو

Strawberry_65034 🇪🇬 · Answer

استعوضي عند ربنا وادعي كتير ان ربنا يحنن قلبهم عليكي وقربي من ربنا هو الوحيد اللي هيفهمك وطول م انت قريبه من ربنا مش هيسيبك 
حاولي تتكلمي معاهم وتقوليلهم ان دي حاجات بتضايقك وبتزعلك 
طبعا انا فاهمه ان اوقات الاهل بتكون مش فاهمه خالص اولادهم حاسين ب اي 
انا كنت كدا مع بابا بس لما بدأت افهم ان ده تفكيره وعمره م هيتغير وهيفضل شويه كويس وشويه يقلب عليا بقيت اتعامل ب بساطه

Strawberry_65034 🇪🇬 · Answer

انا عارفه ان مش كلنا بنمر ب نفس اللي غيرنا بيمر بيه بس حاولي ترضي نفسك وطبطبي عليها وحبيها وتقبلي فكره ان في ناس ف حياتنا مش هتتغير
انا حسيت بالزعل من كلامك والله لان الحاجات دي فعلاً اوقات
 مبيكونش ليها حل 
وبتطفئ حياتنا كلها وكل ايامنا ربنا معاكي وتقدري تتصرفي

Potato_64725 🇪🇬 · Answer

هو بس هتلاقي بسبب الضغوط بيطلعوا كل دا عليكي بس اقدر اقولك ان هما لما تتجوزي هيبقوا اكتر ناس خايفين عليكي

Popcorn_65217 🇸🇦 · Answer

متكبريش الامور وتبصي لغيرك. كل شخص له منطق مختلف ونظره مختلفه للامور اهلك كمان لهم فكر مختلف سواء كان صح او غلط ف اكيد ليكي مكان ف قلوبهم

Apple_64703 🇪🇬 · Answer

مساء الخير

Ice Cream_65043 🇪🇬 · Answer

ازاي ؟

Ice Cream_65043 🇪🇬 · Answer

الفكره بجد إني حقيقي كنت زي اي طفله محتاجه أهلي يحبوني عادي ويدعموني وده شئ مش صعب ولا مستحيل خالص على اي أهل 
+ الفكره اني ممكن كنت اطلع حاجه كويسه بس هما بيحبوا يتصرفوا على طول بالاسلوب السلبي الصعب

Ice Cream_65043 🇪🇬 · Answer

انا عملت كده وصارحتهم بس هما كده بس اوقات بتصعب عليا نفسي كان نفسي احس بحنيه من أهلي المفروض اللي هما كل حاجه ف حياتي

Banana_64649 🇪🇬 · Answer

بكره تكبرى وتشتغلى ويبقا معاكى فلوس فا تروحى لدكتور نفسى يعالج اللى عمله فيكى اهلك ...مش اد الخلفه متهلفوش كفايه كدا مجتمع مريض

Ice Cream_65043 🇪🇬 · Answer

مش ببص لغيري دي المفروض اللي لاهل يقدموه  لا مش منطق خالص ده مبرر مالوش داعي بصراحه طالما أنا قررت اخلف يبقى لازم اشوف كل احتياجات الطفل مش الماديه بس لا النفسيه اكتر كمان

Ice Cream_65043 🇪🇬 · Answer

فاهمه والله بس حقيقي ده عمره ما كان مبرر حقيقي 
من حقي كطفله احس بالحب من أهلي

Ice Cream_65043 🇪🇬 · Answer

بشتغل الحمدلله 
بس حقيقي أنا تخطيت بس مش قادره انسى كميه القهر

Ice Cream_65043 🇪🇬 · Answer

مش فاهمه ؟

Ice Cream_65043 🇪🇬 · Answer

يارب واياكي يا فرواله

Popcorn_65217 🇸🇦 · Answer

ليكي بيت واسره واب وام وحاجات تانيه ناس غير بتتمناها طالما هما قدموا ٨ من ١٠ دي حاجه يشكروا عليها احساسك انك مش واخده حقك او تقديرك ممكن يكون غير صحيح ولو صحيح ممكن تكون دي عقليتهم لحد كده انهم شايفين انهم مقصروش خلي ملجأك لربنا مش لحد وربنا ييسر الامور لك

Banana_64649 🇪🇬 · Answer

امبارح راح وعدى اللى فى ايدك كل دقيقه جايه من الاخر let it go. throw it away. عشان التفكير فى الماضى فشل فى بكره .تخيلى غزاله بتجرى من اسد مينفعش   باى شكل تبص وراها لانها ممكن تخاف وتتجمد مكانها .ودا اللى انتى بتعمليه كل يوم بالليل .

Broccoli_65324 🇪🇬 · Answer

للأسف هو فعلا شئ صعب
و مفيش حد بيقدر عليه غير الي اتحب بجد 
بس حاولي تحبي نفسك زي م هي تستاهل

و نصيحه بردو تانيه

حياتك مسؤوليتك انتي في الاخر و على قد م الحمله دي مكرره و بتسمعيها كتير بس هي حقيقة فعلا مدوريش على حد تلوميه
اعرفي السبب و ده كفايه و تشتغلي انتي على نفسك

Ice Cream_65043 🇪🇬 · Answer

حقيقي فعلا

Ice Cream_65043 🇪🇬 · Answer

اكيد هحاول

Onion_65329 🇪🇬 · Answer

صعب تتخطي تصرفاتهم بس لازم تتعلمي تتعاملي معاهم ازاي حتى لو هما مؤذيين لازم انتي ده ميأثرش فيكي خالص يبقى هوا، طبعا ده صعب بس انتي متقدريش تتحكمي في افعالهم بس تقدري تتحكمي في رد فعلك ونظرتك للموضوع

Pineapple_65331 🇪🇬 · Answer

بكره ربنا يرزقك بين الحلال وتتجوزى وسعتها هاتتمنى ساعه وحده تقعدى فيها مع أهلك إلى بيضيقوك

Ice Cream_65043 🇪🇬 · Answer

يارب بس مش عارفه كلامك مش عاجبني نوعا ما

Popcorn_65217 🇸🇦 · Answer

يمكن عشان بتكلم من وجهه نظري كأب متغرب بعيد عن اولاده مش قادر يقدم لهم انه يكون جمبهم وقت ما هم محتاجينه لاني مش هلاقي اعيشهم لو كنت جمبهم او يمكن لاني ف وقت كنت حاسس ان ابويا بيضربني ع اسباب بسيطه وقبل ما يتوفى شوفت ف عينه انه ابني مش ابويا يمكن لان امي ست بسيطه وكانت فاهمه ان التربيه هي الاكل والشرب واللبس والتأديب وقت الغلط بس هم اغلى عندي من الدنيا

Pineapple_55595 🇪🇬 · Answer

الموضوع صعب اكييد عليكي 
انتي متستنيش دعم من حد ومتفكريش في اي حاجه تدايقك
خليكي انتي الداعم لنفسك
 ...ومتخليش كلامهم يحبطك خليه حافز ليكي انك تكوني احسن واقوي وانجح
و برضوا ده ميمنعش انك تكلمي معاهم 
وتعريفهم ايه اللي بيدايقك 
هما بالنسبلهم ده هزار وبقي عاده 
ف اللفتي نظهرهم