انت مش ضعيف... انت بس تعبت والتعب مش عيب

Hazelnut_63122 🇪🇬

منذ أسبوع واحد

لكل واحد فيكم... اللي الدنيا خبطته ومرمطته..." انت مش ضعيف... انت بس تعبت. والتعب مش عيب… العيب إنك تستسلم ليه. اللي فكر يخلص من نفسه؟ أنا مش هقولك “ما تعملش كده” أنا هقولك: لو كان فيك حاجة تستحق تنتهي… كانت خلصت من أول خذلان، من أول سقطة، من أول مرة صحتك خانتك. بس انت لسه هنا. لأنك أقوى من كل حاجة فكّرت تكسرك. اللي مش قادر يبعد عن عادة مسمّاه "إدمان"؟ انت مش عبد لضعفك… انت بني آدم، والإنسان بيتعلم من كل سقطة، مش بيتدفن تحتها. قوم… غيّر خطوة… غيّر روتين… بس ما تفضلش في نفس الحفرة وتقول "مفيش أمل". اللي صحابه سابوه، أو أهله ما فهمهوش، اسمعني… لو اللي حواليك مش حاسين بيك، ده مش دليل إنك مالكش قيمة… ده دليل إنك أعمق من مستواهم. مفيش حد بيتولد وحيد، لكن في ناس بتختار تبقى قوية لوحدها… وأنت فيهم. اللي لسه قلبه بيوجعه من فراق أو خيانة… أنت ما خسرتش… أنت بس اكتشفت إنك كنت شايل حد مكانه مش ليه. القلوب بتوجع عشان تنضف… وممكن تلاقي نفسك بعد ما كنت فاكر إنك ضايع. وأخيرًا… اللي فقد نفسه ومش عارف هو مين ولا رايح فين… أنا هقولك: مش لازم تكون فاهم كل حاجة… بس لازم تصحى كل يوم وتقول "لسه عندي فرصة". فرصة تبقى حاجة أعظم بكتير من اللي انت فيه دلوقتي. إوعى تستهين بنفسك… لأنك عشت أيام محدش كان هيستحملها، وقومت من وجع كان كفيل ينهى أي حد. انت لسه هنا. ولسه واقف. وده لوحده انتصار.

هل كانت هذه المعلومات مفيدة؟

0

0