نصايح من قلبي لطلاب تالتة ثانوي

Pineapple_60236 🇪🇬

منذ أسبوعين

اخواتي وحبايبي اللي داخلين 3 ثانوي أو اللي لسه مخلصينها، عايز أتكلم معاكم شوية من قلبي .. أنا كنت ثانوي أزهري وكنا بندرس 21 مادة لما كانوا الثانوية العامة بيدرسوا 7 بس، يعني الوقت اللي بتاع ثانوية عامة مطلوب منه يذاكر مادة واحدة احنا كنا بنذاكر 3 مواد في نفس المدة الزمنية.. عندنا في الأزهر مفيش علمي رياضة وعلمي علوم، انت في العلمي بتدرس الاتنين على بعض.. فدا مستوى أصلا عايز تنين مجنح مش بني آدم 🤓🤓🤓 بالنسبالي بقى كنت عبيط زي كل العبط وكنت داخل علمي قال ايه عايز أدخل هندسة، وانا أصلا بعدي في الفزيا والكيميا بالعافية، كنت مهتم ساعتها بكل حاجة إلا الدراسة والمذاكرة.. وعلى فكرة مش ندمان على دا ولو عاد بيا الزمن هعمل كدا تاني.. المهم يعني ما جبتش مجموع هندسة بلاعات حتى، والتنسيق دخلني كلية أول مرة أسمع عنها وكنت رايح مش فاهم انا بعمل ايه هنا وانا مين وايه الناس دي وبيعملوا ايه.. ولا شايف مستقبل ولا شايف ماضي، عامل زي ما اكون اترميت في نص البحر ومش معاك عوامة والدنيا ليل ومفيش جزيرة جنبك ومطلوب منك ما تغرقش 🤓🤓 فطبعا بعد توهة وفرهدة ودوخة كتيييييير جدا عرفت اوصل لأول قرار واهم قرار ساعتها وهو اني محتاج ما اغرقش.. وخدتني رحلة طوييييييييييييلة قعدت في الكلية 9 سنين، اللي هو دفعتني بقوا معيدين وانا لسه طالب.. في الفترة كنت بعمل حاجة واحدة بس ما بعملش غيرها وحاطط فيها كل اهتمامي ومركز عليها بكل وجداني، الخاجة دي هي إني أعرف نفسي، وليذهب العالم بكليته وجامعته ودراسته ومجتمعه وقوانينه وناسه وكل حاجة إلى الجحيم.. والحمد لله ربنا ما سابنيش ولا لحظة يعني في الرحلة دي وعلمني ووراني ولسه بتعلم وبشوف.. فاللي عايز أقوله بعد الرغي دا كله، وانا مش آسف على الإطالة لأنه كلام مهم واللي مش عايز يقرا براحته.. سواء كنت انت داخل على 3 ثانوي فاعرف كويس ان دي مش نهاية الدنيا، ولا حتى بدايتها، انت يا دوب كدا بتدور على المفتاح اللي هتفتح بيه الباب.. فاتعامل مع الموضوع بهدوء وتقبل فكرة انه عادي ما تحققش كل اللي بتحلم بيه عشان كدا كدا هتحقق حاجات تانية.. ولو كنت حضرتك لسه خارج من الثانوية ورايح كلية بتحبها وعارفها أو التنسيق هو اللي وداك فاعرف ان كل اللي هتدرسه دا ملوش أي معنى حقيقي وإن شغلك وتعليمك فعلا فعلا هيبدأ بعد ما تخلص السحلة دي، فخليك مستعد عشان انت يادوب كدا بتحط المفتاح في الباب، لسه ما تعرفش فيه ايه جوا ومحدش هيقدر يقول لك غير لما تجرب وتفشل.. فتقبل الفشل وتعامل معاه ما تهربش عشان هيفضل يجري وراك مهما حصل... دي مش دعوة للتهاون أو استصغار الطريق، بالعكس دي دعوة لمعرفة ان كل مرحلة بنخلصها فاللي بييجي بعدها بيبقى أصعب فكونوا مستعدين واستعينوا بالله ولا تخافوا ولا تحزنوا.. أتمنى ربنا يدي لكل واحد اللي يستحقه فعلا 💚💚

هل كانت هذه المعلومات مفيدة؟

0

0