جماعة الله لا يحط حد فيكم مكاني أبداً.. أنا حكايتي طويلة أوي بس هجيب لكم المختصر عالآخر .. المرة الأولى و الوحيدة ولا عمري قبلها كلمت بنت أعرف واحدة من ٦ سنين من لما كنا في ٣ ثانوي بالصدفة قدمت لها مساعدة كبيرة يعني وقت صعب ظهر فيه معدننا الحقيقي و سندنا على بعض و بعدها بسنة حبينا بعض ٥ سنين عشرة عمر بحلوهم و حتى مرّهم يحلى جنب بعض ولو زعلنا نتصالح و نرجع أقوى ورغم إن أي حد ممكن يشوفها عادية و فيه منها بس عندي جواها أبيض و مفيش ست ولدت زيها حتى على عيوبها مهم حكيت لكم يا جماعة مش هعبر عن مدى اللي وصلنا له ... المهم جيت اتقدم لها من ٨ شهور و صارحت أهلي لإنهم عارفين إني بكلم واحدة المهم رفضوا في الأول و بعدين وافقوا و روحت أنا و أبويا و أمي و أختي نتقدم و أمي رايحة مغصوبة .. المهم ضيفونا و أكلونا و رؤية شرعية و روحنا و سألوا علينا إحنا من نفس المحافظة بس بعيد عن بعض المهم وافقوا و راح أبويا و خد عمي معاه يتفق و هي والدها متوفي ف حاضر أخوها الكبير و معاه اعمامه اخوان أبوه المهم اعمامه كان اسلوبهم قليل الذوق و طلباتهم مبالغ فيها و أبويا فضل يوافق يوافق لحد ما رفض في الآخر لما زهق منهم وطول الفترة دي بدور على حل لحد ما أخوها وافق على اللي أبويا كان قايل عليه و كمان مش هيحضر اعمامه دول تاني لكن أبويا اتقفل منه و من اعمامه وبصراحة أبويا معاه حق لكن إصراره على الرفض ده حرام ممكن يدي فرصة تانية بس هو خايف لاتمسك بهم بعد كده و ميعرفش يفسخ الخطوبة لأي سبب و دورت لما عرفت كبير العيلة بتاعهم راجل محترم لكن أبويا بردو رفض يكلمه مرة تانية و البنت عمالة ترفض العرسان من بره بره و أنا على تواصل معاها و مع اختها الكبيرة لحد ما خلاص اختها قالتلي متكلمهاش و بالفعل مكلمتهاش و أبويا لسه رافض .. كده خلاص تقريباً كل حاجة انتهت قبل العيد ده لكني كنت مصدوم و كنت مصمم إن لأ مش هسيبها بردو و لسه هحاول وعديت العيد و دبحت و أكلت معاهم علشان منكدش عليهم لكن مستحملتش و تاني يوم العيد دخلت في إضراب عن الطعام والشراب و اتفاجئت بمكالمة منها و هي بتعيط و دعت علينا (يارب يجيلكم واحدة أهلها حلوين بس هي بقى توريكم الويل) و دعت على أبويا دعوة وحشة أوووي (يارب زي ما بيصعبها ربنا يصعب عليه سكرات الموت) أنا اتصدمت صدمة عمري الكلام ده طالع من مين و لمين الدعوة دي أنا مدعيهاش على كان من كان صعبة أوي تخيل أما حد ميطلعش منه كده و تسمع منه دعوة دي على أبوك اللي مهما كان رباك و ضهرك في الدنيا و لحم اكتافك من خيره ده أنا مكنتش ناوي أتخلى عنها و هعافر بأسناني لما تتكسر و إيديا لما تتقطع و أمشيلها حافي بلاد بس أوصل ولو موصلتش أنا مؤمن بربنا و هي مش رزقي لكن كانت هتفضل لها كل الإحترام و الدعوات في صلاتي وقسما بالله كان في دماغي لو اتجوزت و اتطلقت لأتجوزها وما أتجوز غيرها لإني مش قادر استغنى و الحاجة اللي كانت بتيجي عليا أنا كنت بعديها معلش لكن ده أبويا !! ده أنا كنت بطلع صدقة جارية على روح أبوها و أدعيله بالرحمة في صلاتي و الأوقات المفترجة وأنا معرفهوش و زعلت لما نسيت تاريخ وفاته و مكنتش جنبها الذكرى اللي فاتت وكنت شغال و مريض !! كلمتني تاني و مكنش ليا أرد عليها بس رديت لتعمل في نفسها حاجة وحشة و قالتلي أنا مش وحشة بس مش قادر اسامحها اتحول اضرابي عن الأكل لعقاب لنفسي علشان حبيت و علشان مش متحمل كل ده وقت واحد و رجعت أكلت تاني علشان أمي تاكل و دلوقت عدت أيام بسيطة و أنا لسه مصدوم و مكتئب و مش عارف ليه كده و لسه كل ده و هعالج ده إزاي و هرجع طبيعي إزاي تاني و اعمل إنسان و خلاص على كده بقى ؟!!! خلاص كده خلصت !! هما في البيت فاهمين إني لسه عايزها وأنا مقاطع أبويا ومش بروح معاه الشغل ميعرفوش إن أنا حتى لو وافقوا مش هوافق أتجوزها تاني خلاص .مكنتش أتخيل ده يحصل .. هل أنا مكبر الموضوع ؟ هل عادي إن الوجع يدفع الإنسان يقول الدعاء الوحش ده .. مع العلم إن أخوها اللي ربنا ينتقم منه هو السبب في كل ده و محاولش يصلح غلطه رغم إني روحتله و قعدت معاه و أحرجته قدام نفسه . أنا آسف لو طولت عليكم بس بجد مش طايق أحكي لحد و بيدور في دماغي حاجات كتيركده زي إني حتى لو اتجوزت تاني مش هتجوز من فلوس أبويا و هستنى لما أكون نفسي بنفسي و ده هياخد سنين وأنا كان عندي أمل أعف نفسي بالجوازة دي عن معاصي السر .. و إني أحب تاني !! بس صعب و ممكن بس مش دلوقت بظروفها ربنا يعوضني بغيرها .. أو أسافر أعيش بره ولا أكمل هنا علشان أخواتي البنات أنا وحيدهم .. طب أعرف بنات كتير و أقضيها و الكلام العبيط ده .. وعندي آخر هدايا جابتها هاي كول و مج حراري و محفظة لسه مش مستعملهم أرجعهم ولا ملوش لزوم أصلا أحتك بها .. و صورها عندي ملايين الصور لها في كل التطبيقات هل اجمعهم و أشيلهم في كارت بعيد عن الفون علشان متجيش قدامي كل شوية و محدش يزايد عليا و يقولي امسحهم أنا أعصابي مش عايزة تمسحهم زي ما تكون هترجع بمعجزة تاني بس ربنا يحكم في أمري بقى .. كل دي وساوس في دماغي بجد آسف أنا طولت 😓😓😓

4

28