ازاي اتخطيتوا موت/ فراق حد عزيز عليكو

Question

عملتوا ايه عشان تخرجوا من الفتره دي وهل فعلا تخطيتوا ولا لا

Coconut_14453 🇪🇬 · Answer

عن نفسي مش بعرف اتخطي وانسي بفضل فاكرة نفس الشعور بنفس تفاصيل اليوم ويمكن فراق جدو عدي عليه ٧ سنين بس انا لغاية دلوقتي مش مقتنعة انه مش موجود انا بحبه اوي  هو وحشني واحساس اني نفسي احضنه واشوفه ومش عارفة اعمل كده صعب اوي انا لما بروح بيته بعتبره ف جامع بيصلي لسه متعلق ف وداني نبرة صوته لما بنيجي ولسه بسمع صوت الباب لما بيجي او بينزل انا لسه ف ذكرياتي دي ومش عايزه انساها لانها مصبرني انا بتخيله ف اي حد ماشي ف الشارع انا بجد نفسي اشوفه وحشني اوي نفسي اترمي ف حضنو اعتقد لو كان لسه معايا كان ف حاجات كتير اتغيرت انا بتأقلم لكن عمري ما هعرف اتخطي عدم وجوده وللاسف كل مدي بيوحشني اكتر ربنا يرحمه يارب ويرحم كل مواتنا وموتي المسلمين ويصبرنا ع فراقهم💔

Nutella_26046 🇪🇬 · Answer

نمت صحيت ع خبر ان صحبتي عملت حادثة 
هي مكنتش قريبة مني اوي بس هي صحبتي من ابتدائي وغالية ع قلبي اوي 
اتحجزت ف المستشفى وقولنا ان شاء الله هتقوم منها فضلت شهر ف المستشفى 
ويوم الجمعه8 /26/ 2022قبل صلاة الجمعة كنت راجعه من امتحان كيميا لقيت رسالة انها اتوفت 
الخبر نزل عليا كالصاعقه 
حرفيا فضلت اكتر من ساعه مش مستوعبه كانت ملاك بريئ بتحب كل اللي حواليها ولسه صغيره 
كان عندها احلام وطموحات كتيره عايزه تحققها 
فضلت اكتر من شهرين اصلا مش متقبلة الموضوع 
بس تعايشت مع الالم حاليا ليها سنتين متوفية ربنا يرحمها ورجاء تدعولها كتير بالرحمه والمغفرة

Pumpkin_25616 🇮🇹 · Answer

كنا مسافرين و قاعدين سهرانين بليل حتى فاكرة ساعتها كنا بنلعب  كوتشينه لقيت بابا منصدم شاف خبر ع الفيس موت خالي حرفيا عرفنا من الفيس اتأثرنا كلنا كان اب لينا قبل ما يكون خال كان اخ لوالدي مش عديله بس كان حبيب الناس كلها و ليه واجب مع طوب الارض قبلها بيومين بس كان في فرح ابن أخته ما شاء الله عليه كان منور في البدلة ووقف معاهم واقفة جامدة عياله لسه 6 و 5 سنين و فجأة قلبه وقف مات بجلطة من غير اى سابق إنذار سخرية القدر قبلها بأسبوع كنت بكلمه و بنكشه و قولتله جملة "يخليك ليا" ربنا مستجابش دعائي و أجله جيه و هو في عز شبابه ربنا يرحمه و يغفر له 
ويغفر لجدتي اللي حصلته وماتت قبل السنوية بتاعته مستحملتش غيابه.

Pear_27617 🇪🇬 · Answer

لما بابا اتوفى معيطتش ٥ دقايق ع بعض ومحستش بالتأثر خالص معرفش ليه 
ف ٣ يوم عزا جالتي فكرة غريبة وهي ان بابا مماتش ولسه عايش وهيرجع ، ساعتها بقيت ببص لكل اللي حوليا بشفقة عشان هما فاكرينه ميت وهو عايش وهيرجع ، وابتديت اتخيل اللحظة اللي هيرجع فيها ، واني هحضنه وهبوسه وهفضل اهزر معاه واقوله اني كنت عارفة انه هيرجع وانه مماتش وفضلت عايش ع امل ان ده يتحقق
بس بعديها ب ٨ شهور وبعد ما عرفت ان خلاص مفيش امل ان اللي بحلم بيه يتحقك ابتديت انهار واعيط ع سريري لوحدي من غير صوت عشان محدش من اخواتي يسمع ، ابتديت احس بان اللي حصل ده مش عدل وان في حاجات كتير لسه معشتهاش مع بابا عايزة اعيشها معاه واني قد ايه كنت بعيده عنه وكنت عايزة اصلح ده وحسيت بالقرف من نفسي عشان خوفت ابوسه بعد ما اتغسل او بسته وانا خايفة من غير سبب ، وكمان عشان متوقعتش انه يموت اصلا ومعرفتش اودعه بطريقة مناسبة . 
حسيت انه كان انسان كويس بس انا الي كنت بعيدة عنه وعمري ما حاولت افهمه وانا كاناب كويس بالنسبالي مش مثالي بس كان كويس 
معرفتش اتخطى موته لحد دلوقتي ولسه بتمنى انه يكون حلم بس بقيت مدركة معنى الموت خلاص 
بابا كان اول حد يموت قدامي ف مجربتش احساس فقد حد ميت غير معاه وبقيت خلاص عرفاه ف متمناش اني اعيشه تاني ويارب يبعد عني الاحساس ده

