كنت زمان بدور على الحب… كنت فاكر إن وجود حد يحبك بصدق ممكن يغيّر الدنيا، يطفي وجعك، ويخلّي الأيام ليها معنى. كنت بدور على الإحساس اللي يخلي قلبي يهدى بعد كل خذلان، كنت بدوّر على حضن أرتاح فيه من تعب الدنيا. بس مع الوقت، اكتشفت إن الحب مش دايمًا أمان… أوقات بيكون أكتر حاجة توجعك. لما تدي من قلبك، وتصدق، وتلاقي نفسك في الآخر واقف لوحدك، بتحاسب نفسك إنك كنت صادق زيادة، وإنك حبيت بضمير غلط الزمن مش فاهمه. دلوقتي بقيت ببعد عن أي بنت ممكن تحبني… مش عشان كره أو غرور، بس عشان خلاص، ما بقاش عندي استعداد أعيش نفس الفيلم تاني. مش عايز أظلم حد بخوفي، ولا أظلم نفسي بالتكرار. بقيت بصدّ كل تقرّب، يمكن لأن قلبي تعب، أو يمكن لأن فكرة الحب نفسها بقت وجع أكتر من الوحدة. مش بقول إني بقيت حجر، بالعكس… أنا حاسس أكتر من زمان، بس الفرق إني بقيت أخاف من اللي بحسّه. وجعي علّمني إن مش كل بداية جديدة معناها فرصة، ساعات بتكون باب وجع جديد. عشان كده… ببعد، وأسكت، وأسيب الأيام تعدي، يمكن في يوم أرجع أصدق في الحب تاني… بس مش دلوقتي.

3

2