شقائي إن روحي مش لاقية الونيس إلي يكملها

Marshmallow_69067 🇪🇬

منذ شهر واحد

إن الله قد خلق لكل روح من الأرواح روحاً أخرى تماثلها وتقابلها .. وتسعد بلقائها .. وتشقى بفراقها .. ولكنه قدر أن تضل كل روح عن أختها في الحياة الأولى ، فذلك شقاء الدنيا .. وإن تهتدي إليها في الحياة الثانية ، فتلك سعادة الآخرة .."مصطفى لطفي المنفلوطي" اعتقد ان ٩٠% من شقاء الأنسان انه مش بيلاقي الروح الى يتونس بيها وتكون لايقة عليه بحس ان أغلب مشاكلنا النفسية والوحشة الى في قلوبنا هنتشفى منها بالونس، في ناس مكانش ليها نصيب تقابل الونيس في الدنيا وناس تانية قابلت ناس غلط وكانت مضطرة تكمل معاهم لإعتبارات كتير بس بحس ان الى بيكمل مع حد من باب المسؤلية والواجب انه شخص ميت حى كل شئ فقد معناه بالنسباله فمش بيكون قادر يدي لأى حد مشاعر وشايف ان الحب شئ افلاطوني وبيقنع كل الى حواليه بكدا عشان ميحسش انه لوحدة اتمنى للناس دي الى كان نصيبهم التعاسة في الدنيا انهم يقابلوا الروح الي لايقة عليهم وبتكملهم بجد في الجنة❤️ بحب كلمة* عكاز* لما نتعب والدنيا تميل نتعكز ع بعض مش شرط حد فينا يكون قوي كفاية نسند على بعض ونكمل الطريق.. مفيش علاقة في العلاقات الإنسانية ممكن تشفي اكتر من علاقة راجل وست اختاروا يكملوا سوا يعيشوا في مكان واحد وسط اربع حيطان ومع كتير من العيوب وكتير من الرحمة والتقبل .. اعتقد ان دور الحب مش انك تكون مع حبيبك عشان هو حلو بحس ان دور المشاعر انها بتعمل توازن وبتخليك تتقبل العيوب وتتكلم عنها وانت بتضحك وفي اخر الجملة تقول بس انا مقدرش اعيش من غيرة..الحب بيداوى ندبات الماضي وعدم التقبل وقلة الإستحقاق الى معظيم اهالينا اتسببولنا فيها ..الحب خيط بين اتنين في اللحظة الى ممكن يبعدوا فيها عن بعض الخيط دا بيشدهم .. فكرة انك تلاقي روح شبهك وبتكملك رغم انكم معشتوش نفس الظروف ولا في نفس الاماكن بس ربنا جمعكم لانه كان مقدر من قبل ما البشرية تكون موجودة.. يمكن دا الى مخليني مكملة وعندي أمل بحس ان فيه روح من روحي عايشة في مكان تاني وان الارض ساعات بتقربنا من بعض من غير ما نعرف بعض وساعات بتبعدنا روح انا مش عارفة هقابل صاحبها امتى بس انا فعلا بستشعر وجودة جوايا كل ما بحس ان الحياة ضغطاني بفتكر ان ممكن يكون فيه حد في الدنيا هنا مخلوق علشانى وانى مس منسية وانى متقدرة وانى استاهل الحب ..بحس انى اغني إنسانة في الدنيا لما بستشعر ان فيه مشاعر متشالالى ووقت هيكون بتاعي لوحدى معاه وكلام كتير وفرحة و انى هطمن ..الانسان بيحس انه قوى وقادر وانه جميل اجمل حد في الدنيا لما بيتحب بيحس انه غني بحبيبه وانه ثروته الى ربنا كان شايلهالوا .. انا اسفه لو كنت ساعات بفقد الأمل وبحس انك مش موجود لكن الحقيقة انك موجود جوايا انا بحس بيك كأنك بتتحرك في روحي ولو حتى مكانش القدر مكتوب فيه نتقابل هنا اكيد اكيد هنتقابل في الجنة مهما شقاء الدنيا ووحشتها طال اكيد اكيد في يوم هينتهي .. ربنا يخلي كل حبيب لحبيبة وتفضلوا متونسين ببعض رغم اي خلاف ويرزق كل مكسور بعكاز يسند عليه ويجبرنا كلنا لانه عارف اد ايه احنا مساكين

هل كانت هذه المعلومات مفيدة؟

0

0