بخون نفسي ووقعت ضحية وحياتي بتتحكم فيا

Carrot_52708 🇪🇬

منذ 7 ساعات

شعور مكسور القلب

بخون نفسي لما أفضّل أقعد في شغل بيمص روحي وأنا عارف إنه بيهلكني. وبخونها لما أحن لزميلة طلعت بتبيع أسراري للمدير من ورا ضهري. وبخونها كمان لما أدي ثقتي للي كسّرني، كإن الوجع ماكانش درس كفاية. وخنتها أكتر لما طلّعت نفسي ضحية… حساس وخواف، وسايب الدنيا تتحكم فيا.

غيابي ممكن يكون هدية وأنا مش ضحية

زمان كنت فاكر إن الدنيا ظالماني، وإن الناس بتبعد عني عشان أنا منحوس أو عشان ربنا بيحميني منهم. بس مؤخرًا ابتديت أبص للموضوع من زاوية تانية: يمكن مش أنا اللي اتشلت من حياتهم لمصلحتي بس، يمكن كمان ربنا شالني من حياتهم لمصلحتهم هما. أنا مش عاوز أكون نقطة سودا في حياة أي حد. مش عاوز أبقى سبب في وجع أو تعاسة حد، حتى لو من غير قصد. ساعات بنكون مركزين أوي في وجعنا وإحنا اللي خسرنا، وبننسى إن وجودنا ممكن يكون تقيل عليهم أو معطّلهم، مش لأننا أوحش ناس، لكن ببساطة عشان مش مكاننا معاهم. الفكرة دي علمتني التواضع. بقت تخليني أبص للموضوع من منظور أوسع. مش لازم أبص لنفسي دايمًا على إني ضحية. أوقات غيابي بيكون راحة لغيري، بيكون فرصة ليهم إنهم يلاقوا طريقهم أو ياخدوا نفس. بقيت أقول لنفسي: "مش مهم ليه مشيت… المهم إن وجودي مايبقاش سبب في ضلمة لحد." ساعات الرحيل بيكون أصدق من البقاء. ساعات البُعد بيكون نوع من الحب… لأنك بتسيب غيرك يعيش حياته من غير ما تسرق منه النور. فالنهارده، بدل ما أسأل "ليه سابوني؟"، بقول "يمكن أنا ماكنتش المفروض أكمّل معاهم." وده مش ضعف… ده وعي إن مش كل وجود في حياة حد لازم يستمر، وأوقات غيابك بيكون أعظم هدية. ...عرض المزيد

0 الدعم

2 نصيحة

اكتشفت إنه تعلق مرضي مش حب.. واخترت أبني

يمكن لما حكيت لها عن نفسي، وقلت إني خريج كلية كويسة، وبعافر كل يوم عشان أصرف على بيتي وأمي وأبويا، حسيت إن ده قربني منها. يمكن شافت فيا إنسان صادق وبيكافح رغم الظروف. بس مع الوقت اكتشفت إن اللي كان جوايا مش حب ناضج زي ما كنت متصور… كان تعلق. التعلق ساعات بيبقى زي قيد يخليك مش عارف تشوف حياتك من غير وجود الشخص ده. وأنا لما ابتديت أبص بجد لمستقبلي، حسيت إن ده مش صح. لقيت نفسي متعلّق بيها تعلق مرضي، مش بيبنيني، بالعكس بيخليني واقف في مكاني. ومعرفش نيتها إيه. يمكن كانت شايفاني مجرد زميل بيشارك همومه، ويمكن كانت متأكدة من مشاعري وسايبة الموضوع يعدي من غير رد. الحقيقة إن الإجابة عندها، مش عندي. وأنا مش عاوز أفضل أدوّر في نيتها ولا أعلق نفسي بحاجة مش واضحة. أنا مش عاوز أكون نقطة سودا في حياة حد، ولا أبقى سبب في وجع إنسانة تستحق تفرح وتعيش حياتها. يمكن أنا مكنتش مناسب ليها، ويمكن هي مكنتش مناسبة لظروفي. ربنا أدرى بلي يصلح لينا إحنا الاتنين. عشان كده بقول: يا رب أنساها. مش من قسوة، لكن من رحمة. يا رب تفتح لي باب لمستقبل أوضح، وحياة أبني فيها نفسي بجد. لأن الحب الحقيقي بيبني، لكن التعلق المرضي بيهدم… وأنا اخترت أبني. ...عرض المزيد

3 الدعم

2 نصيحة