Blueberry_27226 🇪🇬 · Answer

مش قادرة اتخطى فكرة عدم وجوده مع اني انا اللى سايباه بس كل الطرق كانت بتؤدي لنفس النتيجة اللى هيا فراقنا 💔
بجد الحوار مؤلم اوي واللى بيزيد الالم ان الواحد بيضحك قدام الكل وبيدي نصايح ولا كأنه معندوش مشاكل😮‍💨😮‍💨

Lemon_15033 🇪🇬 · Answer

من يومين صحيت لقيت خطيبتي المستقبليه بتقولي ان صحبتها اتو@فت ابوها قت.لها بسبب ان شك انها بتكلم واحد ومرتبطه بيه ف ض،ربها جامد وهي قط.عت شراينها وراحت المشفي وراح هو جاب ليها سم وخلالها تشربه انا قلبي واجعني من وقت ما عرفت الموضوع دا رغم اني معرفش البنت اصلا ولا عمري شوفتها اصلا 
المهم دلوقتي انا بقيت مرعوب ع البنت اللي معايا لان عقليه اهلها نفس عقليه اهل البنت اللي اتقتل.ت
ف مش عارف اعمل اي و ف نفس الوقت مقدرش ابعد عنها لان ف الوقت دا بالذات هي محتاجه اني اكون جمبها 
* ف مشاكل بين اهالينا ومستحيل يوافقوا ع جوازنا اصلا 👈👉 
ف ممكن نصيحه اعمل اي ؟

Sugar_28504 🇸🇦 · Answer

بابا اتوفى من سنتين ولسه مش عارفه اتخطى او اخرج من الاكتئاب اللي انا فيه    
بس بابا مشي بدري اوي سابنا واحنا بنات وانا اتمرمطت حرفيا عشان  اخواتي وعشان مستوانا الاجتماعي وميحسوش بالنقص المادي 
بس معنويا كلنا مش قادرين نهون على بعض فراقه 
مكنش قاسي كان حنين وصاحبنا كلنا كان شديد احيانا وكنا احيانا بنخاف منه بس اكتشفنا انه صح انه ربانا صح علمنا الاصول والأدب والاخلاق والدين وكان نعم الاب والصديق والزوج 
كان هوا وماما بيحبو بعض جداااا وكانت قصه حب كنا انا واخواتي نتمناها ونتمنى يجيلنا زوج يعاملنا زي ماكان بيعامل ماما 
حقيقي وحشني وتايهه طول الوقت مع اني بعافر عشان انا الكبيره 
وكان هوا رافض فكره الشغل لينا كلنا عشان بيقول البنات مش بتوع بهدله يفضلو ف البيت وانا اجيبلهم كل اللي نفسهم فيه 
ومعرفتش معنى البهدله غير بعده عشان طول الوقت خايفه على اخواتي يشتغلو ويتبهدلو خدت مكان الاب والحمل كان تقيل جدا
لغاية ماتجوزو كلهم السنه اللي فاتت وحملو وخلفو السنه دي من ساعه ما اتجوزو وانا حاسه بوحده رهيبه اكتر من الاول كله انشغل ف حياته ونسانا محدش يعرف انا باكل ولا لا عيانه ولا لا وماما عند كل وحده شويه منهم عشان خلفو ف نفس الوقت وانا لوحدي ف البيت بعمل كل شيء لوحدي وياريت لو بابا هنا

Mango_29006 🇪🇬 · Answer

15/8/2015 الساعة 7:34  PM
مش معنى اني فاكرة اليوم و الاحداث و التفاصيل اللى قبل وفاة جدتي اني لسه بعاني

بس الفكرة اني اتعودت
قعدت ٣ سنين بعد فراقها مش مقعتنة بانها اتوفت و كنت بقنع نفسي انها مسافرة و هترجع تاني

لحد ما جه يوم ادركت انها مش هينفع ترجع
و قررت اني لازم اتعود ع عدم وجودها ف العيد و اني مش هسمع صوتها و لا هلمس ايدها الحلوة و لا هبوسها و لا هسمع ضحكتها اللى كانت متتوصفش من حلاوتها ولا تتنسي اصلا🤍

بس ادركت ان الحياة مشيت و انا واقفة مكاني
فاحتفظت بصورة ليها ملازماني ف كل حتة و بقيت اكتبلها طول الوقت و اتكلم معاها كتير و اتكلم ف كل حاجة

