انا عندي مشكلة غير مألوفة واعتقد مفيش حد بيعاني المشكلة دي إلا أنا ، انا بنت يعتبر في بداية حياتي وتقريبا عندي كل حاجه بس في حاجه واحده بس هي اللي ناقصاني واللي مخلية حياتي جحيم كل يوم ، انا عندي مرض موجود عند ناس كتير جدا جدا بس اعراضي هي اللي بتخليني الوحيده في العالم .. مبدأيا كده انا عند حساسية انف شديدة شديدة مزمنه والتهاب ملتحمه تحسسي شديد مزمن ف بعاني من اعراض الحساسية الكلاسيكية ودي بقدر اتعامل معاهاانما في عرَض اضافي عندي هو اللي بيخلي حالتي الوحيده من نوعها وهو تورم الوجه ، كل يوم بصحى ببص في المراية مش بعرف نفسي تقريبا .. شكلي بيكون كاني انسانه تانية خالص .. قبيحه جدا جدا .. جفوني بتكون وارمه جدا اللي بيخلي فكره اني افضل فاتحه عيني مؤلمة ومتعبة وأنفي بيتورم بطريقه بتغير شكل انفي الاصلي ٣٦٠ درجه واللي برضه بيخلي التنفس مؤلم وغير مريح بالمرة و والتورم طبعا بيخليني قبيحه جدا وبيخليني مش أنا ، مهما وصفت قد ايه التورم بيأثر على شكلي محدش هيتخيل الواقع .. ورم وشي مش كفاية انه يوقفني عن انشطه الحياه لا بقدر اعملها .. بس بعملها وانا مقهورة لاني في الاخر بنت وبيكون نفسي ابقى زي بقيت البنات وابص في المراية بدل ما اهرب منها واحط مكياج والبس لبس حلو واخرج وابص للناس في عينيهم .. انا اوقات بدرك اني بدأت نوعا ما انسى ملامح ناس بتعامل معاهم من كتر ما مش بقدر احط عيني في عيني حد .. عايزة استخبى وادفن نفسي بالحيا من كتر ما بكره شكلي لدرجة فكرت البس النقاب لمجرد السبب ده ! .. التورم في وجهي بيتحسن على نهاية اليوم بس بكون داخلة انام تاني عشان اصحى بنفس الشكل المقزز .. وطبعا التحسن للتورم بيكون بطئ جدا .. مش لياخد ساعه او اتنين او تلاته .. لا اكتر من كده بكتير عشان اقدر ابص لنفسي في المراية منغير ما انهار وحتى في نهاية اليوم عمر ما التورم بيروح بنسبة مية في المية .. بيفضل موجود بس بنسبة أقل ... طبعا جربت اي دوا واي بخاخه وقطرة ممكن اي حد يفكر فيها واي فيتامين واي دكتور انا عملت كل حاجه حرفيا .. من وانا عندي عشر سنين وانا بكره نفسي جدا ومن وقتها وانا بحاول الاقي علاج او دوا او اي حل في الدنيا ولحد دلوقتي مفيش حاجه بتساعد ولو واحد في المية حتى .. انا وحيده اوي ومحدش حاسس بيا عشان محدش جرب بفضل اسأل نفسي اشمعنى انا ما كل الناس شكلها حلو ومقبول ليه انا شكلي مقزز للدرجه .. كل اللي بتمناه من ربنا انه يشفيني لاني معتقدش هقدر اعيش بالشكل ده اكتر من كده .

6

20