تايه في الدنيا

Peanut_85115 🇪🇬

منذ 11 ساعة

شعور مرتبك

فيه نوع من الناس بيبقوا تايهين كده في الدنيا، مش عارفين هم مين ولا عايزين إيه، وبيبقوا سايبين نفسهم للوقت يعدي من غير ما يحسوا بحاجة. تلاقيه قاعد وسط الناس بس حاسس إنه لوحده، بيضحك لما الناس تضحك، بس هو من جواه مفيش، فاضي، مش حاسس بأي حاجة. الشخص ده ممكن يكون مريض نفسي، ومش شرط يكون بيصرخ أو بيعيط

عبّر عن شعورك بشكل مجهول

الشخص ده ممكن يكون مريض نفسي، ومش شرط يكون بيصرخ أو بيعيط أو بيكسر حاجات زي ما الناس متخيلة. لأ، المرض النفسي ساعات بيبقى هادي، بيستخبى جوه الوشوش العادية، في الناس اللي بتقوم من السرير بالعافية، اللي بتاكل من غير ما تستطعم، اللي بتتكلم وترد بس كلامهم مفيهوش روح.

هو مش بارد، ومش قليل إحساس، بس هو تعبان، حاسس إنه تايه، كأن الدنيا كلها ماشية بسرعة وهو واقف مكانه، مش لاقي معنى لأي حاجة. حتى الحاجات اللي كانت بتفرّحه زمان، بقت عادية، أو معدتش بتفرق. الحب؟ الصداقة؟ الشغل؟ كلهم بقوا زي بعض، كأنهم مش بيأثروا فيه.

وساعات الناس حواليه مابتحسش بده، أو بتقول عليه إنه بيتدلع، أو بيفكر كتير، أو إنه لازم "يفوق"، بس الحقيقة إنه محتاج يسمع كلمة "أنا حاسس بيك"، محتاج حد ياخده على قد تعبه، مش يزقه أكتر.

اللي بيحس إنه تايه ومش قادر يلاقي نفسه، ده محتاج دعم، مش حكم. محتاج يسمع، مش يتقاله يعمل إيه. وساعات المساعدة بتيجي من حاجات بسيطة، من كلمة، من حضن، أو من زيارة لطبيب نفسي يقدر يفهمه ويحتويه.

احنا مش دايمًا بنشوف وجع الناس، عشان كده لازم نرحم بعض، ومانحكمش على حد من بره. لإن اللي شكله عادي، ممكن يكون من جوه مكسور وبيتمنى حد ياخده في حضنه ويقوله: "أنا هنا... وإنت مش لوحدك