و بعد مرور ٧ سنين ع وفاتها فاول مرة كنت اتكلم عنها بصوت عالي مع حد انها اتوفت فعلا اتقالت بكل وجع داخلي و ثبات انفعالي خارجي
ف اللحظة دي ادركت و كان عندي الوعي الكافي اني اتغيرت و اني بقيت احسن

بدأت اعرف ان الطريق الافضل اني منسهاش بس اتعود فعلا 
يعني مش هشوفها ف العيد اه عادي و لما سيرتها تيحي هترحم عليها و هطلع صدقة باسمها و هدعيلها و لما اجي اتكلم عنها هتكلم عن حد كان جميل اوي و من كتر جماله ميتوصفش
بس ف نفس الوقت ممكن اكتبلها كل فترة ف النوتة او اتكلم معاها و انا ببص للسما و اقولها وحشتيني اوي عادي
انا اه مش هسمع ردها ف ودني بس هحس بيها و هحس انها سمعاني و ان ردها وصلني

من الاخر هي الفكرة ف التعود و واحدة واحدة التجاوز و التخطي بييجي بس اهم حاجة نطلع الطاقة بتاعت الحزن اللى جوانا نن غير ما نقف ف مكانا لاني الحياة مش هتستنانا

لتيتة دي كانت و مازالت احلى حاجة و حد ف حياتي

ربنا يرحمها و يغفرلها

Chilli_28867 🇪🇬 · Answer

اتخطى !!
انا مستحيل اتخطى فراق جدي الاعز على قلبي واكتشفت بعد موته اني كنت بحبه جدًا
يوم 8/9/2022 الساعة تسعة الصبح كان يوم خميس
فاكرة كل حاجه 
مش هقدر اتخطى صعب ومستحيل
انا حتى بحاول استوعب لغاية دلوقتي فراقه
انا اكتشفت اني كنت بحبه فوق الوصف كان اكتر خد بيحبني تقريبًا
كنت بحسّ معاه بالامان حقيقي
وجوده كان بيطمني 
كان كل اسبوع بنزوره
فكرة انه مبقاش موجود ديه مش عارفه اتاقلم عليها

وتيتا توفت من الحزن عليه، ماتت من كتر الزعل عليه 
جدتي لسة متوفية مكملتش اربعين يوم 
وانا حقيقي
 والله ا لغاية دلوقتي مش فاهمه هي تيتا فين !! انا مش بفكر في الموضوع عشان منهارش
بس انا مش عارفه استوعب تيتا راحت فين ولا هي فين انا مش عارفه انا مخي مش عارف يستوعب انا بقنع نفسي انها مماتش انا لغاية دلوقتي بكدب اي حد بيقول انها ماتت 
تيتا اللي ربتني وكانت ليا ام تانيه وهي اللي عيشت معاها طول طفولتي هي وجدو 
يمكن جدو حاولت اتاقلم على موته ولغاية دلوقتي منهارة حزن عليه
ولكن تيتا انا مش عارفه ازعل عشان هي الاكيد انها لسه معانا واني هروح ازورها تاني هي بس تعبانه في المستشفى كالعادة وهترجع تاني اصل مفيش حل غير كده

Marshmallow_34675 🇪🇬 · Answer

انا عمري ما جربت شعور اني افقد شخص قريب مني وكنت دايما باسال نفسي ليه الناس بتزعل لما حد يموت رغم ان كلنا عارفين ان هاييجي يوم وهانموت لانو الموت حقيقه مؤكده 
لعند ما جه اليوم اللي جربت فيه الشعور ده بوفاة عمي الله يرحمو هو مش بس عمي هو صاحبي واخويا وابويا وحبيبي كان كل حاجه في حياتي ساعتها حسيت اني وحيده ساعتها عرفت ليه بيزعلو 🙂 الزعل بيكون افتقاد وعدم تقبل ان الشخص ده مش ها تقدر تكلمو او تحضنو او تبصلو او تشوف ضحكتو لما تزعل مش ها تلاقي حد تشتكيلو مش ها تلاقي اللي يسمعك لان اللي كان بيسمعك مشي 💔 بس بعدين بتلاقي انك بتاكل وبتشرب وعايش عادي اه حزين من جواك ومنكسر بس اكيييد الحياة بتمشي ما بيكونش تخطي او نسيان لانو دايما فاكرين التفاصيل دايما فاكرين وبنقارن بين حياتنا بيه ومن غيرو دايما فاكرين وبندعيلو وبنزعل بس الفكره بتكون تعود وايمان قوي انو اكيييييد الموت حقيقة مؤكده ... لازم تصارح نفسك بالحقيقه دي من دلوقتي وتعرف انو انت ها تموت وحبايبك ها يموتو ولازم تكون جاهز ليوم زي ده اكيد ها تزعل ومش ها تتقبل في الاول لكن بعدين الحياة بتمشي ما بتنساش لكن بتعتاد