الأمان هو السر ورا كل حاجة بنعملها

Pineapple_60236 🇪🇬

منذ 3 أيام

الأمان هو السر ورا كل حاجة بنعملها لو ما حسيناش بالأمان مش هنعرف ناكل ولا نشرب ولا ننام لو ما حسيناش بالأمان مش هنعرف نضحك ولا نحكي ولا نسمع الأمان دايما حاجة لونها أبيض بتخلينا نشوف بوضوح من غير ما نخاف من حكم حد ولا من نظرته لينا الأمان بيخلينا نعرف نفكر كويس نعرف نعبر كويس عن كل حاجة عن رغباتنا واحتياجاتنا عن أحلامنا وطموحاتنا حتى عن رفضنا الإحساس بالأمان مش رفاهية ممكن تبقى عند حد وحد تاني لا.. الإحساس بالأمان حق مشروع لكل كائن حي.. بقول كائن حي مش بس إنسان احنا مش أسياد الأرض ولا حاجة احنا زي كل حاجة موجودة ومتناغمة وعايشة في سلام لو ع القوة فالجبل أقوى مننا لو ع الذكاء فالناموسة والنملة أذكى مننا لو على أي حاجة مميزة فينا فهتلاقي حاجات كتير بتشاركنا الميزة دي وتغلبنا كمان.. بس الإحساس بالأمان دا هو أكتر حاجة بنحتاجها عشان نعرف نتحرك ونعرف نعيش.. الضعف كمان جزء مننا وجزء من كل حاجة في الدنيا.. الحيوانات بتعلمنا الحكاية دي تشوف ازاي بيتعاملوا مع الضعيف تنبهر الحقيقة.. بيحضنوه ويستوعبوه، مش بيعايروه ولا بينبذوه الحيوانات فاهمة إن الضعيف دا مش ذنبه إنه ضعيف وفاهمة إن ضعفه دا مش مبرر عشان نسحب منه الأمان.. اللي عنده أمان عنده قوة اللي عنده أمان عنده بصيرة اللي عنده امان عارف الحقيقة اللي عنده أمان ربنا بيحبه والناس بيحبوه.. انا شخصيا قررت إني هبدأ بنفسي من النهاردا هوزع الأمان على كل حاجة، هحاول أحب نفسي أكتر وأحس بالأمان اكتر.. هقبل عيوبي وعيوب الناس.. هقبل ضعفي وضعق الناس.. مش هحكم على حد بحاجة ولا هبص لحد بعين انتقاص مهما كان موقفه ومهما كان هو بيعمل ايه معايا، مش ذنب حد أي حاجة.. هوزع الأمان هسمع الناس هحضنهم هحس بيهم هحبهم..

هل كانت هذه المعلومات مفيدة؟

0

0