مشاعر غير مكتملة

Strawberry_58144 🇪🇬

منذ يوم واحد

شعور مكسور القلب

عبّر عن شعورك بشكل مجهول

تعرف؟
انا كنت بغير عليك وانا عارفه انك مش بتاعى..
ولا هتكون فيوم
كنت بعيط من الغيره 
كنت بقتل نفسى عليك
تعرف انى كنت مستنياك وانا عارفه انك مش هتيجى؟
كنت عارفه ان مش هيحصل حاجه بيننا.. كنت عارفه من الاول خالص انك رافض لسبب جواك.. حسيت بيه من الاول بس برضو كملت.. يمكن مكنتش عايزه اخسر قدامك.. او كنت عايزاك تشوفنى زى ما بشوفك.. انى حاجه مينفعش تخسرها.. انك مينفعش تغض الطرف عنى بالسرعه دى.. وانت لسه مدتنيش فرصه اعرف فيها نفسى حتى..

تعرف انى بتعافى من حبك الى معشتهوش فيوم؟ كل الى يعرفو الموضوع بيتهمونى انى مش عاقله زى ما ظنو.. عشان اتعلقت بيك.. بدون ما امسك خيط واحد حتى.. خيط واحد من خيوط مشاعرك.. ولاكن اعتبرت نظرتك وعد..
مش بلومهم.. اصلهم مشافوش.. فاكر؟ فاكر اليوم الى كننا فيه محاضره الايكو وانت كنت قاعد يمينى وانا مش شايفاك؟ فاكر اول ما اتلفتت و شوفتك أنت كنت باصصلى ازاى ساعتها؟ فاكر لما محاولتش تخبى و فضلت مكمل؟ فاكر نظره الحنيه دى؟ فاكر صدمتى ساعتها؟ انا الى كنت بتلهف على نظره متواصله مابيننا.. هربت من سلطه عيونك.
فاكر لما انا خرجت من محاضره الانشورنس بسرعه و لوحدى قبل ما الدكتور تخلص حتى؟ انا مكنتش متخيله انك لاحظت.. لان انت كنت متجاهلنى بزياده اليوم ده.. انا نزلت الدور الارضى وانا بعيط و دخلت الحمام عشان اعرف اراقبك من ظهرك وانت خارج بدون ما تشوفنى.. فاكر لما لفيت حوالين نفسك و شوفتنى؟ اكنك كنت بتدو عليا.. وانا جريت على جوا زى المجنونه.. انت عرفت ازاى ساعتها انى كنت بعيط؟ بجد والله.. ده صحابى نفسهم محظش لاحظ اختفائى.. ده انا قعدت جوا شويه لوحدى على اساس انك تمشى و لما جيت اخرج.. لقيتك.. كنت واقف على باب الحمام بعيد شويه.. حاطط ايدك فجيوبك.. اتجاهك للباب.. واقف لوحدك.. و المكان فاضى.. مش مشغول نع٦ حد حتى.. اكنى كل الى شغلتك فاللحظه دى.. و كل تركيزك اتصب عليا اول ما لمحتنى.. فاكر؟ انا عمرى ما نسيت.. انك كنت قلقان عليا بجد.. مش محتاجه اكون خبيره لغه جسد عشان اعرف انك.. حسيت بحاجه حقيقيه ساعتها..
دى كانت المره الاولى.. الى اعرف يعنى اى راجل يبص لست.. يشوفها بجد.. حسيت.. بالمعنى الحرفى للامان..
حسيت انك.. راجلى.. وانى ضعيفه قدامك عن طيب خاطر.. محتاجتش ارسم قوتى قدامك ساعتها..
فاكر بقا يوم البرزنتيشن بتاعك؟ فاكر انا بصيتلك ازاى؟ انا متاكده انك عمرك ما هتنسى.. لانى ببساطه لغبطت حواسك.. انا يومها اثرت على جهازك العصبى بالمعنى الحرفى! انا عارفه.. انت كنت طالع و تركيزك عليا.. اكنك مش قلقان من حد فالروم غيرى.. انا هتفرج عليك وانت بتشرح.. تعرف انى بصتلك كده بقصدى؟ كنت مخططه انى هعترفلك بعيونى اليوم ده.. وانت عرفت.. و اتلغبطت.. واتشقلبت فوق تحت واتوترت و عمال تتنفس بسرعه و عينك رايحه وجايه من عليا و عمال تبلع ريقك و هتعيط! فاكر؟ انا كنت مستمتعه بهروبك و توترك من نظرتى.. لحد ما انت قررت.. مش عارفه ازاى.. انك هتسيب نفسك تبص المرادى.. مش بنكر انى مكنتش متوقعه.. بس انت قلبت الموازين.. و بدلت الادوار.. خلتنى انا الى اتوتر من نظرتك.. عيونك الى نقطت مشاعر عليا وانا قلبى صغير.. لااا مكنش قصدى ارجوك ابعد عيونك! شوفتنى وانا بعدل قعدتى و ببرق و ببربش و ببص قدامى.. انت كسبت الجوله ساعتها.. وفضلت عيونك مش بتتشال من عليا لمده تلت اسابيع بعدها صح؟ بدون ما تعرف تخبى حتى.. وانا الى تجاهلتك المرادى.. اسفه بس نظرتك كانت شديده عليا..
