ازاي تحل أي خلاف وتشوف وجهة نظر التاني؟

Pineapple_60236 🇪🇬

منذ يوم واحد

طيب ازيكو يا جماعة أي مشكلة في الدنيا بيبقى ليها مفاتيح للحل.. المفاتيح دي بتختلف من مشكلة لمشكلة ومن حالة لحالة، بس دايما دايما كلهم بيلعبوا في نفس المنطقة، وجهة النظر.. اعرف انت باصص منين هتعرف جزء كبير من الحل، وهتفهم ليه فيه مشكلة أصلا. أنا شخصيا دخلت في صراعات كتير واختلفت كتير مع ناس ياما ودايما كنت ببقى شايف ان وجهة نظري هي اللي صح وان ما ينفعش حد يشوف غير اللي أنا شايفه. ومشكلة الكلام دا أصلا إن معظم الحاجات اللي فيها وجهات نظر مختلفة في الحقيقة هي مطاطة جدا وبتستوعب كل وجهات النظر عادي الموضوع عامل بالظبط زي رقم 6 ورقم 9 بالإنجليزي، اللي واقف من ناحية هيشوفها كدا واللي الناحية التانية هيشوفها كدا، وممكن يفضلوا يتخانقوا للصبح ومحدش فيهم هيقتنع غير لما يبص من عند التاني.. بس اكتشفت ان احنا في الخلافات -بسبب الموروث الاجتماعي غالبا- ما بنعملش كدا بل بالعكس بنمسك في وجهات نظرنا أكتر وبيدخل الشعور بالكبر والغرور، اللي هو انا لا يمكن أطلع غلط دا هو اللي حمار ومش فاهم حاجة.. ومن هنا بتبدأ المشكلة تكبر فعلا وتتحول لصراعات شخصية.. طب ايه الحل يا عم النابغة؟ الحل بسيط خالص أول حاجة افصل نفسك عن المشكلة، تاني حاجة دور على المفاتيح بتاعة الحل.. وأناناس بيضحي وهيقول لك على 3 حاجات لو عرفت تلاقيهم في أي مشكلة هتعرف تحلها بسرعة جدا، أول مفتاح هو ايه هي المشكلة أصلا؟ وجاوب إجابة منصفة بدون اتهامات لنفسك ولا للطرف التاني، يعني مثلا ممكن تبقى المشكلة إن أنا شايف نتصرف كدا واللي قدامي شايف نتصرف كدا.. تاني مفتاح هو ليه شايفين كدا؟ فهلاقي مثلا أنا شايف ان دا الحل عشان عندي تجارب سابقة مشابهة واتصرفت فيها بالطريقة دي. طب هو ليه شايف كدا؟ لو عارف سبب هقوله ولو مش عارف هسأل عادي مش عيب، احنا عايزين نحل في النهاية مش عايزين نتخانق.. تالت مفتاح دا بقى هو الزتونة، ازاي أقدر أوريه وجهة نظري بعد ما شفت وجهة نظره؟ وبصراحة دا من أصعب المفاتيح لأن هنا بس بتبان صفاتك الشخصية وبنيتك الداخلية في الموقف دا، ودا أكتر سؤال نفوسنا بتهرب منه وبتلغوش على الإجابة.. بس كدا

هل كانت هذه المعلومات مفيدة؟

0

0