قصص ملهمة

Ice Cream_31922 🇪🇬

منذ أسبوع واحد

شعور شاعر بالملل

مرة حسيت حياتي اتقلبت 180 درجة في يوم واحد! كنت دايمًا عايشة حياتي عادي، نفس الروتين كل يوم، المدرسة، البيت، نفس الكلام، ومفيش حاجة تفرح أو تغير مودّي. بس في يوم حصل موقف غريب، مش هقدر أنساه طول حياتي. كنت ماشية في الشارع الصبح، وفجأة لقيت قطة صغيرة واقفة لوحدها، شكلها تعبانة وبترتجف من البرد. قلب

Banana_56622 🇪🇬

منذ شهرين

شعور فخور

موضوع:

ايه نقطة التحول في حياتك ؟

Peanut_56462 🇪🇬 سبحان الله دى تتلخص فى عسي أن تكرهوا شيئا وهو خير لكم ان ربنا مخلهوش يكمل فى طريقة الارتباط اللى حرام اصلا وبقا شخص ناجح فى حياته وشغلو

عرض الكل 22 نصيحة

عبّر عن شعورك بشكل مجهول

هي مش قصتي انا بس قصه تستاهل انك تسمعها 
هي قصه محمود صديقي في الكلية 
محمود كان شاب بسيط محترم من الارياف وهو من أحد اصدقائي المقربين لحد دلوقتي محمود كان عايش في بيئه مغلقه شويه ومتربيين علي الأصول والاحترام مكنش عندهم الانفتاح الرهيب اللي عندنا ،محمود لما دخل الكليه كان متفاجئ باالبس بتاع البنات كان وكان تعليقه أن دول خارجين من اوضه النوم 😂😂 ،وكان مستغرب جدا من البنات اللي واقفه مع الشباب والبنات بتضحك بصوت عالي وكان بيقولي دول لو عندنا في البلد كنا طخيناهم عيارين (ضربوهم بالمسدس) وكان بيقولي أن كل لما يدخل الجامعه يحس أنه دخل النار من اللي بيشوفه ،المهم عدي شهر فالتاني والثالث و لقيت محمود بيقولي عارف البنت فلانه اللي معانا في السكشن قولتله ايوه اعرفها مالها ؟ قالي احنا ارتبطناوكانت صدمه بالنسبالي !!! ازاي الشاب محمود يعمل كده !!
قعدوا مع بعض شهرين مرتبطين ومحمود اتعلق بيها جدا جدا لانها كانت أول واحده في حياته وهرمون الاكسوتوسين (هرمون الحب) كان ضارب في السماء ..فالمهم .اخر يوم امتحانات محمود كان زعلان جدا ومكنتش راضي يكلم حد شوفته كان بيدمع في الامتحان ومش عارف يحل لحد لما خرجنا من الامتحان وقعدنا لواحدنا واصريت اعرف ايه اللي مزعله للدرجه دي انفجر بالبكاء وقالي فلانه قالتله (انتا مش مناسب ليا !!! وانا استحق واحد احسن منك ) محمود كان مصدوم من اللي قالته خصوصا أن عمره ما زعلها وكان يتمنلها الرضا ترضي وفي الاخر تسيبه كده وكمان تقوله (انا عمري ما اتجوز واحد زيك فلاح جاي من ورا الجاموسه )!!!!!!!! ...فالمهم اليوم ده خرجته وخليته يفك شويه وقضينا اليوم سوا وعلي صلاه المغرب روحنا الموقف عشان كل واحد يروح البلد بتاعته 
وساعتها انقطعت اخبار محمود عني !!!!!!!!
مكنش معايا ساعتها وسيله تواصل غير رقم تليفونه وكان مقفول طول الاجازه وحتي معرفتش اوصل لأهله أو لاي حد اتطمن عليه حتي وقعدت ٣ شهور الاجازه في حيره الواد ده فين ؟ يا تري عمل حاجه في نفسه ؟ 
فالمهم خصلت ال٣ شهور وفاضل اسبوع عالدراسه بجرب ارن علي محمود عالعاده زي كل اسبوع لقيت التليفون بيرن بس محدش بيرد ...بعدها ب ١٠ دقائق لقيت رقم محمود بيرن عليا رديت فورا وعاتبته جدا علي اللي عمله ده وقالي لما نتقابل هتفهم كل حاجه !!طيب قولي طيب كنت مختفي فين ؟ محمود يرد ويقولي لا لما نتقابل ....اجي يوم الأحد اول يوم دراسه وعايز اشوف محمود وفعلا اتقابلنا وكنت مبسوط فشخ اني شوفته بس مكانش محمود اللي انا اعرفه ،محمود بقي محمود برو ماكس 😂 محمودكان تخين  خس جدا وبقي جسمه متقسم ...محمود زمان كان لبسه بسيط محمود بقي لبسه شيك جدا جدا وشكل الهدوم حلو عليه عشان كان جسمه ظبط جدا +.محمود حاطط برفيوم حلو فشخ ..وفي فرق واضح جدا في شخصيته وطريقه كلامه و عنده كاريزما بأختصار مبقاش محمود اللي انا كنت اعرفه بقي شخصيه احسن بكتير وكنت مبسوط فشخ بالتغير اللي هو عمله ده...ساعتها كرفنا المحاضره الأولي وقعدنا في كافتيريا الكليه وحكالي محمود أن آخر يوم امتحانات اليوم اللي فلانه سابته فيه كلامها خلي جوااه نار عايز يطلعها في حاجه قالي انا مختارتش اني اطلعها في بكاء عليها وابقي شبهي شبه النسوان قالي انا قررت اتغير ابقي شخص احسن وكما كلامه وقالي أن فعلا زمان انا مكنتش احسن حاجه وانا لو بنت مش هفكر ابصلي اصلا وكمل كلامه وقالي ساعتها قرر يروح الجيم يطلع طاقه الغضب اللي فيه وكان اول مره يروح في حياته جيم وحب الجيم جدا وكان ملتزم كل يوم فالجيم وكمل كلامه وقالي أنه اشتغل ٣ شغلانات !!!! الصبح في الأرض مع أبوه بعد الظهر كان شغال ماركتينج ولما يخلص بينزل علي توكتوك خاله ٣ أو ٤ ساعات ...بيقولي اكتر شغلانه اثرت فيه هي شغلانه الماركتينج قالي لازم اكون لابس شيك وانا ببيع وكلامي يكون منظم وريحتي كويسه ساعتها كنت مبسوط جدا من محمود وكنت مبسوط من اللي هو عمله ...محمود في ٣ شهور اتحول لبني آدم تاني احسن بكتيير وبقي شخص مختلف للاحسن ومن ساعتها محمود بيطور في نفسه كل يوم لحد دلوقتي 
محمود لما اتخرجنا من بيطري محمود بدأ يربي دواجن ومحمود دلوقتي صاحب شركه دواجن معروفه مش هقدر اقول اسمها حفاظا علي خصوصيته وعلي فكره هو مسموش محمود ... قصه بدأت من شخص جرحه ومكنش مستقبله الي شخص من أنجح الشخصيات اللي عرفتها في حياتي 
مستني تعليقاتكم عن القصه

Carrot_41739 🇪🇬

منذ 6 أشهر

شعور عاطفي

بحب اوي اقعد مع الناس الكبيره و اسمعهم و أتعلم منهم كل واحد بيبقى عنده قصه حلوه و ذكريات و مشاعر عاشها و هم بيحبو أنهم يحكو واحنا نسمعهم لو حد مر بموقف مع حد كبير و استفاد او خد نصيحه و فرقت معاه يفيدني

Kiwi_34583 🇪🇬 مره كنت ماشي غي الشارع لقيت راجل كبير عجوز و قفني قالي ينفع تقعد معايا قعدت فعلا و فضل يحكيلي و قالي انه كان ملاكم و وراني مناخيره المكسوره و ودانه منفوخه و كان زي العسل قعد يوريني حركات هو اتعلمها كان موقف لطيف اوي 💕

عرض الكل 4 نصيحة

Coffee_21153 🇪🇬

منذ 7 أشهر

شعور لا مبالٍ

بعيد نشر حاجات كنت منزلها قبل كدا لعل حد يستفيد ومتنسوش جدودي الله يرحمهم من دعائكم جالي فلاش باك شريط حياتي كلها عدى قدامه اكتشفت ان انا عشت حياه لو حد تاني عاشها كان جاله توحد واكتئاب وكل الامراض النفسيه عشان كدا قررت احكي لعل وعسى حد يستفيد انا تقريبا عديت بكل المشاكل اللي اي انسان ممكن بمر بيها

عبّر عن شعورك بشكل مجهول

بعيد نشر حاجات كنت منزلها قبل كدا لعل حد يستفيد
ومتنسوش جدودي الله يرحمهم من دعائكم

جالي فلاش باك شريط حياتي كلها عدى قدامه اكتشفت ان انا عشت حياه لو حد تاني عاشها كان جاله توحد واكتئاب وكل الامراض النفسيه عشان كدا قررت احكي لعل وعسى حد يستفيد انا تقريبا عديت بكل المشاكل اللي اي انسان ممكن بمر بيها مش تعظيم ف نفسي ولا بقول ان انا مظلوم ولا كل الكلام دا 
اولا التنمر انا ممكن اكون اكتر انسان تشوفه ف حياتك اتعرض للتنمر سواء على شكل جسمي طولي شكل سناني ومع ان لون بشرتي ابيض الا اني كنت بتعرض للتنمر عليها برضو والتقيله كمان ع اسمي كل دا وانا طفل عنده ست سنين من اول ما دخلت مدرسه وانا بتعرض للتنمر 
نبدا اول حاجه بجسمي انا كنت نحيف وقصير جدا يعني كان الواحد اللي ف سني قدي مرتين طول وعرض وهاتك بقا تنمر من الاطفال اللي ف سني ايدا انت اوزعه عود قصب خله سنان وكل الكلام دا وانا كنت بقابل كل دا بوجه مبتسم عادي جدا ولا كأن في حد بيتكلم مع ان انا طفل المفروض اروح اعيط لامي واشتكيلها بس سبحان الله كنت عادي جدا وواخد الموضوع ببساطه وبالعكس انا كنت بحاول اتخن مش عشان التنمر ولا عشان ارضي حد كان عشان نفسي انا مكانش عاجبني شكل جسمي بس لنفسي اي حد ملوش دعوه بشكلي وزود عليها ان انا مولود باسنان معووجه او منحنيه لجوه كل سناني معووجه وفي فرق بين اسناني اللي قدام وتنمر عليها بردو بس دي انا كنت بقول هعمل تقويم لما اكبر عادي 
لون بشرتي ابيض عادي جدا وكان شعري دهبي كمان بس بسبب جهل الاطفال اللي معايا ومن غبائهم كانوا بيتنمروا عليا مع ان اي حد هيقول دي حاجه جميله الا ان دول تنمروا بمعنى كان لما حد يشوفني يقولي انت عامل زي البنات وانت بنت اجنبيه وعامل زي الاجانب وانا كنت بقابل الموضوع ببساطه وبالعكس كنت بقول دا هما متغاظين المشكله اللي بيتنمر دا كان شعره اكرت وسنانه صفرا وبشرته سوده ( طبعا مع احترامي لاي شخص بشرته سوده او غامقه دي مش حاجه تعيب فيك بالعكس انت ممكن تكون اجمل مني عادي ) انا بتكلم ف مبدا ان انت اصلا مختلف عني يعني ممكن اتنمر عليك عادي بس عشان انا محترم وعارف ان انت زيك زيي عند ربنا وخيركم عند الله اتقاكم مش ابيضكم بشره مكنتش بعلق ع شكل اي انسان 
