Cheese_54753 🇪🇬
منذ شهرين
.
شعور ضاق ذرعًا
ممكن اسالكم سؤال وتجاوبوني بجد انا بنت من بين ٤ اخوات بنات معرفتش راجل في حياتي الا ابويا عندي شوية خبرة في العلاقات من اخر سنتين في حياتي انا ٢٥ سنة واكتشفت فيها اني مكنتش فاهمة الرجالة خالص ولا طبعهم ولا تفكيرهم قعدت اقرا كتب واسمع قصص ولحد دلوقتي بسمع قصص وساعات بستغرب الفجوة الكبيرة اوي اللي بين تفكير الراجل والست وازاي دول ممكن يعاشروا بعض انا ٢٥ سنة وبابا وماما منفصلين من قريب كنت طول حياتي فاكرة انهم مثاليين لحد ما اكتشفت انهم كانوا بيمثلوا قدامنا وعايشين مع بعض "عشان الاولاد" زي ما المسلسلات بتقول طول عمري عايزة اتجوز راجل زي بابا لحد ما كبرت وشوفت عيوبه وانه مكنش بيعرف يقول كلام حلو ولا كان حنين مع ماما وكان راجل عملي بزيادة مكنش بيظهر مشاعره ولا بيطبطب ولا اي حاجه من حاجات الازواج الطبيعين وانا كنت فاكرة انه ده طبيعي لكن اكتشفت انه مكنش بيحب ماما او معرفش يحبها ازاي غير كده هو شخص كريم جدا طيب وهادي ومتفهم ومهتم بينا احنا بناته الاربعة لاقصى درجة لكنه ساب ماما وراح اتجوز عليها من ورانا كلنا وعرفنا بالصدفة دي كانت اكبر صدمة في حياتي منه ومن النموذج المثالي اللي كنت رسماه عنه هو عنده ٦٠ سنة انا فكرت انه عند السن ده خلاص الرجالة مش بتفكر في علاقة ولا جنس لكن اكتشفت انه اتجوز بس عشان "احتياجاته" زي ما بيقول دماغي اتلغبطت مبقتش فاهمة هي الرجالة فعلا مبتعرفش تحب؟ سهل عليهم فعلا عشرة ٣٠ سنة يسيبها ويتجوز غيرها بدل ما يحل مشاكلهم؟ هي الرجالة شهوتهم بتحركهم للدرجة؟ يعني كل الحاجات دي كانت اسئلة في دماغي خليتني احس اني مش عايزة اتجوز لو فضلت اقدم طول حياتي تربية ورعاية وبصونه وبصون بيته وفي الاخر كله يهون طب ليه؟ ليه الرجالة مش بتحب بجد زينا؟ هم بيتعلقوا زينا وبيكونوا مخلصين فعلا؟ ولا كل همهم الجنس والشكل الخارجي؟ انا بحب القراية وعملت ماجستير وأكاديميا انا شاطرة ومقدرش اقول على نفسي مثقفة بس بقرا كتب.. ليه بحس الرجالة بتخاف من البنت المثقفة؟ ليه دايما بيدوروا على الهبلة الصغيرة في السن اللي اعرف اضحك عليها والعب في دماغها؟ هم كلهم كده طيب؟ عايز واحدة تدلعه من غير ما تكون بتفهم؟ بس مكنة تطبخ تغسل تنام معايا ومتفكرش كتير؟ ليه بقيت احس انه الجواز ده فخ الفخ ده بيدخلك فيه ويستغلك لاقصى درجة وبعدين يلا باي هتجوز عليكي اصلك مش مكفياني اصل شهوتي اصل حقي.. بقيت خايفة بجد خايفة من الرجالة بقرا عشان افهمهم عشان معنديش حل تاني عايزة اتجوز واحد سوي عايزة اعرفه اصلا يعني هو موجود ولا لا؟ كل الرجالة اللي حواليا بيقولوا انه مش موجود من تجارب صحابي لتجارب الناس عموما الرجالة بتحس زينا؟ بيعرف يبقى حنين بس عشان اللي بيحبها ولا عشان شهوته؟ بيعرف يقدم بدون مقابل؟ يبذل مجهود بس عشان اللي بيحبها؟ اللي قابلتهم كلهم مش عايزك تشتغلي.. طب ليه؟ عشان الشغل هيتعبك وبلا بلا وهو كل همه بس واحدة تطبخ وتغسل وتنام معاه وتبقى فضياله هو وبس بس هو عنده صحابه وشغله وحياته بس هي تبقى ١٠٠/١٠٠ متاحة لحضرته.. هي دي مش انانية؟ ليه متسبنيش اعمل اللي انا بحبه وعايزاه؟ ليه كراجل بتفكر في نفسك بس؟ ليه مقابلتش راجل ناضج عاطفيا بيعرف يواجه بيعرف يقولك متزعليش ويطبطب مش اول ما يقابل مشكلة يلا باي واما تفكي تعالي نتكلم واه طبعا لما نرجع نتكلم مش عايزك تتكلمي في المشكلة اللي بيننا عشان كده هتبقى نكدية وست وحشة اكبتي في روحك وبلاش نحل خالص وفي الاخر نوصل لحيطة سد احسن عشان بس انام وانا بالي مرتاح واه متنسيش واحنا زعلانين لو متجوزين طبعا ليا حق عليكي مش مهم هتعمليه وانت روبوت وانت متضايقة مش مهم المهم افرغ وابقى تمام وحلو واه صحيح لو في عيال اللود كله هيبقى على الست عشان انا بشتغل وبجيب فلوس مش كفاية يعني ولا ايه؟ تربية لا رعاية لا ابوة لا انا فقط روبوت هيشتغل وانت شيلي الليلة كلها ربي وكبري ونضفي واطبخي وودي المدرسة وذاكري ونيمي وكله كله هي دي مش انانية؟ هو ده الجواز وهي دي الرجالة بجد؟ على ايه كل ده؟ حد فاهمني؟؟🙃🙃
2
38
