الحب خدعة.. والإحساس هو اللي موجود

Carrot_52708 🇪🇬

منذ أسبوع واحد

بعد سنين طويلة من التجارب في الشغل والحياة، وصلت لحقيقة صادمة: الحب خدعة. إنت مش بتحب حد، إنت بتحب إحساس. ومش بتكره حد، بتكره إحساس. إحساس الاهتمام، إحساس الأمان، إحساس الراحة… إحساس بيخلي قلبك يفرح أو يتوجع، مش الشخص نفسه. كل ما قلبك فرح بسبب حد، في الحقيقة ده كان إحساسك مش الشخص. وكل ما اتوجعت بسبب حد، برضه ده الإحساس اللي اتجرح، مش الشخص. الكلام عن روميو وجولييت وقيس وليلى وكل القصص الرومانسية اللي اتربينا عليها… كله ridiculousness. خيال وردي مالوش أي علاقة بالواقع. شفت ناس بتحلف بحبها وبتقعد على كلام كبير، وبعد فترة بسيطة كل الكلام ده بيتفك، وكل الوعود والدموع بيبقى معاها جفاء أو خيانة. شفت ناس بتكره حد بسبب موقف، وبعد فترة الإحساس يروح ويختفي الكره معاه. كل المشاعر الكبيرة اللي كنا شايفينها صلبة، بتتبدل أو تختفي، وكل اللي حوالينا بيأكد إن الحب مش مطلق ولا دائم. الحب جي من الخيبة… من التجارب اللي بتخليك تعرف مين يستاهل ومين لا. من خيبات صغيرة أو كبيرة في الشغل، في الصداقات، في العلاقات كلها. الحب مش حاجة حقيقية مستقرة، ده إحساس مؤقت بيتغير مع الظروف. وكل مرة حاولت تصدق الخيال ده أو تحط رجلك في وهم وردي، كل مرة خيبتك كانت أكبر. اتعلمت حاجة مهمة جدًا: خلي علاقاتك رمادية. متحبش حد زيادة، وما تكرهش حد زيادة. خد بالك من قلبك. اللي بيحب زيادة بيتعلق وبيتوجع، واللي بيكره زيادة بيحرق نفسه قبل ما يحرق غيره. لما تكون رمادي، بتتعامل مع الناس على أساس اللي يستحقوه، وبالحدود اللي تحميك من نفسك ومن خيبات أكبر. ومتجيش على نفسك عشان حد. ومتضحّيش بنفسك عشان مشاعره أو قراراته. ومتعلّبش دور المنقذ لأي حد، انقذ نفسك الأول… زي ما ربنا قال: "عليكم أنفسكم". لما تحمي نفسك، لما تحافظ على مشاعرك وتحط حدودك، هتقدر تعيش حياتك أهدى، من غير صداع أو وجع أو خيبات أكبر. الحب مش حقيقة… الحب مجرد إحساس مؤقت. إحساس ممكن يجي من الاهتمام، أو من الراحة، أو من الشغف، لكنه بيتغير مع الوقت، يختفي أوقات، وييجي أوقات. اللي يعرف يسيطر على إحساسه ويخلي علاقاته رمادية، هو اللي هيعيش أهدى، من غير وجع زيادة أو خيبات أعمق. وبالنهاية، لازم تعرف حاجة مهمة: الرحلة فردية. حياتك، إحساسك، قراراتك… كل حاجة فيك مسؤول عنها أنت. محدش هيكملك، محدش هيعيش حياتك بدل ما تعيشها. كل اللي حواليك مجرد ناس بتدخل أو تطلع من حياتك، لكن الطريق اللي هتمشيه لازم تمشيه لوحدك. متديش حد السلطة إنه يتحكم في إحساسك أو يحدد قيمتك. احمي قلبك، وحافظ على حدودك، وعيش حياتك من غير وهم المشاعر اللي مش حقيقية. أنا دلوقتي مؤمن بالحقيقة دي… الحب وهم، الإحساس اللي بيخلينا نضحك أو نتوجع، هو اللي موجود. كل ما حاولت تصدق الخيال ده، كل ما زادت خيباتك. متحبش حد زيادة، متكرهش حد زيادة، خليك رمادي، ومتجيش على نفسك عشان حد. الرحلة فردية… وده أهم درس اتعلمته.

هل كانت هذه المعلومات مفيدة؟

0

0