فاليوم ده.. انا سيبت قلبى كلو يتجمع فعيونى.. و اعترفتلك بحبى.. بدون كلمه..
بس انا بجد بقا.. مش هنسى المره الوحيده.. الى بالصدفه قعدت وراك.. لما انصفنى القدر و سمحلى اتاملك من قريب.. كنت بلمح عيونك و هى بتتلفت يمين عشان تلمحنى من وراك بدون ما تلفت النظر.. و بعدها لما تحس بعيونى عليك تتوتر و تبص قدامك.. انا عارفه نظره التوتر بتعتك.. عارفه عيونك بتعمل اى لما تستجيب لضربات قلبك المجنونه.. عايزه اقولك انى مسمعتش ولا حرف من الدكتور فالمحاضره دى 
كل الى سمعته.. صوت ام كلثوم فودانى.. كنت بشتقلك وانا وانت هنا.. بينى و بينك.. خطوتين..
ولاكن.. شوف بقينا فين يا حبيبى؟ يا حبيبى وانت فين.. انت فين؟
انت فين بجد يا كريم؟ انت فين.. هو انت ليه مجتش؟ يعنىيي.. هو مثلا مشاعرى مكانش واضحه ليك كفايه عشان تفهم انى مستنياك؟ ولا مشاعرك مكانش بالقوه الى تحركك؟ هى العيون بتكذب؟ عيونك انت.. بتكذب؟؟ اصلى صدقتها.. رغم انك ولا مره قولتلى انك بتحبنى بعيونك حتى.. اكنك بتكدب نفسك من جواك.. مدام تحب بتنكر لييه؟ كل نظره بنقول انك عاشق وكل فعل بيقول انك متعرفنيش!.. كنت بتهرب.. بتبصلى وانت بتهرب! بتشوف مشاعرى و بتصدها.. مش بترفضها بس بتهرب منها.. مش زهقان من حبى بس مرعوب! بس انا ترجمت نظراتك انها اعتراف بالحب.. عشان انا كنت مستنيه اعتراف بالحب! منك انت مش لمجرد الحب.. بس انت مكلمتنيش حتى.. 
وانا.. متمسكه بكل نظره ما بيننا .. كانها وعد.. كانها عهد بجد.. وانت ولا فيوم نطقت بحرف معايا..
انا فاكره كل نظره انت بصيتها اتجاهى فيوم.. كل نظره.. يمكن مش باين عليا.. بس انا حافظه عدد رموشك مش بس نظراتك..
كان نفسى يعنى.. يتاح ليا الفرصه فيوم.. احكيلك.. عن اشراق الشمس الغير اعتيادى فاليوم الى كنت هشوفك فيه.. وان المواصلات بتكون جميله جدا.. وان الهوا بيكون نقى والورد بتطير من حواليا.. كنت بشةف الزرع اكثر اخضرارا يومها قلبى كان بيدق بسرعه من وانا لسه فالبيت.. واول ما اشوفك و تبصلى بتلفت لصحابى و اسلم عليهم اكنى مشوفتش حاجه.. كنت بتجاهلك برضو.. مهو انا البنت يا استاذ والله.. مش هعرف ابين مشاعرى كده.. ده انت نفسك مكسوف!
لو تفتكر فاخر يوم.. انت كنت بتبصلى وعايز لحظه وداع بيننا.. نظره.. كما المعتاد..لانك مبتعرفش تعمل غير كده..
وانا اليوم ده مدتلكش النظره.. تجاهلتك.. لانى كنت تعبت.. سامحنى.. بس انا ياما بكيت لوحدى وانت متعرفش حاجه
بس انا دلوقتى.. مش عارفه بجد لما تشوفنى تانى هتعمل اى.. ولا انا هعمل اى.. ولا المفروض اعمل اى.. هو المفروض اعمل اى معاك يا كريم؟ المفروض اكمل؟ ولا اعقل زى ما الكل عايزنى؟ مش عارفه.. بس اهو سؤال ضمن اساله كتير يمكن مش هلاقيلها اجابه ابدا.. لانى مش هيجيلى فرصه اسالك ابدا 
بس الى عايزاك تعرفو.. انى حبيتك بجد.. من قلبى.. يا كريم❤️

