حياتي صعبة بسبب التفرقة وغيرة من أختي

Question

انا تعرضت لنقص أكسجين وانا صغيرة دة اثر علي حياتي بعدين خلاها أصعب طبعا اهلي طول عمرهم مصمين إني معاقة في اهلي واني مش هنفع في تعليم وان اختي اللي اصغر مني بأربع سنين هي اللي هتدخل الطب وهترفع راسهم دخلت ذكاء اصطناعي وأهلي فرحوا بس بردو أحبطوني واني دخلتها صدفة بس انا من جوايا مكنتش فرحانة انا كنت حاطة عيني علي اللي اعلي وهي الطب وحسيت نفسي مظلومة وقعدت اركز في حياة اختي اللي اسهل مني من ناحية الابتلاءات وماما وبابا والتفرقة مبيننا انا دلوقتي خلصت كلية ومش لاقية شغل بسبب أني ولا اشتغلت علي نفسي وأختي دخلت طب وهما بيقولو ايوة هي اللي عارفه راسنا احنا قلنا ليكي من الأول انتي معاقة وبيجي ليها عرسان وانا لسي وأهلي بيقولو دة بسبب إني معاقة مع ان لو شرفتوني مش هتلاحظوا بس هما يقصدوا إعاقة ذهنية انا منهارة وحاسة ان ربنا نسيني مع انه دايما بيكرمني ولولاه مكنتش في المكان دة أنا اهلي ولا تعبوا في تعليمي زي اختي بس من كتر كلام اهلي وضغطهم والحقيقة وحاسة بغيرة جامدة من اختي واني مش مستحملة أشوفها في نعمة وبتحقق حلمي وانا لا وبيجمعوا فلوس لفتح عيادة ليها وانا كأنو بيقولو لي لو دخلت طب هشتغل في المستشفي تنصحوني بايه انا مكسوفة من ربنا اوي وفي نفس الوقت مضايقة لان الغيرة باينة علية وكل الناس بتكرهني وأهلي بيفرقوا اكتر بسبب غيرتي

Coffee_27700 🇪🇬 · Accepted Answer

الإعاقة الوحيدة اللي شايفها من كلامك هي الإعاقة في فكر أهلك. أنا آسف ليكي نيابة عنهم. بس عايزك تفكري وتكوني صادقة مع نفسك في السؤال ده:
انت كنتي عايزة طب عشان تثبتي لأهلك انك وصلتي للقمة وأعلى كلية من حيث المجموع ولا عشان انت حابة مجال الطب وشغفك فيه. كتير مننا بيدخلوا كليات وبيغيروا مجالهم بعد التخرج لأنهم ليكتشفوا إن ده مش شغفهم الحقيقي.
مجالك جميل ومستقبله حلو جدااا طوري نفسك فيه لو حاباه

French Fries_32710 🇪🇬 · Answer

على فكرة ذكاء اصطناعي مش وحشة و مفيش حاجة اسمها كليات قمة اللي بيدخل حاجة و يجتهد و بتفوق فيها تبقى دي كلية القمة بتاعته 
بصي انتي معاكي حق تتضايقي لأنه غلط طبعا التفريق في المعاملة ده بس حاولي بردو قدر الامكان تبري والديكي و على فكرة انتي مش معاقة ولا حاجة حتى ما شاء الله في كتابتك انتي كتبتي كل الكلام من غير ولا خطأ و كمان الكلام مترتب و مفهوم ف انتي خليكي عارفة في دماغك انك انسانة عادية

French Fries_32710 🇪🇬 · Answer

و ادعي ربنا كتير انه يهديهم و يخليكي تحبي اختك عادي و يكتبلك اللي فيه الخير و معلش اصبري إن الله مع الصابرين الصبر جزاؤه عظيم صدقيني و ربنا عمره ما هيبتلي حد بحاجة إلا و ليه حكمة في كده و إن مع العسر يسرا يعني انتي ممكن يكون عندك حاجة مش عندك اختك دي ولا عند ناس كتير بس انتي مش واخدة بالك ف قربي من ربنا اكتر و الله يعينك

Coffee_33188 🇪🇬 · Answer

متأسف جداً ليك … ممكن تتناقشي مناقشة بسيطة معاهم بهداوة ليه التعامل دا واتكلمي معاهم زي ما اتكلمتي ف البوست دا كدا… وفهميهم شعورك تجاه اللي بيعملوه وان دا غلط كبير منهم وان ب كلامهم دا بقي ف كراهية بينك وبين اختك …. حاولي تقربي من ربنا .. ادعي كتير بهداية اهلك ويلين قلبهم ليك  .. اجتهدي ..ااسعي .. مجالك حلو جداً جداً .. وانت اكيد عارفه اي الشغل .. لو تعرفي تاخدي كورسات برمجة هيفيدك..كل الدعم ليك🖤

Potato_27372 🇦🇪 · Answer

خد بالك من نفسك

Marshmallow_44417 🇪🇬 · Answer

المشكلة أني كلمتهم كتير وبيقولو ليه انتي تعبتينا من كتر الدكاترة وصحتك علي اللي قدك والفلوس اللي بتندفع عشان تعيشي حياة طبيعية أختك متعبتعناش زيك من حقنا نفرح بيها يا صفرة ومتقرنيش نفسك بيها لأنك معاقة قارني نفسك بالمعاقين اللي زيك حاسة إني متحملة فوق وسعي مع ان ربنا نفا كدة وانا شفت نصر ربنا وجبره ليا رغم تقصير أهلي أنا مفيش حد رزقني غير ربنا بس بردو خايفة خايفة إلا ابقي عالة علي المجتمع

Coffee_33188 🇪🇬 · Answer

لا حول ولا قوة إلا بالله.. مع احترامي ليهم بس دا تفكير مجانين خسارة يتشبهوا ب بني ادميين… عامةً حضرتك لازم يكون عندك ثقة ف نفسك كبيرة اوي ومتسمعيش ل حد فيهم .. حاولي تشتغلي يمكن الشغل دا يبعدك عنهم شوية ومع صبرك واجتهادك ف شغلك ربنا يكرمك ب مكانة كويسة وراجل ابن حلال يبقي سند ليك وحبي اختك هي ملهاش ذنب ف كدا هي اللي ليك دلوقت .. اهم حاجة الصبر ع الابتلاء (أهلك) وادعي ليهم بالهداية وانت ب صلاح الحال

Coffee_27700 🇪🇬 · Answer

ولو مش حابة مجالك شوفي هواية أو بتحبي ايه وطوري نفسك فيه.
حبي نفسك وقدريها وسيبك من اي كلام سلبي انت وصلتي لحاجات نصنا هنا مش قادرين نوصلها.
كل الدعم والحب ليكي 💪🏻🤍