عشت طول عمري حاسة إن فيه حاجة غلط في بيتنا. ليا أب كأنه مش موجود، قبل ما يسيب البيت ويتجوز مرة واتنين - معرفش بقوا كام دلوقتي-، وأم "ضحية" الظروف مبتغلطش أبدا. عشت ٣٣ سنة من عمري مقتنعة إن العلاقة بين أبويا وأمي دي العلاقة الطبيعية، فمنطقي رفضت إني ارتبطت عاطفيا بأي حد. لحد ما اكتشفت إن أمي نرجسية خفية وأبويا نرجسي ظاهر! كانت صدمة. بقالي سنتين في رحلة تعافي. لجأت لمشيرة، وبعدها لمعالجين نفسيين وورش دعم. مكنتش فاهمة إني اتحرمت من طفولتي من الحب الصحي. معرفوش. عشت طول عمري معزولة. ويوم ما فهمت، قررت إن حقي إني أعيش اللي باقي من عمري مع حد بيعرف "يحب". بس المشكلة إني مش بعرف. مش بعرف أدخل في علاقات أصلا. العلاقة الوحيدة اللي دخلتها بمعجزة، وأنا عندي ٣٥ سنة، كانت مع نرجسي. وبالرغم إني أكتشفته بدري - ما أنا أضطريت أقرأ كتير عن الموضوع ـ إلا إني مكنتش عايزة أسيبه لأني عارفة نفسي، مش بعرف أدخل في علاقات. بس سيبته، بعد شهر ورجعتله تاني كان من شدة الألم وأنا عارفة إنه ده قرار غلط. مكنتش عملاله بلوك، فرجع يكلمني تاني. قعدت شهر، وما أستحملتش، فروحت نهيت معاه والمرة دي عملتله بلوك. عارفة إنها كانت رابطة صدمة وتعلق، كنت واعية، بس أنا عارفة إن عندي مشكلة في إني أدخل علاقة. مش بعرف. دلوقتي أنا مستمرة في البلوك بقالي ١٢ يوم، بالرغم من الألم والحنين والصوت اللي عايز يفك البلوك والخوف من مجهول إني أرجع وحيدة تاني، بعد ما عشت طول عمري وحيدة. أنا مش عارفة العلاقات الصحية دي الناس بتكونها إزاي. أنا مش عارفة أنا بدي إشارات رفض مثلا؟ جروح الطفولة بتظهر عليا في تصرفاتي؟ أنا ليه حاسة إن عمري ما حعرف ألاقي حد بيعرف يحب حقيقي؟ أنا عالجت مشكلة إحساسي أني "مستهلش الحب". بس حقيقي مش عارفة ليه حقي في أكمل حياتي مع شخص سوي حاجة مش بتحصل لي خالص. الكلام كله على حبي نفسك، وأفرحي بنفسك وبلابلابلا... بس طيب ما أنا طول عمري مع نفسي. إيه الجديد؟ يعني حتى بعد ما بدأت مشوار التعافي، برضو مطلوب مني إني أبقى وحيدة برضو.

1

3