التنظير والشخص اللي دايما عايز يبينلك انه جامد

Question

احكيلنا تجربتك مع الاشخاص اللي دايما بتنظر عليك وعايزه تبين انها احسن منك وازاي دة اثر علي ثقتك في نفسك وصحتك النفسية

Apple_38269 🇪🇬 · Answer

اكتر ناس بتعمل كدا هما الاقارب معروفة😂
الاقارب عقارب حرفياً حتى لو كلهم كويسيين بتلاقي فيهم بعض الشخصيات عايزين الحر/ق والموضع منتشر بين الجنسين سواء ولاد او بنات
بس بنسبة ٦٠٪؜ مع البنات لان معروفين بطبعهم فيهم غيرة شوية الا من رحم ربي وكل واحده عايزه تبين انها احلى من التانية وعلى فكرة كل ما الواحد بيكبر وينضج بيكتشف ان عيلة الأم برضو وحشه زي عيلة الأب بس من تحت لتحت الا من رحم ربي يعني بس دول قليلين
المهم خلاصة حكايتي ان من وانا صغيره عيلة ابويا مبيحبوش لينا الخير عشان بابا الحمد لله انسان طيب ومحترم فربنا كارمه وبيكرهوا امي جداً عشان بيغيروا منها عايزين بابا يعاملها وحش ويقلبوه عليها وانا عانيت معاهم من وانا صغيره لغاية دلوقتي بس حالياً مش بنكلمهم غير نادراً وشخصيتي معاهم بقت قوية وبعرف اخد حقي 
نيجي بقى لعيلة امي واللي حرفياً القرف ملازمني فيه طول عمري بسبب ان احنا في العيلة كل بنتين قد بعض ودا اكيد بقى فيه مقارنات طول الوقت بنت خالي دي بصورم جداً وحرفياً قلبها اسود اكتر ما اي حد ممكن يتخيل وملهاش عزيز يعني تقعد تتكلم معاك او مع اي حد قدامه بالحلو ومجرد ما يلف وشه تتكلم في اعراضه كمان عادي الله لا يبلانا ودايماً تتعمد تطلعني مسرح وتقل مني او لو اي حد هزر معايا تقعد تضحك ضحك هستيري اللي هو يعني بتتريق عليا وكدا حتى كلهم دايما يقعدوا يتريقوا على وزني اني رفيعة شوية وانا اصلا جسمي حلو وهما براميل اصلاً وهيموتوا ويبقوا نفس الجسم و رغم ان معاملتي معاهم كويسة انا وماما ومع ذلك تعابين ماشيين على الأرض كلهم لدرجة لو واحده متجوزه او مخطوبة جديد يتعمدوا في نص الكلام يحرجوها قدام خطيبها او جوزها اللي هو يعني يا اما بص هى مش حلوه ازاي دا فلانه احلى منها يا اما يقولوا على خطيبها مش حلو
هما حرفيا اغنياء بس بيقلبوا دايما الترابيزه انهم مش لاقيين واننا اغنى منهم ومعانا ومعانا ويفضلوا يحسدوا وراسمين دور الضحية قدام الناس وقدامنا ولا حتى اخوالي عايزين البنات اخواتهم يبقى ليهم نصيب في حاجة او ياخدوا قليل والله العظيم بتمنى ربنا ينتقم منهم كلهم لدرجة ماشاء الله اللهم بارك يارب بيروحوا اماكن جميلة ويصيفوا وعايشين حياتهم واحنا لو طلعنا بس رحله نفك على نفسنا يزفونا اننا معانا فلوس بقى ومين قدنا انتوا متخيلين😂!!انا بقيت اه شخصيتي احسن من الاول شوية وقويت نفسي وبقيت ارد بس برضو متربتش ابقى سوسة ولا قليلة الادب وكلامي بيطلع ملخبط كاني واحده لسه بتتعلم الردح على قدها بس مش مهم ربنا ياخدهم كلهم خصوصاً بنت خالي عمري ما هسامحها ابداً

Chilli_41293 🇪🇬 · Answer

عندي في العيلة شخص مش بكرهه بالعكس من اقرب الأشخاص لينا بس بجد الصفة دي فيه صعبة جداً 
هي دايماً مش عايزه حد احسن منها هي و ولادها ، من زمان ومفيش قعدة غير لما بتعلق على تصرفات كل الناس اللي قاعدين وكمان لما بيمشوا ، الأول كانت تفضل تعلق على تصرفاتي والنقاش دايماً لازم تكون هي الصح فيه مع ان اوقات لا دين ولا عقل بيقول كده بس بجد مبتعترفش ان هي غلطانة ابداً وفي نهاية النقاش لازم تقلل من اللي بتكلمه طالما متفقش معاها ، مكنتش بعرف ارد في الاول واوقات كنت بحاول اغير من نفسي عشان ارضيها لكن دلوقتي ادركت ان هي اللي غلط ف دايماً بقيت في خلاف معاها أنها مش عاجبها اني بمشي بدماغي وبعمله وهي مش راضية عنه ولما نتناقش في حاجة تحاول تقلل مني ف بقيت اصدها ، ف حالياً هي بقت متعلقش على تصرفاتي ، وفيه فترة عيشنا سوا في بيت واحد انا واخواتي معاها هي وجوزها و ولادها ف بجد كرهت اخويا في حياته من كتر التنظير ومقارنات بينه وبين ولادها مع ان بجد اخويا ده بيحاول يرضيها دايما لكن هي فظيعة واوقات توصل بيها انها تكدبه قدامنا كلنا وماما تدافع عنه اوقات واوقات تزعقله بسببها ، الفترة اللي كنا فيها في بيت واحد دي احنا بجد مكناش مرتاحين ابداً وكنا حاسين ان كل حركة بنعملها متراقبين فيها وهي مستنيانا نغلط عشان تنظر علينا وبجد بقيت احس ان ده مرض لدرجة انها بقت تعمل كده مع ولادها مؤخراً وبتتكلم عليهم مع كل الناس وخصوصاً ابنها الكبير وبسبب انه يعتبر اخونا وقريبين من بعض قالنا انه مبقاش يطيق يسمع صوتها حتى ، ده غير ان من زمان اوي كانت تعلق على اسلوب تربية ماما وخالاتي كلهم وتفضل تقول انا لو ابني عمل كده هعمل فيه كذا كذا وتلف الدنيا و ابنها يعمل كده واوحش من كده ومع ذلك متعترفش انها غلطت برده
ولازم دايماً تبين انها أجمد انسان في الدنيا اللي هو يكون حد فينا عمل حاجة هو شايفها انجاز وفخورين بيه تفضل تقلل من اللي عمله واللي هو ده انا عملته من زمان اوي ودايماً تبقى عايزة الاهتمام كله يكون على انجازتها هي بس

Tofu_50969 🇪🇬 · Answer

عندي واحده صحبتي دايما تبقي عايزه تبان انها هي الي صح وان مفيش زيها وأنها من علماء النفس والفيزيا والفلك وعلماء كل حاجه حرفيا ولو حد فكر يتناقش معاها ممكن تغلط فيه ودايما شايفه نفسها جميله انا منكرش أنها حلوه بس الصراحه كلامها عن نفسها وانها عايزه تبهر الي قدامها ممكن يكون اوفر شويه دايما تقولنا أن اهلها اشترولها واهلها دخلوها مدارس امريكان وان اهلها سفروها بره مصر الصراحه بشوف أن مش لازم الواحد يحكي كل حاجه وزعلت مني عشان قولتلها أن بابا جابلي خاتم دهب وقالتلي انتي بتتكبري علينا انا مكنتش اقصد بس كنت بوريهولها بحكم انها صحبتي واحنا قريبين من بعض وحتي اديتلها الخاتم تلبسو معملتش زيها وخفت علي الحاجه بحكم أننا واحده ومفيش فرق بينا بس الموضوع وصل لانها بقت تعلي صوتها عليا عشان تبان جامده وروشه بقت تغلطني وتقولي اني فاشله وأنها اشطر مني لمجرد أنها تثبت نفسها انا منكرش اني اشطر منها واحلي منها بس انا بحمد ربنا علي اني مقتنعه ومش بتكبر ولا بعمل حاجه عشان ابان روشه أو جامده أو مفيش مني بس بجد أنا مش عارفه اقطع معاها لأنها صحبتي من اربع سنين ومع بعض ف كل مكان