هل كنت في علاقة سامه قبل كدا؟

Question

احكلينا تجربتك مع علاقة سامه مريت بيها قبل كدا واية الريد فلاجز اللي عرفتك ان دية علاقة سامة

Apple_38269 🇪🇬 · Answer

ايوا دخلت العلاقة دي بعد ما كسرت مبدأي اني مدخلش في علاقات ابداً بس سبحان الله اتعلمت درس كبير اوي من بعدها مكررتهاش تاني واستفدت خبرات كتير اوي تخليني اتجنب اي حد ممكن يضحك عليا بكلمتين
القصة كالآتي :
كنا في جروب مشترك في احد مواقع التواصل الاجتماعي والشخص دا دخل كلمني وفضل يتحايل نتكلم المهم كنت واضحة من البداية اني مليش في الكلام دا وان هدفي عموماً  يكون الشخص فعلاً جاد ناوي على استقرار وزواج غير كدا لا ففضل يفرش الارض ورد بعد فتره قالي انه كلم والدته عليا وهيجي يتقدم وعشان يطمني اكتر خلاها تتكلم معايا فعلاً كان كويس يعني بعدها بدأ يتغير خالص بمعنى اصح كان بيحاول يكرهني فيه عشان يطفشني ويخلع بس انا مكنتش فاهمه دا كنت معمية عشان حبيته،  كان مثلا يزعقلي بصوت عالي او مثلاً يتعمد يقول الفاظ مش كويسة بحجة ان دي لغة الشباب عادي او يفضل يبعت ريلز مش كويسة ع اساس بتضحك وكدا وصلت بيه بقى ان لما اتخانقنا مره خناقة كبيرة قالي خلينا صحاب احسن كذا مره يقولها بعد كل مشكلة بس المرادي طول اوي ممكن توصل لشهور ميتكلمش بعدها دخلت صدفة على موقع معين اتصدمت انه مبلكني سألته ليه اتهرب وفضل يزعق وانه براحته يعني انا مالي،  بحثت من فون تاني لقيته ارتبط ببنت تانية اصلا 
عاتبته بعدين بلكته علطول عدى سنة وكام شهر بقلب في المسدجات عادي لقيته باعت مسدجات من زمان اوي شوفتها ومسحتها بعدها بكام شهر رجع تاني بعتلي رديت بكل برود الارض كانه غريب معرفوش قعد يعتذر وسامحيني رديت اني مسمحاه عادي عشان يرتاح ويبعد بس انا مش مسمحاه اصلاً ولا عمري هسامح اي حد يضحك على الناس ويبقى زي الشيطان بيلعب بمشاعرهم وفاكرها حاجة تافهه المهم انا كويسة حالياً مقربة من ربنا ومبسوطه وعايشة حياتي كويس واتعلمت كتير وعمري ما كررت الغلط دا تاني ولحد دلوقتي مش هتنازل ابداً عن مبادئي تاني، ايوا معظم الدروس اللي ربنا بيعلمهلنا بتبقى صعبة وبتكسرنا احياناً من شدتها ولكن الانسان لازم يتكسر مره عشان يبقى واعي وقوى ويعرف ازاي يستخدم عقله مش عواطفه كل شوية وانه يسند نفسه ويعرف قيمتها وان اللي يفرط في كرامتنا ميستاهلش دمعه واحدة تنزل عشانه♥️واخر حاجة بلاش توثقوا في حد بيرمي كلام وخلاص الكلام مفيش اسهل منه لكن الفعل اللي بيبين عايز تعرف اللي بيحبك يعمل عشانك غير كدا حجج وكلام فارغ اللي عايز هيوصل، بالذات البنات اللي يقولك حجة استني اكون نفسي وظروفي متسمحليش دلوقتي اقفي جمبي يا حبيبتي ظروفه وحشة يروح يكلم والدك راجل لراجل ويقوله استنى عليا فترة انا عايزها وشاريها غير كدا واخدك تسلية او حتى لو بيحبك مش هيعوزك تاخدي ذنوب وتبقى العلاقة مش مبروكة اصلا وهتتفشكل كدا كدا فبلااااش تصدقي اي حجج ان ماجاش قعد مع والدك يبقى كله في الهوا✨ حتى لو خلاكي تكلمي اهله هما مش الصحابة يعني 😂😂😂

Watermelon_28768 🇪🇬 · Answer

طبعاً 
احنا الاتنين ماكناش شبه بعض و انا حبيته و قلت اكيد الفرق مش كبير كده مش عارفه عميت نفسي ولا  … و هو كان شايف بس قال يجرب و للأسف احنا كنا حمل علي قلوب بعض 
ربنا يعوضني 
و بعوضه والله هو برضو لقي رفض من اهلي حتي لو كان متوقعه فا هو صعب في كل الاحوال

