أماكن مهجورة

Marshmallow_69067 🇪🇬

منذ شهرين

شعور غير مكتمل

عبّر عن شعورك بشكل مجهول

اول مرو كتبت هنا اني عشت عمرى كله *مغمضة عنية* عايشة في خيالى مع ناس مش موجودة في الواقع بس الحقيقة دا مكانش عشان انا شخص وحيد انا مكنتش بحب الناس لدرجة انى كنت عايشة اغلب عمرى لابسه *الهيدفون بتاعتي* وكنت بتعصب جدا لما مش بلاقيها مجرد نزولي من البيت كنت لازم البسها واسرح في الطريق مكنتش ببقى شايفة الطريق كنت ببقى شايفة العالم.. تفاعلى مع الناس في الواقع كان قليل اوي حاولت اندمج معاهم بس كنت بحس ان انا مش انا كان لازم اتعامل بطريقتهم عشان ابقى وسطهم بس محدش فيهم كان شبهي او على الاقل اقدر اشارك افكاري معاهم في المدرسة،في الكلية، حتى لما حاولت اشتغل كنت ديما لابسة الهيد فون وبرسم عيون عندي كنان ادمان لرسم العيون برسم على كل حاجة ممكن اكون سرحانه والاقي نفسي برسم عيون مكنتش لسه اتعلمت انى اعرف ارسم باقي ملامح الوش بس مع الوقت اتعلمت ارسم كويس فكنت برسم ملامح من خيالي لشخص كنت كل لحظة بصدق انه موجود شخص بكلمه بيني وبين نفسي على الورق بقى عندي نوتس كتير بكتبله فيها وجوابات .. من غير مااحس فاتت سنين كتير والدنيا من حوليا بتكبر بس انا لسه هناك نفس البنت الصغيرة الي عايشة في الاحلام مكانش فيه حاجة في الواقع ممكن تملى قلبها اي مشاعر حلوة الخيال هو كان التعويض الحقيقي لقلبها ..*الخيال والطريق والليل والهيدفون* مكنتش برتاح لما بتكلم مع حد مكنتش بتفهم كنت بحس اني غريبة او كائن جى من عالم تاني بس من برا بحاول اكون شبهه الناس.. 
كان عندى هوس بالاماكن المهجورة الواسعه كنت بحس انها شبهه قلبي وانها جميلة بس محدش شايفها صح..

كنت بستمد المشاعر من كل حاجة حوليا مش من البشر .. البحر بالليل الهوا الشجر والطريق .. كانت لما الدنيا تمطر كنت برفع وشي للسما واغرق نفسي بالشتا 
كنت بحس ان روحى بتتغسل بالمطر..شخصي الخيالي بالنسبالي كان كل الحاجات دى..

مرة حلمت بجد مش خيال انى كان عندي مرسم وكنت قاعدة برسم لوحه وشوفت حد ماشي من ورايا شوفته من ضهرة كان بيغنى وبيقول "انا زارني طيفك في منامى قبل ما أحبك طمعني بالوصل وسابني"  كانت اغنية فيروز 
استغربت اوي انى حلمت الحلم دا لاني مكنتش بفكر في الاغنية دي بس حسيت ان في حد في عالم تاني حاسس بيا..

ممم الحلم حلو والخيال بيشفي بس لما بيطول انه خيال الانسان بيتعب مع الوقت ومع مرور السنين اندمجت في الواقع ومع صدمات الحياة ونسيت احلامى

امبارح كنت بتكلم مع بنوتة صغيرة هنا فكرتني بنفسي وانا في نفس سنها عندها نفس احلامي وعندها شخص خيالي مستنياة وعارفاه  كلامها صحى الطفلة الصغيرة الي جوايا فكرني بحاجات حلوة كنت نسيتها ..

اتمنالها فعلا تقابل شخصها الخيالى  الي يداوي قلبها يمكن يتحقق معاها الى معرفتش احققه 🩷

*اناا زارني طيفك في منامي قبل ما أحبك طمعني بالوصل وسابنى وانا مشغول بك*

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Strawberry_76847 🇪🇬

ليه دايما بحس إني قليلة ومش مستحقة؟

أنا مش عارفة ليه دايمًا حاسة إني قليلة... بحس إني مش زي غيري، بحس إني مش بستحق حاجة حلوة. يمكن عشان في حاجة قديمة عملتها ومحدش عرفها غيري، بس أنا عمري ما نسيتها. كل مرة أحاول أفرح أو أفتخر بنفسي، الصوت اللي جوايا بيقولي: انتي نسيتي؟ نسيتي عملتي إيه؟ بصراحة بقيت دايمًا حاسة إني أقل من البنات اللي في سني، وهما بيتكلموا عن نفسهم بثقة كأنهم عمرهم ما غلطوا. اللي بيستفزني أكتر إن في منهم بيقعدوا يقولوا: "أنا المفروض كنت أبقى أحسن من كده" أو "أنا أستاهل أحسن بكتير"، وأنا أقعد ساعتها ساكتة مش عارفة ده الصح ولا الغلط. نفسي بس أهرب من الإحساس ده… نفسي أسكت صوت الذنب اللي مش سايبني أعيش ...عرض المزيد

5 الدعم

37 نصيحة

Apple_74635 🇪🇬

تعبانه ومخنوقه ومش عارفة أتكلم مع حد

صباح الخير عليكم جميعا انا صاحية مرهقة و تعبانة و مخنوقة او مش هقول صاحية لان عندي ارق و يادوب نمت ساعة ولا اتنين كل دا طبعا من كتر التفكير و الخنقة و الهم الي انا فيه مش قادرة احكي لحد خالص عن الي جوايا وفي تصرفات كتير غلط بحاول ابطلها بس مش عارفة بحاول على قد م اقدر اساعد نفسي بس اوقات مبينفعش و بحس نفسي بفقد الامل و فجأة بلاقي نفسي بدور على حاجات انا عنري مكنت متخيلة اني فيوم هعملها حتى اهلي مش قادرة احكيلهم مفيش حد يسمع مني و حتى لو هيسمعوا مني الي حصلي مش هينفع احكيه لحد و حاسة اني شايلة هم كبير اوي و عاوزة اطلع كل دا من جوايا بس مش قادرة ...عرض المزيد

5 الدعم

33 نصيحة

Pineapple_77988 🇪🇬

متجوزة من 14 سنة وحاسة إني عايشة مع جد

متجوزة بقالي ١٤ سنة مش عن حب ولا صالونات .. هو أكبر مني ب٧ سنين للأسف من اول اسبوع جواز وانا حسيت إن فرق السن كبير عكس ايام الخطوبة كان محسسني إنه الواد التت الفت بعد الجواز حسيت اني متحوزة راجل كبير انا مش مجنونة في تصرفاتي بس بحب الخروج السفر المغامرات فرفوشة بحب انكش ف اللي قاعد معايا ف الرايحة والجاية هو عكسي تماماً هادي ولما ااعملاي حاجة يحسسني اني مجنونة الحقيقة بطلت اعمل حاجات كتير كنت بعملها لمحتله كذا مرة نفسي اعمل حاجة جديدة هو روتيني فوق الوصف بيتوتي درجة أولى .. مطلبتش حاجة فوق المقدرة خالص بس خلاص تأقلمت بس بقاله ٤ سنين كده بقيت حاسة حرفياً اني عايشة مع واحد عنده ٧٠ سنة شايل الهم عالطول ودائما مكشر زعيق ف الولاد ليل نهار عارفة أن الضغوطات والمسؤوليات ع عيني وراسي بس مش عالطول مش طول الوقت مش بشوفه بيضحك لو ضحك تبقى الضحكة قالبة بايموشن قرفان تعبت اوي غير حاجات كتير مستحملاها وبتغاضى عنها لكن الحاجة دي مأثرة نفسياً عليا وع ولادي مابقوش يحبوا قعدته بس لو غاب شوية يفضلوا يسألوا عليه .. عايزة اتكلم ف حاجات كتير ومش عارفة اقول ايه ولا ايه بس دي اكتر حاجة تعباني ...عرض المزيد

5 الدعم

32 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع