بيت آمن قصص حقيقية - 1 تجارب، ونصائح، ودعم

Mango_64751 🇪🇬

منذ شهر واحد

شعور متحمس

موضوع:

اهلك عملوا معاك ايه مش هتعمله مع عيالك؟

كل حاجه عملوها معايا مش هعملها بيتي هخليه أمان ودفئ هخليه المكان الأول اللي ييجوا عليه فيه حاجات كتير لو فضلت احكي من هنا للسنه الجاية مش هتخلص بس الملخص كل حاجه المفروض الأهل الاسوياء اللي عارفين ربنا مش مجرد عقوق والدين بس و عارفين أن فيه عقوق أبناء كمان هعملها معاهم هخليهم أقوياء عارفين أن ليهم س

مش عارفة ابطل عياط ومش لاقية حد اتكلم معاه

انا مش عارفة ابطل عياط و مش لاقية حد اتكلم معاه اتخطبت من سنة لشخص كويس و عائلته كويسين قبل ما اعرفه كنت سعيدة و بخرج كتير و بعمل نشاطات و اتعرف علي ناس من ساعة ما اتخطبت و انا مش سعيدة علي طول سرحانة و مكتئبة خصوصا ان اصاحبنا مشتركين و هو قطع معاهم .هو حنين و متربي بس انا مش بحب اقعد معاه و مش بيسمعني و كل كلامه علي السباك و النجار و تفاصيل متخافيش خلاص زهقت و أهلي ضدي لان شايفين اني مش هلاقي زيه تاني خصوصا ان سني كبير .. ارجوكو ساعدوني انا اتخنقت معاه النهاردة و من ساعتها متكلمناش ...عرض المزيد

1 الدعم

1 نصيحة

أنا مهيبرة ومش عندي صحاب وعاوزة أخرج كل يوم

في شعور دايما حساه دايما حاسة انى مهيبرة ولا كل الناس شبهى بس انا الى معنديش صحاب القصة وما فيها دايما عاوزة اخرج دايما عاوزة بعد الشغل انزل اتمشي مع حد اروح ع النوم دايما كل يوم كل يوم عاوزة ابقي خارجة معرفش ده طبيعى ولا هيبرة واعمل اى وللعلم بشتغل مش فاضية وكمان باخد كورس ف اى الحل ...عرض المزيد

0 الدعم

13 نصيحة

أنا انطوائي نرجسي.. وانتظرتها ٨ سنين

هحكيلكم حكاية.. انا انطوائي ، نرجسي مش هجازف عشان مترفضش عايش في دنيا برفضها خوف لاترفض من ١٠ سنين أعجبت ببنت كنت لسه صغير وقتها وساذج.. قولت بس جامد اوي انا هفضل أحبها لحد ما الدنيا تظبط معايا واتقدملها واقولها بصي انا محوش حب ليكي قد ايه ، كل ده بتاعك انتي ، كنت راهب في حبها ، صاين قلبي عن اي بنت تانية عشانها.. عدت سنين وسنين ، حصلتلي ظروف شديدة شوية كنت فاكر فيها موتي ، مستحيل اقوم منها ، كنت بقعد بالشهور في السرير مستني روحي تطلع عشان ده الخلاص الوحيد للي بيحصل.. كنت طول الوقت بكلمها ف بالي وعايش معاها كأنها حقيقية وبحكيلها كل حاجة ، كنت بهون على نفسي واقعد افضفضلها في بالي.. عدى وقت كتير والظروف كانت بتروح لحتة اسوء كل يوم ، بقيت بس بتمنى اشوفها قبل ما اموت.. حسيت كل حاجة باظت وإني مش قد الوعد بتاع اني مش هكلمها لحد ما أكون قادر اتجوزها ، مش قادر خلاص انا عاوز اكلمها.. جبت اكونتها وكانت الصدمة ، كانت عايشة حياتها وشباب في كل حتة والدنيا حلوة ع الآخر.. يومها انا نزلت ف الشارع الساعة ٢ بليل من خنقتي وقعدت اعيط.. ما علينا قررت اكلمها وخلاص ، فاكس قصة الحب ، انا بموت دلوقتي ومحتاجها جمبي ولو حتى صحاب.. بعتلها بطريقة متقلش مني ،استنيت شهور ومفيش رد ، بعتلها تاني واستنيت شهور ومفيش رد ، بعتلها تالت واستنيت شهور ومفيش رد ، انا نرجسي وكل مرة ببعت كنت بخسر جزء من كبريائي ، بس انا بموت بجد مش بهزر.. في وسط الأيام اللي بتعدي دي مرة نزلت الشارع الفجر زي السكران بدور عليها جايز الاقيها صدفة ، مع العلم هي في مصر وانا مش في مصر ، بيني وبينها 6000 كيلو.. عدت شهور وكل مرة بحاول اعافر في الدنيا لوحدي ومش عارف ، بقيت كل ما اعوز انهار أعمل اكونت فيك واخش أقولها كل حاجة جوايا واوقات كنت بشتمها ،انا بحبك سنين وانتي سيباني اموت؟؟ مقولتش حبيني بس انا لو حيوان في الشارع وبيموت هتتعاطفي معاه ، انا جايلك وشايل قلبي ف ايدي بينقط دم ، مش بقولك نتعرف!! وأول ما اهدى بمسح الاكونت وكل حاجة وانام وكالعادة بحلم انها ردت عليا وافرح ، ولما اصحى وأكتشف انه حلم بحس كأن اليوم ده جنازة.. اتعلمت اعبر عن مشاعري واتعلمت اكتب بسبب الكلام اللي كنت ببعتهولها ، مش نرجسية بس كان كلامي زي السيف ، يدبح اي حد بيحس ، إلا هيه.. عدت سنين وسنين ومرة بعت ونمت وصحيت لقيت رسالة بعد ٨ سنين ، مكتوب ازيك؟ انا متوقعتش ان في حد ممكن يحب حد الحب ده كله ، بس انا مش عوزاك توقف حياتك عليا ، شوف واحدة تحبك ، *وقتها كنت بعرف بنات العالم كلهم ، بحاول اعوض النقص اللي عندي ، وبرضو مش عاوز غيرها ، وقولتلها انا مش عيل غلبان وعندي غيرك كتير بس انا عاوزك انتي ، تعالي طلعيني من كل ده* المهم قالتلي شوف بنت تانية ، قولتلها طب عارفة انا مين ؟ قالت لا ومش مهم اعرف ، وقالتلي احترم اني رديت عليك ومتبعتش تاني وعملت بلوك.. بعد ٨ سنين كان نصيبي فيها رسالة وداع مدتها دقيقة بتقولي متجيش هنا تاني ، وانا وعدتها عمري ما هبعت تاني ولحد دلوقتي عدى ٣ سنين ومبعتش.. هي في الحقيقة ماتت في عيني ، بس لسه روحها عايشة جوايا ، ولسه بتكلم معاها كل يوم قبل ما انام ، وبجيلها وقت ما أكون تعبان واحس اني لوحدي.. وتوتة توتة خلصت الحدوتة.. ...عرض المزيد

1 الدعم

5 نصيحة