كان عندي مشكلة في فهم الإنسان بيستنى التقدير لشخصه من الناس ولا هو المفروض يقدر نفسه ويحط معايير للناس من خلالها تقدرة.. الحقيقة ان الناس بتشوفك من خلال نظرتك لنفسك والطريقة الى بتعبر بيها عن شخصيتك محدش هيدخل جواك ويكتشفك الناس بتصدق الى بتشوفة بس اكيد لازم يكون تقديرك لنفسك حقيقي مش مجرد قشرة من برا.. كنت زمان بتكسف أطلب حقي ظنا ان الى قدامى هيقدر دا لكن الحقيقة كل ما بتتنازل الناس بتتهاون في حقك.. وتنازلك ليهم هيبقى حق مكتسب بل انه ممكن في وقت يتقالك انت معملتش حاجة او اصلا محدش طلب منك حاجة .. كنت بقدم اكتر باخد رغم انى بنت بس كان عندي عطاء مفرط لأى حد بس اتعلمت أدى لكن للناس الى تستحق ولو حتى اديت لحد مايستحقش يبقى من باب انى عايزة اخد ثواب مش أكتر .. اتعلمت ان محدش هيجي يديني حقي ولا هيحققلى رغباتى طول ماهى جوايا.. اتعلمت مقبلش بأقل من الى استحقه حتى لو اتشاف انى كدا مغرورة.. معياري دايما ان ربنا شايف قلبي وهو بس الى فاهمنى.. وانا صغيرة كان عندى شعور انى متحبتش حب كفاية لسه جوايا فاضي متملاش حب عوضت دا بعالم خيالى بنيته في أحلامى يمكن دا الى خلانى اعرف اكمل هناك اتحبيت واتقدرت وعيشت كل المشاعر الى مشوفتهاش في الواقع .. الواقع كان فيه حب بس حب متغلف بضغط وقالب مقاييس مطلوب منك تتشكل جواه وإلا مش هتتحب النهاردة.. الحب كان مشروط الابتسامة في وشك ونظرة الرضا كانت مشروطة .. كنت طفل مسكين محتاج بس انهم يضحكوا في وشك عشان تحس انك في أمان مجرد م كانوا بيكشروا كنت بتحس انك حياتك في خطر.. عشان كدا لما كبرت اتعلمت انى استحق اتحب قولت لنفسي ليه مقدرش احول عالم أحلامى للواقع بتاعى ليه مقابلش الناس الى حبتني في خيالى مين قال انهم مش موجودين؟؟ ساعات بحس انى مجنونة وساعات بحس ان المشاعر الى رنبا حطها في قلبي لشئ خيالى دى ممكن تكون إشارة انه موجود... كل حاجة بتحصلى في حياتى بتخليني اصدق انه موجود كل حاجة بتتعقد اكتر وبتصعب اكتر والوقت بيطول اكتر .. كركبة ولغبطة غير مبررة .. كل ما بحاول اندمج مع الواقع واتقبل معايير الناس في الاختيار حاجة بتخليني ابعد.. وانا صغيرة اتعلمت اخاف من عقلى وان عقلى ممكن يوديني في داهية وخليني امشي بأفكار الكبار الى عندهم خبرة يمكن عندي المشكلة دى لحد النهاردة لانى لسه بسمع الكلمتين دول.. بس لأول مرة بحس انى اتحررت من كل خوفي وانى مش مستنة تقبل الأخر ليا .. انا مستنية العالم بتاعى يتشكل زي ماانا حساه في قلبي.. الحقيقة ان الاحلام مش بعيدة عن الواقع فيه حاجات كتير دخلتها أحلامك وهى اصلا كانت من الواقع وحاجات بتشوفها في أحلامك عشان تصدق بعد كدا انها هتكون واقع.. انت بس محتاج تجهز نفسك تعرف انت مين تكون حاطط معايير لشخصك ولإختيارتك متمشيش بدماغ حد امشي بدماغك حتى لو هتتشاف غريب لان دى قصتك انت.. هتتشاف ازاى دا قرارك مين هيقرب منك ويدخل دايرتك دا قرارك.. انك تكسر قاعدة العرف وتمشي بأحكام ربنا وبس انك تصدق في نفسك وتصدق انك مش مضطر تكون شبههم كفاية تعيش تجربتك بطريقتك وتقديرك لنفسك وقتها واخيرا هتتحب من الناس الصح

2

3