Strawberry_45453 🇪🇬 · Answer

انا مش عارفه ان كانت سامه ولا لا بس انا مش مرتاحه ومش مبسوطه ودايما خناق يا مابنتكلمش هو كان بيسافر شغل ف بنبقي حد تاني لكن وجوده ف البيت صعب هو معايا حاجه وعلي التلفون حاجه تانيه مافيش بينا لغه حوار يمكن موضوع شغله ده هو اللي بعدو لان كان يغيب بالاسبوع باليومين والتلاته من غير اتصال ولا حتي نتكلم بسبب منطقه الشغل والشبكه وهو لا مايعرفش حد ومش متجوز عليا ومش كل الكلام ده بس هو بني ادم غامض وكتوووم انا مش كده اوقات بحس اني غريبه عنه مابيقدرش مشاعري ولا بيحترم قراراتي واتكلمت كتير ف الموضوع مع اني حبيته ومحدش غيري واقف معاه ودايما بساعده وبشيل عنه حسيته اتعود علي انو يرمي الحمل عليا وانا تعبت نفسي احس اني بني ادمه ليها مشاعر وقيمه وتقدير واهتمام 💔💔💔💔وعندنا ولدين هو مقصر في حقي انا في كل حاجه من مشاعر من كلام من انو يحسسني اني مسؤله منه من كل حاجه انا بعملها لنفسي 😭💔اتكلمت بدل المره ميه واتخانقنا كتير وكل مره يبقي نفس الكلام هتغير واسف وحقك عليا يومين يبقي حد تاني ومره وحده يرجع لطبعه هو هو 😭💔

Strawberry_38564 🇪🇬 · Answer

هو جار صاحبتي و كان زميلها في الدروس و اما شافها منزلالي  استوري  فضل يزن عليها انوا يكلمني و كدا ف قالتلوا هيه مش بتاعة كلام شباب و كدا ف قالها مش ناوي يدخل تسالي  الي هو هنتكلم بس شهر بالكتير و لو انا و هو تمام هيتقدملي و انوا الظروف معاه مظبوطه و كدا ف قالتلوا انت خلصت جامعه بس فاضلك الجيش قالها عادي  اخطب و انا في الجيش مش مشكله و انتي  عارفه انوا احنا  مستوانا المادي كويس و انوا انا بشتغل و الدنيا تمام 
المهم احنا  اتكلمنا و حبيتوا و الدنيا كانت زي  الفل و بقى يتحجج انوا اخوه الاكبر منوا مخطبش لما يخطب  طيب  انا اهلي  مش هينفع لا بصي لو انا خلصت جيش و هو مخطبش هتقدملك و هو بقى مع نفسوا و خلص  جيش و رجعة الحجه القديمه تاني  اما اخوه يخططب  
طيب عرفني  ع اهلك. انا قولتلهم عليكي  بس قالوا مش هيكلموكي الا لما ااجي اتقدملك 
طيب يااابني كلم انت اخويا و قولولوا انوا انت بتحبني و انا هصبر عليك يقولي  لا مينفعش  ….. 
فضلنا ع الوضع دا فتره كبيره لحد ما بدأ يسحب مني فلوس  و بقى يهملني   و لو اعترضت ابقى مش بقدر ظروفوا و انوا الدنيا مزنقه معاه و حورات كتير بقى 
ف قررت اتسحب  من العلاقه دي  علشان جبت اخري

Mango_45547 🇪🇬 · Answer

كنت صغيره ف أولي جامعه عمري ما كلمت حد لحد ما قبلته كان طفل زياده عن اللزوم وانا كنت قويه معرفش لي كلمته اليوم دا بس اتكلمنا طول مسافه القطر اللي خلصت ثواني اول مره اعرف ازي احب حد اول مره ااقدم الاهتمام دا لحد مع الوقت بقيت انا الأضعف وكأنه اخد هو كل قوتي بقت العلاقه عباره عني اني بكذب ع حاجات هايفه مش المفروض اكذب عليها بس لمجرد اني خايفه يمشي وف يوم قرر يمشي من غير حتي ما افهم ف اي بعد عياط كتير اكتشفت أن سمع عني كلمه من حد وصدقها وقررت انسي مع مرور الوقت رجعت القويه من تاني وهو رجع أضعف بكتير عن الاول اول مره اعرف من بعيد ازي متكونش شايف من قريب وازي المرايه بتبقي عاميه بعدت وحاول كتير يرجع بس كل مره كنت بدي فرصه كنت بلاقي نفسي ف قربه أضعف وهو اقوي بعدت واتحبيت بنفس الحب اللي كنت بحبه وكان ربنا بيقولي انتي تستاهلي حد احسن علشان نيتك واتجوزت بس عمري ما عرفت انسي لسه براقب من بعيد مع اني متاكده أن هو اكتر حد سام ف الكون واني مش ندمانه ع بعدي بس محدش بيحب مره بجد وعمره بيعرف ينسي

Croissant_45848 🇪🇬 · Answer

حبيته من اول نظره حرفيا كان روحى اتعلقت بي وهو نفس الحوار اسبوع بندور ع بعض ع الفيس وصلتله انا الاول. قالى كنت مستنيكى كنت اول حب ف حياته انا حبيته حب رهيب6 سنين أهله ماوفقوش بيا حاولنا كتير أو كان مفهمنى كدا لاسف زهق بس مبعدش عنى أو انا كان صعب ابعد خطب وانا جمبه اجوز وانا جمبه وخلف وانا جمبه يبعد ويقرب احساس أن هيموتنى من الذمب والغيره والوجع وخصوصا أن خطب صحبتى كنت بموت حرفيا روحت لدكتور نفسي سنه بحاول وهو مازال رابطنى جمبه لحد متخطبت لشخص محترم فتره خطوبتى كنت بضعفله بس شخص تانى كان كويس جدا وعارف حكايتى وبيحبنى اتجوزنا ومن وقتها وانا قطعته ومهما حاول يوصلى بقفل طريقه حبيت جوزى بس دايما جوايا جزء كبير ناقص بسبب انسان كان  سم ف حياتى تفاصيل طول 6سنين مرضتنى

Apple_45892 🇪🇬 · Answer

مساء الخير
 مش عارفه ابدا منين مش عارفه اني فعلا حياتي بايظه كل الناس الي فيها مش فاهمني ولا انا دماغي مش مستوعبه ابدا ب أهالي ولا ب صحابي ولا ناس داخلو حياتي وطلعو وجعوني وكسروني عشان هبله ولا جوزي ولا اهال جوزي ولا مين ولا مين.

Apple_45892 🇪🇬 · Answer

ابدا ب امي وجوزي الناس كلها تستغرب ليه عشان انا طلعت من طوع امي ل جوزي بس الاختلاف اني لو عملت اي حاجه هتبقي فاضيه رسمي وهطلع ست مش محترمه حتي لو معملتش حاجه انا طول عمري نفسي ابقي انا بس معرفش ازاي ولا مع مين كنت بمشي مع اي حد يرسم الطريق وانا امشي عليه زي ماما كنت بتعمل لينا انا واخواتي وجوزي هكذا يرسم وامشي علي طريق بس لو قولت لا انضرب واتشم ب امي عشان هو عارف اني مبحبش كده وطلع بره الشقه ف نص ليل مش عارفه اروح فين ف ارجع تاني امي كنت بتتخانق معايا عشان ابعد عن صحابي عشان اطلع من بره اوضتي عشان اشوف طلبات البيت حاجات بسيطه اوي  
جوزي بقا مفيش كلام ده انا مش عارفه اشوف حاجه حلوه ف جوزي خايفه منو دايما دايما يعمل فيا اي حاجه بعدين انا من محافظه هو من محافظه فبخاف جدا كان نفسي ف حد حنين انا استاهل والله استاهل 😔

Apple_45892 🇪🇬 · Answer

اعمل اي مع جوزي بجد نفسي يقولي كلام حلو نفسي يحن عليا يعوضني الحضن الدافئ يعمل علشاني انا كل حاجه نفسي يقولي كلام حلو  نفسي احس معه اني مرتاحه انا بخاف اقول خايفه مش هيطمني بخاف اطلب منو يخرجني عشان مخنوقه عشان هيكسر بخاطري جوزي ده ايام الخطوبه كان يعتبر ملاك فعلا 😂 
بس لم جوزت من يوم الصباحيه اتخانق معايا وكان بسيبني وينزل عند اهالو وانا غربيه مش من نفس البلد جيت حملت ف بنتي محدش كان بعبرني ولا هو ولا اهالو بس لم بتعب جامد كنت بتحايل عليه يجي ليا  انا معايا طفلين مش عارفه اتعامل معه خالص كل ماقول اتغير بيكون أسوأ بقالي 3سنين ونص متجوزه مش حاسه بحساس اني موجوده ف حيات اي حد ولا ليا لازمه اصلا ولا معه ولا مع أهالي ولادي ملهمش غير ربنا وبعدين انا محدش بستحمل حد جوزي علي طول ف شغل وبنزل تلات اربع ايام ينام يخرج مع صحابو ويطلب طلبات كل الاجازه باشا مش يبقوم حتي من علي ركنيه تعبت محبوسه ف البيت ب العيال ولا بقولي لازمك اي حت يعبت وانا حاسه اني لوحدي

Croissant_46306 🇪🇬 · Answer

علاقات مش علاقه كلهم بينتهو بنفس القصه مش بيردو فجاه ويختفو كذا فتره واتفاجئي بانهم خطبو او اتجوزو
اخر واحد كانت علاقتنا ممتازه وبنتفق اننا حنعمل خطوه فجاه مابيردش يمكن ٣شهور واتفاجئت بصور كتب كتابو