سمة جيلنا ADHD ومعاناتنا مع المنظومة

Potato_76035 🇪🇬

منذ يوم واحد

سمة جيلنا هو الـ ADHD الأجيال وسماتها مابتجيش من الفراغ، بتيجي من مؤثرات بتعايشها طول الوقت انت دلوقت بتشوف العيال بتكسل تشوف فيلم مدته 90 دقيقة وبتشوف ان حلقة أنيمي تلت ساعة دي بطولة انهم يكملوها لآخرها، وياريتهم بيعرفوا يبصوا للآخر من غير ما يمسكوا الموبايل ولو على الأقل مرة واحدة أنا بشوف الدكاترة في المحاضرات والمدرسين بيشتكوا ان تركيز الطلبة مابيكملش معاهم للحصة أم ساعتين ولا تلت ساعات، ودا مش منطقي أصلا، أنا إيه اللي هيخليني عمال بستقبل بس معلومات للكم دا من الساعات؟ مخي مش مهيأ لدا مع كم المؤثرات اللي حواليا وأكيد مش هتحدى الكون علشان محاضرتك ولا الكلمتين اللي جاي تبخهم في وشي اللي بقوله يعني إني ساعات بحس إن المشكلة في توائم أساليب التعلم والاستقبال لمواصفات جيلنا، وإن الأساليب دي مابتتغيرش، فبتنتهي عندنا اننا مابنستوعبش حاجة، وبنحس بالذنب والتقصير، وبنحس كمان إننا عمرنا ما بننجز حاجة المشكلة في معايير ماعدتش مطابقة لعصرنا، مش فينا يعني في الثقافة السايدة لجيلنا، الـ adhd بيتحول لـ personality trait مش مرض محتاج يتعالج بأدوية وتمارين سلوكية، كجزء من حساسيتنا كلنا المفرطة تجاه أي نقد صغير ممكن يصب في النهاية لاستنتاج اننا بس كسلى أو عندنا استحقاقية مفرطة مقابل إن ماعندناش خبرات أو مهارات كفاية فسوق العمل اللي اتفقنا انه بيربط قيمتك كإنسان بمقدار انتاجيتك، فبالضرورة هيشوف ان الـ adhd اللي هو أصلا مرض وخلل في النواقل العصبية، مجرد عائق للإنتاج اللي هيخليك شخص كويس وجميل ومحبوب ومنور ومتشاف، فتقوم حضرتك مستخدم الـ adhd كهوية وكسمة لشخصيتك وتقول انا مش كسول ولا مقصر أنا adhd، ويقوم ناس تانية عندها خطوط انتاج تستغل دا كـ branding وتعمل منه تيشرتات تلبسها أو تعمل بيه فيديوهات على انستاجرام وتيك توك علشان تاخد اللايك بتاعك وتحس ان كلامهم بيعبر عنك فآه إحنا كجيل مابينا تضامن اجتماعي ضمني بإن كلنا عندنا مشكلة تشتيت نتيجة كل المؤثرات اللي حوالينا وماعدش لنا سيطرة عليها وإن بنية التعليم والعمل فيهم خلل ومحتاجين هم اللي يبقوا ملائمين لينا مش احنا اللي نفضل نحرق في نفسنا علشان بس يادوب نبقى ترس في آلة سوق العمل، لكن من ناحية تانية احنا بنبسط الحالة بزيادة ودا بيخفي معاناة لناس محتاجين دعم حقيقي أو علاج أو قاعدين يرموا أفكار مابتعبرش عنهم وسمعوها وشكلها حلو وجايين يخلقوا بينها لنفسهم شخصية جديدة غير الشخصية المهزومة على أرض الواقع ويبدلوها بشخصية افتراضية في ابليكيشن مصمم للناس الديسبريت اسمه to heal يعني مبروك يسطا، انت بطلت تعيش دور الضحية ورميت نفسك في عقدة جلد الذات، وعلشان تهرب من عقدة جلد الذات رحت شخصت نفسك بإنك adhd اللي هو مرض وحولته لسمة شخصية كأنك اتولدت بيها، فدخلت في حلقة مفرغة انت مش مدركها من أساسه وما بين اننا محشورين في منظومة حالية عالمية بتقيس قيمة الفرد بمقدار انتاجيته والانتاجية دي بتتحول للفلوس بتروح لناس مش محتاجة فلوس زيادة أصلا وعمالة بتراكم في ثروات وانت بتاخد الفتات وبتفتكر إنك أجمد حد في المجرة علشان الدولار بقى بخمسين جنيه وانت بتقبض تلاتين سنت في الساعة ففيه بديل تاني جوهره بيركز على إنسانية العامل قبل قيمته كمكنة قيمتها بتتمحور في كونها أداة انتاج، البديل دا بيقول ان الشغل المفروض يكون لإشباع احتياجات انسانية، مش علشان تطحن في ساقية علشان تخلي ناس تانية أصحاب رؤوس الأموال أغنيا البديل دا كمان بيتعامل مع وقت الفراغ مش باعتباره كسل، لكن كجزء أساسي من تطورك، مش كونك مجرد مجموعة skills وكورسات ماشية على رجلين البديل دا اسمه الماركسية، لكن مشكلته ان تجاربه التاريخية كلها ماقدرتش تحقق الوعد دا، بالعكس، في اوقات كتيرة أعادت انتاج نفس الضغط الانتاجي لكن بأشكال مختلفة وقاسية أكتر، وبدل قيمتك في مقدار اللي بتنتجه، قيمتك بقت في إسهامك في البناء الاشتراكي، الصين والاتحاد السوفيتي وحتى افغانستان قبل ما حصل فيها اللي حصل كل المصطلحات اللي استخدمتها في البوستات اللي فاتت هي اكشلي مصطلحات ماركسية: الاغتراب، الاستغلال، فائض القيمة، أصحاب رؤوس الأموال، أدوات الإنتاج والمصطلحات دي هي كل حاجة اتبقت من كارل ماركس وبتعبر عن كل اللي بنعيشه، لكن من غير ما يديك مثال تطبيقي يعني المفاهيم دي خلتك مدرك إنك عايش في عبث وفي مشكلة ضخمة وفي واقع مستحيل تتأقلم معاه، بس في نفس الوقت مابيقدملكش بدايل البدايل اللي متبقية هي كلها بدايل فردية متعلقة بكل واحد وببيئته وبمشاكله وبخلفيته وبثقافته وباللي هيعرف يعيش بيه، انت معاك الشخيص، لكن التشخيص لوحده مش حل، البديل محتاج تغييرات في روتينك اليومي وفي علاقاتك الاجتماعية وفي مفاهيمك كمان عن الصرف والدخل لازم تكون واقعي شوية في حدود قوتك كفرد قصاد منظومة اقتصادية كبيرة وعالمية وحاطاك في المطحنة بتاعتها ممكن تبتدي بإنك تعيد تعريف الوقت، بدل ما تقيس وقتك واللي ضاع منه بانت أنتجت قد ايه، لأوقات مركز بتشتغل فيها او بتدرس، وأوقات بتعمل فيها هوايات وأنشطة انت بتحبها، ووقت اجتماعي، ووقت للسوشيال ميديا بتاعتك، فيه تدريب شفته زمان اسمه pomodoro، بس ماجربتوش لكن ممكن ينفع مع ناس هنا ممكن تبتدي تقلل اشتراكاتك الشهرية اللي بتقيس قيمتك من خلالها باعتبار ان دا بيحطك في مكانة أعلى، سواء بمنتاجات أو حتى اشتراكات بتتباهى بيها في قعداتك، ممكن حتى كجزء من وقت الهوايات اللي اتقسم فوق، تبتدي تشوف فيديوها diy وتتعلم تعمل المنتجات اللي بتستخدمها بنفسك، الموضوع سهل بالمناسبة وجربته في حاجات كتير، وكانت حاجة جميلة اوي اني حسيت اني مش مجرد حد بيستهلك حاجات من برا بدل جلد الذات اللي بتستخدمه كوسيلة تطهرية - اللي هو انا ماعملتش حاجة، وأنا مش مبسوط، ودا كافي كعقاب - ممكن تبتدي تحاول تشخص أسباب تسويفك إيه، طاقتك قليلة؟ أهدافك مش واضحة؟ ماعندكش حافز في حياتك؟ التسويف هنا مجرد عرض لمشكلة أكبر جواك محتاجة تتحل، مش هو المشكلة

هل كانت هذه المعلومات مفيدة؟

0

0