رساله مش هتوصلك فابدا...

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Tomato_74165 🇪🇬

كملت 28 سنه ومش عارف افكر في جواز

جماعه هوا معلش علشان كملت 28 سنه يبقا مينفعش افكر في حد لا يزيد عن 24اوفر ليه كل لما بروح لبيت حد طلباته كتير جدا مع ان حال البلد كلها زي الزفت انا والي يقولي شوفلك واحده مطلقه علشان الحواز يبقا ايسر ليك مع احترامي الكامل ليه بس هل انا مليش نفس احب واتحب اين كانت ...عرض المزيد

1 الدعم

0 نصيحة

Marshmallow_74240 🇪🇬

خايفة من رد فعل أهلي على خطوبتي من سعودي

السلام عليكم انا عمري ١٧ ومن يوم ماكان عندي شهرين بابا اخدنا معاه السعوديه عشان شغلو وعشت هناك حياتي كلها ولسه جايه من شهر عشان جامعتي بس انا هناك كنت بتعامل معاهم كتير وتعلمت لهجتهم وكدا وكنت اسوي صداقات اونلاين مع البنات سواء سعوديات او مغربيات او يمنيات او غيرو بس بالصدفه تعرفت على ولد عمرو ٢٣ مش عارفين بعض من زمان اوي يعني يمكن ٦ شهور او اكتر وحبينا بعض وهو فعلا عايز يتقدم ليا وانا واثقه فيه مرا بس خايفه من اهلي اصلا ازاي حشرح لهم او ازاي حيجي يتقدم وفيه بيننا اختلافات بالذات ان جنسياتنا مختلفه هو سعودي وانا مصريه وخايفه مايوافقوا واحنا تعلقنا ببعض هو حرفيا مستعد يستناني اربع سنين او خمسه بتوع الهندسه اللي حدرسهم مدري ايش اسوي اسيبو عشان مش نتعلق ببعض اكتر ونهايتنا مش معروفه ومش مضمونه ولا اتفائل هو بيشتغل وحالتو الماديه مش واو يعني لا عاديه جدا و قال انو عايز يكلم اهلو عشان يقولهم انو عايز يتقدم ليا بس المشكله ايه الطريقه؟ هو بابا لسه بيشتغل هناك واحنا جينا بس عشان الجامعات بتاعتي انا واختي وبابا حيجلس هناك لحالو واحنا حنروحلو في الاجازات فهو قال ليا لو جيتو في الاجازه حجي اتقدم بس مش عارفه ازاي اصلا وهل دا عادي ولا لازم يجي مصر؟ و احنا اصلنا من قريه ريفيه واهم حاجه السمعه بالنسبالهم منجد متلخبطه ...عرض المزيد

1 الدعم

2 نصيحة

Tofu_72927 🇪🇬

زهقت من الروتين؟ تعالا نتكلم عن أفكار مجنونة

لما بتحسوا انكوا زهقتوا من الروتين المتكرر، ايه الافكار المجنونة اللي بتبقوا عايزين تنفذوها عشان ترجعوا تحسوا انكم عايشين؟ وازاي بتتعاملوا ف اوقات الملل، ومحدش يقول تطوير ذات وبتنجان، جماعة سؤال كمان هو حد هنا بيبقا مثلا بيتكلم عادي سواء ف موضوع او مع حد ويزهق فجأة ويحس ان ايه الهبل دا احنا لسه هنكمل كلام وكدا زيي ولا لأ، مع العلم دا ف كل العلاقات مش احيانا واحيانا ...عرض المزيد

1 الدعم

8 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع