أنا حاسة إني كل يوم ببقى مضايقة أكتر من اللي قبله. بقعد وسط شلة صحابي، كلهم في سني، وكلهم يا إما علمي رياضة، يا صنايع، أو حتى علمي علوم بس بيحبوا الرياضة وبيفهموا فيها. بحس إن دماغهم أنضف مني، وإنهم أذكى وأشطر، حتى وهم مش بيذاكروا كتير، بيفهموا بسرعة وبيربطوا المعلومات ببعض. أما أنا، فبصراحة، كل شوية بسأل نفسي: "أنا فيا إيه؟ إيه الميزة اللي عندي؟" زمان وسط عيلتي، كنت دايمًا المتفوقة، اللي الكل بيتكلم عنها. إنما دلوقتي، وسط الناس دول، أنا مش شايفة أي حاجة تميزني، وكل يوم إحساسي بقلّ. ومعلش يعني، محدش يجي يقولي: "كل واحد فينا ليه مميزاته" والكلام اللي بنسمعه ده، عشان أنا بجد مش حاسة بكده. حسيت إنهم بيعرفوا يعملوا كل حاجة، وأنا لأ. يمكن الحاجة الوحيدة اللي لسه مدياني إحساس إن ليا قيمة، إني أحلى منهم من ناحية الشكل، جسمي، لبسي، ستايلي... بس برضو، هو ده كفاية؟ أنا مش عارفة أجاوب.

4

18