وانا من الناس دي

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Blueberry_78247 🇪🇬

جوزي بيضربني وواهله بيحسدوني.. أنا فاشلة وعايزة حل

انا فاشلة ف كل حاجة فاشلة اني اكون زوجة واكون أم.. انا متجوزة من 8 سنين وعندي 30 سنة معايا بنتين. جوزي بيسافر وسايبني قاعده ف بيت لوحدي بربيله العيال.. بينزل اجازات شهر فالسنه واحيانا شهر كل سنة ونص لو سنتين.. بارد ف مشاعره معايا عمره مسمعني كلمه او طيب خاطري ومع ذلك محافظة ع نفسي وبيتي واولادي.. مفيش حد من اهله بيسأل علينا ولا بيرفع سماعه التليفون وعمرهم ماتصلوا يسألوا ع ولادي وهو متقبل ودايما يغصب عليا انا اروح بالبنات ومقابلتهم بتكون اوسخ مقابلة وممكن يقوموا ويسيبوني قاعده لوحدي ومينفعش انا اشتكي يااما هبقي بكرههم ووحشة.. كان بيبعت مصروفي عليهم وحاجة ولادي عليهم يفتحوا ويتفرجوا وبعدين يبعتولي عملت مشكلة ومفيش حاجة اتغيرت بروح امد ايدي ليهم اخد حاجتنا منهم.. جه فترة حوش فلوسه فالدهب وعان معايا جزء ومع اخته جزء.. جيت مسافراله من شهر ونص قالي ابعتي الدهب عند اختي انا رفضت وقولتله داري ع نفسك يلاش تكشف كل اللي معاك قدام حد الواحد ممكن يحسد نفسه.. رفض وصمم اني اودي اللي معايا عندها وبعتلي عيل عنده 18 سنه ياخده مني ويحاسبني بالورقة والقلم ويقولي خدت منك كذا.. زعلت وحسيت بالاهانه قولتله اني زعلانه والموضوع ده هيشيلني منه وانا مسافرة.. سافرت والله والله كنت بحاول انسي اني زعلانه واعدي ايامي بس هو اللي واخد عالوحدة دايما ماسك الفون وبيزعق للبنات لما يلعبوا بصوت عالي وبدا يشتكي من المصاريف ومش هتكملوا معايا هتنزلوا بعد 3 شهور مع انه كان واعدني انه واخدني سنه.. كلامه اتغير المشاكل زادت ضربني وبدأ كل يون يضربني لحد مخدت علقة موت كسرلي فيها ضهرى.. وهو عمره ماامد ايده عليا.. بدأ يتصل ع اهلي يشتكي مني واني منكده عليه بسبب الدهب وان دي فلوسه هو وهو حر فيها.. واتصل ع اخوالي فضحني بصحيح العبارة شغل قلب ترابيزة وكدا.. عيشتنا طول الشهر ونص هم وغم وعياط وقرف ومكنتش لا انا ولا بناتي مبسوطين.. جه قالي انه حسد واصحابه بيحقدوا عليه بكلامهم.. جاله سفر ضروري الرياض شغل هناك حجزلي بعد شهر و 17 يوم بالظبط ونزلت مصر ف نفس اليوم اللي هو سافر فيه.. نزلت تعبانه جدا جدا وبقالي 10 ايام مريضة مش بتحرك وهو كل يوم بيتصل وهو مقموص ومش بيكلمني كويس من تحت ضرسه.. جيت النهاردة نتناقش اتفتح فيا وقالي كلام صعب اوي وبردو اني ماديه وبتكلم فالفلوس ودي فلوسه ومش هيرجعلي الدهب عندي.. مع انه كان قايلي قبل مااوديه اني هنزل اخده هو عاينه عندها بس عشان انا مسافرة.. غير كلامه وقال مش هبعتهولك وشتمني وقال اني روحت بوظت السفرية عليه وعليا طلبت الطلاق وقولت متنازلة عن كل حاجه بس سيبني لاني اتبهدلت معاك.. رفض وقالي لما ابقي انزل مصر وراح متصل ع بابايا وقاله كلام كتير محصلش.. بابايا مش برضي ادخله ف اي مشاكل بينا وميعرفش اي حاجه هو بقي دخله.. ونص كلامه كان كذب اقسم بالله مامتي كلمته وقالتله كلام كتير واني عايزة اطلق ومش هناخد منه حاجة هو رفض.. اهله دول بالنسباله احسن مني ومن عيالي.. مع ان والدته متوفيه انا بتكلم عن اخواته البنات.. بابايا طالب مني اسيب بيتي واروح اقعد عندهم لحد مانشوف هنعمل ايه وانا رافضة عشان مدارس عيالي ودروسهم وبصراحه بالرغم من كل ده الا اني بحب جوزي ومش عايزة اخسره هو بس محتاج يتغير وهو والله تعبني كتير اوي وجه عليا هو واهله.. فكرة ان اخته هي تعينله حاجة انا اللي بدفع تمنها من صحتي وشبابي وانا لوحدي ومفيش كلمه حنينه دي وجعاني اوي.. اسفة طولت عليكم بس بفضفض لان عيني ورمت من العياط تنصحوني اعمل ايه ...عرض المزيد

1 الدعم

28 نصيحة

Chocolate_85180 🇪🇬

مخنووقه أوي وحاسه بوجع فقلبي قاتل

مفيش جوايا حاجه معينه بس مخنووقه اووي احساس بوجع فقلبي قااتل اكن روحي بتطلع بالبطئ ديما حاسه اني هموت ف اي لحظه غير اني ديما لوحدي نفسي افوق لحيااتي موقعه نفسي ف مشكله ملهااش حل ديما تعبااني مش عارفه اتصرف عاوزه ارتبط واحب واتحب ديما حاسه اني متحبش معن كل اللي حواليا بيقولو اني حلوه بس انا بجد حااسه اني عاايشه عسان انام واصحي اكل واتزل الشغل واعيط وانام ...عرض المزيد

3 الدعم

26 نصيحة

Strawberry_84757 🇪🇬

نفسي أبطل مقاطع غير أخلاقية وخايفة أموت

السلام عليكم ورحمة الله وبركاته اسفة لو كان الموضوع حساس شوية بس انا نفسي ابطل وهو سماع المقاطع الغير اخلاقية وحاولت كتير وارجع تأتي انا الحمدلله لله ملتزمة شوية لكن الجانب دا مش عارفة اتوب منه وخايفة اموت وانا لسة ماتوبتش بجد ساعدوني انا فكرت كتير اقول لحد مثلا اختي او كدا تساعدني بس اخاف انزل من نظرهم لاني ان شاءالله هتوب في يوم لكن اكيد دا مش هينسوه مش عارفة اعمل ايه انا بجد قرفانة من نفسي جدا انصحوني ب اشياء مجربة لاني بدعي ربنا ...عرض المزيد

0 الدعم

21 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع