صرخة

Popcorn_52020 🇪🇬

منذ يومين

شعور مكتئب

عبّر عن شعورك بشكل مجهول

فيه نوع من الإنهاك مش بيبان في الملامح، ولا في نبرة الصوت، نوع بيأكل في الروح نفسها، يخلّي الواحد صاحي كل يوم وهو مش قادر يبلع يومه. مش تعب جسد، دا تآكل صامت فـ النفس… إحساس إنك فاضي من جوا، فاضي جدًا، ومع ذلك شايل فوق طاقتك بكتير.
الناس تقولك "كلنا كده، مش لوحدك"، طب تمام… وبعدين؟ أنا كده المفروض أفرح؟ أقول الحمدلله إن الكوكب كله بيغرق؟ هو دا المفروض يطمني؟ يديني سلام نفسي يعني؟ أنا هستفاد إيه من فكرة إننا بنتوجع سوا، غير إننا كلنا بنموت ببطء وجماعيًا؟
المصيبة مش بس في الألم، المصيبة الحقيقية في اللي حواليك… في اللي مش فاهمك، ولا عايز يفهم، اللي طول الوقت بيطالبك تكون كويس، تبقي عادي، تضحك، تمشي الحياة كأن مفيش حاجة… وفي اللحظة اللي تفلت فيها، يقولك: "مالك؟ شد حيلك بقى"، كأن كل اللي فيك دا مجرد كسل أو دلع.
اللوم كله على الناس اللي مش قادرة تشوف غير من منظورها، اللي بتختزل كل حاجة في "عدي"، اللي بتشوفك بتغرق وتقولك "اتعلم تعوم"، الناس اللي بتفتكر إن الصبر هو حل سحري، وإن الحياة لازم تتعاش حتى لو قلبك بينزف كل يوم بصمت.
فيه وجع ملوش ملامح، بيتمشى معاك في الشارع، ويقعد جنبك وانت ساكت، ويدخل سريرك آخر الليل، وينام جوا دماغك… والكارثة؟ إنك مش عارف تقوله لحد. وإنك بعد كل دا… بتلوم نفسك.
دي مش مرحلة وبتعدي… دي صرخة مكتومة عايشة في ناس كتير، بس للأسف… الدنيا مش بتسمع الصوت اللي مش مسموع.

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Popcorn_52020 🇪🇬

منذ أسبوع واحد

شعور مرهق

عبّر عن شعورك بشكل مجهول

مشكلتي الحقيقية إن كل مرة بحكي فيها عن حاجة وجعاني بلاقي الردود شبه بعض مكتوبة كويس منطقية محترمة بس مفيهاش روح اللي بيرد عليا بيقولي كلام مظبوط وكل حرف فيه صح بس كله محفوظ كأنك بتسأل عن انهيارك واللي قدامك بيرد من كتاب مش من قلب أنا مش بس عايز حل أنا عايز حد يحس السؤال قبل ما يسمعه عايز حد يحس بيا وأنا مش قادر أشرح مش يرد عليا بجملة عاقلة وأنا أصلا اللي فيه ملوش منطق كل مرة بسأل وبرجع أسأل نفسي بعدها هو أنا كنت مستني إيه هو أنا ليه سألت أصلا هو أنا كان لازم أتكلم طب ما هو الرد كان متوقع وكان عادي جدًا زيه زي أي رد مفيهوش اللي يطفي الحريق اللي جوايا أنا مش ببالغ ومش بدور على شفقة بس اللي بيحصل إني لما بتكلم وبلاقي الردود سطحية رغم إنها صح بحس إن وجعي مش مفهوم وبحس إني أنا اللي غلط وإن السؤال كان عبء مش استغاثة المشكلة مش في الناس المشكلة إننا بنرد على بعض عشان نجاوب مش عشان نحس بنقول اللي المفروض يتقال مش اللي الشخص محتاج يسمعه وأكتر حاجة موجعة إنك تكتب من قلبك وتاخد رد مفيهوش أي قلب إنك تصرخ بصوت واطي ومحدش يسمع إلا اللي فوق السطر إلا نادرًا تيجي كلمة من حد مش بيجامل حد حسك من قبل ما تفهم نفسك كلمة بسيطة بس بتطبطب على حتة محدش قدر يلمسها ساعتها بس بتحس إن السؤال كان مستاهل حتى لو مرة واحدة

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.