انا يمكن اكتر حاجة عجباني هنا ان محدش عارف انا مين عارف اكتب اي حاجة انا عايزها براحتي من غير ما حد يحكم عليا ولا حد يقول طب مانا جمبه مكلمنيش ليه او حد يشوف اللي هكتبه من اللي اعرفهم فا يدخل يكلمني.. انا ببقى نفسي اقولهم انا مبحبش شعور اني ابقى صعبان على حد او حد يشفق عليا يا جماعة انا كويس بس انا ببقى عايز افضفض من غير ما حد يحكم عليا ... بس الفكرة انكوا حتى لو سمعتوا اللي جوايا او اللي انا حاسه حاجة من اتنين يا اما هتدخلوا ف جو نصايح وانا مش عايز يا اما هتتقصموا او هتبدأوا تحكموا عليا احكام مش صحيحة و مش حقيقية .. فاحنا خلينا من بعيد ل بعيد كدة احسن بنتكلم و نضحك و نهزر بلاش كلام جد بحتاج ونس اكيد طبعا محدش بيحب يكون لوحده بيحب يلاقي حد يشاركه يومه و همومه و افكاره بس انا مش هاخد حد من حياته عشان يبقى ونس ليا .. اللي عايز هيبقى موجود من غير ما اطلبه القعدة لوحدي مؤخرا كل مادا ما بتبقى مش الطف حاجة انك تيجي ف اخر اليوم يا مشغل حاجة عاملة صدا لمجرد ان يبقى في صوت شغال او اتفرج على حاجة عشان مفضلش باصص للسقف لحد ما انام جماعة لو عندكوا اهل .. اب او ام اشبعوا منهم قبل ما تصحوا ف يوم متلاقوش حد فيهم بجد هما بس اللي بيهتموا بجد .. انا هنا بتكلم على الاهل السوية نفسيا مش حد تاني حاجة اخيره انا ابويا و امي وحشوني اوي رحمة الله عليهم

5

3