إزاي تبذل في الحب وتكون عزيز في حق نفسك

Marshmallow_69067 🇪🇬

منذ يوم واحد

أعتقد إن مفيش طريقة للتعبير عن المشاعر أصدق من العطاء ولا فيه أجمل من صفة الكرم .. الإنسان الكريم معطاء في المطلق ولكن طريقة بذله مع الى بيحبهم بتكون مختلفة، بيتعامل بالفضل بيكون حريص يبذل عشانهم أكتر من العادي مش عشان ملزم لأ عشان هم غاليين عنده.. بيكون عايز يعبر لهم بكل الطرق أد ايه هو حريص ع سعادتهم.. هو أصلا بيستمد شعوره بالأمان والرضا عن نفسه لما بيشوف حبايبه مطمنين معاه مبسوطين.. لذلك انا بشوف إن فيه أمور بتفقد معناها لما بتطلب لازم سواء حقوق مادية او معنوية عشان كدا الإنسان لازم يكون عنده قدر من الإستحقاقية ومعنى الإستحقاقية الى أقصدة مش إنه يوصل لمرحلة إنه يطلب حقه من حد بيعمل نفسه مش واخد باله .. الإنسان لازم ميقبلش ع نفسه يكون مع حد أصلا مش مهتم او مش فاهم واجباته تجاه العلاقة ومش حاسس بالمسؤلية تجاه الشخص نفسه.. مش المفروض نقبل بالمتاح وهو أقل مما نستحق لمجرد إن دا المتاح.. الانسان لازم يكون عزيز في حق نفسه لأن محدش هيقدره لو هو مقدرش نفسه وعودهم إنه ملهوش إحتياجات. بابا الله يرحمه كان بيقولى عايزة تكسبي ود حد إبذلى عشانه.. الإنسان محتاج يحدد هو عايز ايه وايه الى مينفعش يتنازل عنه وفي المقابل لازم هو كمان يبذل ويقوم بواجباته بشكل يرضي الأطراف التانية ..العلاقات الإنسانيه ربنا خلقها عشان الناس تستأنس ببعض وترحم بعض و تبذل عشان بعض.. العلاقات هتكون أسهل لو قامت ع الفضل والعطاء المتبادل.. مفيش أجمل من إن الإنسان يحس إنه متقدر وعزيز وخاطره غالى..

هل كانت هذه المعلومات مفيدة؟

0

0