عندي مشكلة فلوس ودا مدمر حياتي - نصائح للتوفير

Question

عندي مشكلة
هي بالنسبة لكتير تبان مشكلة عبيطة من برا بس بجد دي حاجة مدمرة حياتي 
انا الفترة الاخيرة حصل مشاكل وسبت الشغل 
ومعايا موتوسيكل ف قولت الحمدلله وبدات اشتغل بيه اوبر واندرايف وتوصيل إفراد والكلام دا عشان اعرف اجيب مصاريفي ومصاريف الجامعة

ايام ما كنت شغال في شركة كان مرتبي كويس جداً ف كنت عايش مرتاح وكل ما ينزل ايفون اشتريه واشرب اغلى سجاير واغلى اكل واغلى لبس ومصايف وشاب عايش احلى عيشة حرفيا وشايل نفسي ومساهم كمان بجزء كبير في البيت

دلوقتي الموسم اتقلب لاني يعتبر بعمل في اليوم الواحد حوالي٢٠٠-٣٠٠ جنيه بالكتير 
قبل ما اوصل البيت حرفيا بكون خلصتهم يادوب بحط بنزين وبجيب شوية طلبات للبيت بيض وعيش وفينو والكلام دا 
حتى السجاير بقيت اشربها فرط😅
وبرجع البيت ب ٢٠ او ٥٠ جنيه 
محتاج منكم ايه بقا؟
محتاج الشباب اخواتي الي مرو بتجربة زي دي يحكولي ازاي بيعرفو يجمعو فلوس ويقللو مصاريفهم شوية ويعرفو يسيبو هامش تحويش على جمب مع العلم انا كل دا عندي ١٩ سنة

وشكرا لاي حد هيحاول يساعد❤️

Orange_64205 🇪🇬 · Answer

بص يا خويا الي حصل ان ربنا اداك بس لما لقاك مبذر سحب منك نعمته تاني عموما دي حاجة حصلت و خلاص نركز على الحاضر حضرتك تشوف بتعرف تعمل ايه محتاجه سوق العمل و اعمله حاول تشتغل في شركة تانية لكن نفس مجال شركة الاولانية عشان المرتب ميختلفش كتير و في نفس وقت عندك خبرة سابقة
التوفير بقا بنسبة للتوفير حضرتك المصيف ملوش لزمة انا مشفتش البحر بقالي عشر سنين  فلو مرحتش البحر اكيد مش هيحصلك حاجة مهم كل شهر تحوش

Biscuit_65927 🇪🇬 · Answer

الفكرة اني بدور بقالي كتير والله وعندي كل المهارات الي يتطلبها سوق العمل في مجالي حرفياً بس مفيش شركة قابلة بيا وانا مش متخرج

Orange_64205 🇪🇬 · Answer

تكملة : نقلل سجاير خالص او نبطلها لو نقدر لانها اساسا انتحار (ابويا مات بسبب التدخين) 
الاكل مش لازم يكون في اماكن فاخرة حاجة عقد ادينا عادي المهم ناكل اكلة نضيفة مش مهم اسم مكان و يفضل اكل بيت اصلا بس نقول هتاكل برا لاي ظروف مش لازم اكل من شركات براند 
ملابس هو طقم واحد لكل فصل تشتريه لان اكيد عندك ملابس
المهم يكون مرتبك بيتشال منه ٢٠-٣٠٪ متجيش نحيتهم ابدا الا في ظروف قصوى

Orange_64205 🇪🇬 · Answer

عشان احنا في الاجازة بس اصبر للدراسة اكيد هتلاقي في الدراسة كل الطلبة بتسيب الشركات فهيحتاجو ناس و مش هيركزو اوي في انك طالب دي

Biscuit_65927 🇪🇬 · Answer

شكرا ليك جداً❤️

Orange_64205 🇪🇬 · Answer

العفو يا خويا و ربنا يرزقك و تشتغل و ترجع احسن من الاول لكن بعقل و بدون تبذير انشاء الله

Orange_64916 🇪🇬 · Answer

بص انا مريت بنفس موقفك ده كنت شغال في السعودية وحصلت مشاكل وسبت الشغل هناك ورجعت مصر انا قبل السفر كنت باخد مبلغ كبير وقتها ولما سافرت كنت باخد مبلغ اكبر لما رجعت بقيت باخد سدس الي كنت باخده قبل ما اسافر حتبقي فترة صعبة وخاصة لو عندك أسرة بس ربنا بيكرم وطالما انت عندك الخبرة حتلاقي حاجة افضل بس دور علي شغل و متعتمدش علي حوار المكنة ده