كانوا بيتنمروا ع طولي حتى بعد ماكبرت بقوا يقولوها بصيغه هزار  يعني مثلا وانا كبير بنت عمي كانت مخطوبه جديد ف بتقول خطيبها بهزار كدا تدي دا كام سنه قالها رابعه او خامسه ابتدائي وانا ساعتها كنت داخل ثانوي شايف الفرق الكبير ف السن اللي هو شايفه لو اي حد اتقاله الكلمه دي هيشيل جواه ويكره حياته انما انا خدتها عادي جدا 
نرجع تاني لما كنت طفل انا دخلت تلت مدارس وانا ف ابتدائي مش بسبب التنمر القصه ان انا مولود ف 12/2007 تقديم المدرسه بيقبل من شهر 10 يعني كدا انا المفروض اقدم ان انا 2008 واضيع العشر شهور دول او بمعني اصح اضيع السنه كلها ابويا طلع عينه معايا انه يدخلني السنه دي وقعد يلف لحد ما توصل لحل وهو انه يقدملي ف مدرسه ف بلد تانيه بعيد ويقدم طلب ان انا ادخل المدرسه القريبه مستمع( مستمع يعني مليش بسكوت ولا كتب ولا ليا اي علاقه بالمدرسه بحضر الحصص فقط ) الكلام دا كان ف اولى ابتدائي اول يوم مدرسه عدى عادي تاني يوم بدا تسليم البسكوت للاطفال وانا طبعا قاعد ف الفصل جه العامل اللي بيسلم البسكوت اداني كيس زي باقي الاطفال وانا ساعتها معرفش ان انا مليش بسكوت طفل فرحان وتيجي المدرسه وتروح واخداه من ايدي وتقوله لا دا مستمع ملوش بسكوت زعلت اوي ساعتها طفل صغير فرحان بالبسكوت روحت البيت وتقريبا دي كانت المره الوحيده اللي اشتكيت فيها لامي روحت اترميت ف حضن امي وقعدت اعيط بحرقه طفل صغير وحكيتلها الموقف قالتلي متزعلش المدرسه التانيه هتبعتلك البسكوت بتاعك طبعا مفيش بسكوت ولا حاجه بس انا فرحت المهم جيت تاني يوم روحت خالتي قابلتني وقالتلي خد البسكوت بتاعك اهو من المدرسه التانيه ( خالتي ساكنه معانا ف نفس البلد وجنبها مدرسه ازهر وانا كنت مقدم عام بقت تشتريلي كيس البسكوت من الاطفال اللي ف المدرسه الازهر وتقولي خد بعتينلك دا) وانا كنت بفرح اوي ساعتها ربنا يجازيها خير زي مكانت بتجبر بخاطري كل اللي كان مضايقني ساعتها ان انا عمي مدرس ف نفس المدرسه وابنه قدي وقاعد جنبي كان ييجي يديه بسكوت زياده للبيت وانا ولا كأني قاعد جنبه 
المهم انا كنت مقدم ف المدرسه البعيده دي وبروح هناك ساعت امتحانات الفاينل بس المدرسه دي كانت ازهر يعني دينيه بيدرسوا قرءان وكدا  وانا كنت بحضر ف مدرسه عام يعني مش حافظ قرءان جت امي ربنا يخليها حفظتني قبل الامتحان وعدت الحمد لله كل دا وانا ف اولى ابتدائي

ندخل بقا ع تانيه ابتدائي المدرسه الازهر اللي جنب خالتي فتحت تقديم صغار السن يعني بيقبلوا صغار السن عادي ابويا قدملي هناك طبعا وانا كنت داخل المدرسه مش عارف حد ولا كان عندي صحاب  خالص كنت متوحد وانطوائي وكنت صاحب نفسي كنا لما تطلع بريك كنا ننزل حوش كدا واللي يلعب مع صحابه واللي ياكل معاهم وكان مسموح لينا نخرج برا المدرسه عادي بس نرجع تاني اول ما البريك يخلص بحكم ان انا مليش صحاب هقد جوا ليه المهم المدرسه كانت ملحقه بمسجد كبير كانوا الاتنين لازقين ف بعض وانا كنت اطلع الف لفه حوالينهم والبريك يخلص وادخل تاني وجه اليوم اللي صاحبت فيه اول صاحب ليا انا كنت اول مره اقف ف الحوش ف البريك وما اطلعش برا وجم شويه ولاد اكبر مني ب حاولي تلت او اربع سنين بيتريقوا عليا وانا طنشتهم وجه واحد يضايقني وضربني بالقلم كان ساعتها الولد اللي بقا صاحبي دا واللي اسمه خالد مكانش واقف معاهم بس جه على لحظه القلم وجه وزعق لصاحبه واتخانق فيه وجالي صالحني وقعد معايا ساعتها مكونتش عايز البريك يخلص عشان افضل قاعد معاه المهم اتصاحبت عليه وبقيت اوقات امشي معاه وانا راجع البيت كان صحبي اوي ربنا يجازيه خير لسه عارفه لحد النهارده 
جه بقا اليوم اللي غير حياتي 180 درجه احنا الفصل عندنا كان 20 طالب يعني كان صغير بس انا مكنتش مصاحب حد المهم كنت ف البريك وخالد غالبا كان غايب وجم تلت ولاد اكبر مني بسنه كانوا بيجروا ورا بعض وواحد شدني وقعني على الارض وانا تلقائيا شتمته او زعقتله الواد معجبهوش الكلام قام جاي هو وصحابه عايزين يضربوني وانا افجرت مع اني هادي جدا جدا بس مسكت التلاته ساعتها كلتهم علقه لحستهم تراب الحوش وطلعت اجري على الفصل ولاول مره اعيط برا البيت قعدت اعيط بحرقه جامد اوي وكنت حاطط راسي على الديسك وبعيد فجاه سمعت صوت حولي برفع عيني لقيت العشرين واحد اللي معايا فالفصل ملمومين عليا وسمعتهم بيقولوا هنقول للاستاذ متخافش ساعتها فرحت اوي من قلبي ان في حد بيطمني واللي فرحني اكتر ان هما عارفين اسمي ولقيتهم راحوا جري ندهوا المدرس وقالوله الحق حذيفة بيعيط ولحسن الحظ نفس المدرس كان عليه الحصه دي لنفس الفصل اللي فيه التلت عيال خدني من ايدي وقالي شاولي عليهم وكمل عليهم ضرب ساعتها فرحت اوي ان العيال اللي معايا ف الفصل عارفيني ومن ساعتها بدات اتعرف عليهم كلهم واتصاحبت عليهم بس بردو التنمر مسابنيش ف حالي 
زي ما قلت انا اسمي حذيفة على اسم الصحابي حذيفة بن اليمان رضي الله عنه
انا ابويا شيخ واحنا عيله متدينه الحمدلله وكل اسماءنا انا واخواتي اسماء الصحابه رضي الله عنهم 
( حذيفه، بسام، اسماعيل، جويرية، معاويه، وماريه )
كنت بتعرض للتمر بسبب اسمي انا كنت الوحيد ف البلد اللي بالاسم دا كان بقا اللي يقول دا اسم بنت والي يقول زوحليقه حفيزه وحاجات كتير كدا المهم انا اللي مستغربه من نفسي دلوقتي هو ان انا عمري ما اشتكيت لامي من  تنمر على اسمي لان انا مكونتش بتضايق اصلا يعني سبحان الله مع اني طفل الا ان انا ايماني كان قوي كنت بقول مانتوا جهله ازاي مسلمين ومش عارفين الصحابي حذيفة وكنت بقول الكلام دا لاي حد كان بيتريق حتى ان في مدرس اتريق على اسمي وقولتهاله بالنص انت ازاي مسلم ومش عارف الصحابي حذيفة بن اليمان المدرس تنح واتكسف ومن ساعتها مقدرش يتتريق على اسمي مع ان انا وغيري وناس كتير جدا شايفين ان اسمي من اجمل الاسماء اللي ممكن طفل يتسمى بيها 
انا دلوقتي 17 سنه ولحد دلوقتي بقابل ناس جاهله كتير مش عارفين الاسم وبيتتريقوا حتى وانا بحجز الدروس في مدرس بيستظرف وبيقولي انت متاكد انك ف اولى ثانوي( لما كنت لسه ف اولى ) وبيضحك ع اساس انه يضحك الاسيستنت وكدا قومت كسفته وقالتله اه قالي دا جسم واحد ف اولى ثانوي قولتله اه تحب اجيبلك شهاده الميلاد قام ساكت واتخانقت طول الثانوي ف اكتر من اسيستنت بسبب انهم بيكتبوا اسمي غلط او ينطقوه غلط ومصرين انهم صح يعني مره كنت بسجل حضور بقول لاسيستنت تكب اسمي بقولها حذيفة قامت التانيه تقول حذيف اقولها لا حذيفة تقول لا حذيف قومت موقف الدور ووقفت الناس اللي ورايا ومسيبتها الا لما قالت حذيفة
دلوقتي انا 17 سنه ثانوي عام 2025 الحمدلله من اكتر الناس اللي اجتماعية ف دفعتي اتعرفت ع ناس كتير جدا جدا جدا ومحبوب جدا وسط الناس  ووسط دفعتي ووسط مدرسيني وحتى الاسيستنت كلهم يعرفوني وبيحبوني وطولت وطولي بقا 170 ووزني حاليا 50 كيلوا لسه رفيع بس بحاول ازيد وحتى لو مطولتش او زيدت انا متقبل نفسي وبحب نفسي زي ما انا ومش مستني راي حد فيا  
فالنهايه حابب اقول متوقفش حياتك عشان حد خلي ايمانك قوي وواجه اي حد يتتريق عليك بالعكس خد التمر وحوله لطاقه ايجابيه وحسن من نفسك عشان نفسك ومتسمعش كلام حد وتخليه يوقفك او يزعلك حتي لو بيهزر او بيتكلم جد قوله تمام وولا كأنك سمعت منه حاجه 
دا كان جزء من حياتي اتمنى يكون استفادتوا منها اي حاجه ولو استفدت دعوه حلوه منك وربنا يوفقنا جميعا ❤

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Almond_56393 🇪🇬

صراعات جوايا وخوفي من الفشل

جوايا صراعات كتير قدامي اختيارات احلاهم مُر او أحلاهم اني مستسلمش واخد مهدئات عشان أقدر أكمل بحاول اغير حاجات كتير ف حياتي ، والتغيير المرادي عنيف لإنه في كل حاجة.. أوقات بفكر ارجع تاني لل safe zone بتاعتي بس مكنتش عجباني حياتي وقتها ، وعشان كده بحاول اتغير.. مش عارف بتمنى أنجح وخايف من الفشل بس لو فشلت هكون رجعت لل safe zone، هل ده وحش ؟ معرفش بس انا مش راضي عن حاجة وعشان كده بحاول.. ...عرض المزيد

0 الدعم

0 نصيحة

Pineapple_51151 🇪🇬

ليه معتش عندي صحاب بجد؟ الانانية وجع

هو ليه الواحد معتش عنده صحاب بمعني صحاب انا عارف ناس كتير مفروض انهم صاحبي لكن مفيش حد معاك كان نفسي يكون عندي اخ ولد كانت هتفرق مع ان بسمع ان بيبقي ف مشاكل بنهم هو ليه الانسان اناني ومش بيفكر ف حد غير نفسه ومصلحته ليه محدش بيقف مع حد ولا ممكن انا اللي اخترت غلط مش عارف ...عرض المزيد

0 الدعم

6 نصيحة

Strawberry_73609 🇪🇬

هل البعد عن أهلي قرار سليم بعد طلاق وضرب وسب؟

انا مطلقه بدون اولاد أهلى كانو سبب الجوازة دى من كتر الضغط النفسي منهم وافقت مكملتش ٦ شهور واتطلقت وحقوقى كلها طليقي استولى عليها واتجوز على عفشي وحاجات الخاصه عملت قواضي بس لسه المحاكم حبالها طويل المشكله ف أهلى كل شويه سب وضرب فيا لدرجة الخوض في عرضي وشرفى انا عندى ٣٥ سنه قدامى فرصه انى اسافر شرم الشيخ اشتغل هناك واكون حياة هاديه هناك عايزة ابعد عنهم لأنهم حتى لما بيجيلي عريس بيعملوا حاجات مش لطيفه يخلوه يمشي انا عايزة اعرف هل لما ابعد عنهم دا قرار سليم؟ ...عرض المزيد

1 الدعم

6 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع