أنا مش قادرة أحس.. تبلد المشاعر والثبات الظاهري

Question

انا عندي مشكله غريبه جدا وهي تبلد المشاعر انا بنت مشاعرها مكتومه جدا مبعرفش أظهر مشاعري أبدا لأني مريت بصدمات كتير جدا ورا بعض الاول حصل تحرش من حد من قرايبي وكنت صغيره وبعدها بابا عمل حادثه وبعديها بسنه جاله كانسر ومات وانا كنت متعلقه بيه جدا بعدها ماما جالها في القولون واتعالجت بعدها انا جالي في الرئه وشلتها واتعالجت الحمد لله وأثناء فتره علاجي اكتشفت أن خطيبي سايبني اعافر وكان بيكلم الاكس بتاعته وسبنا بعض بعدها ف حاسه اني مبقتش بجد بحس بحاجة أو أنا بحس بس داخلياً 
في أقصي مراحل الانهيار الداخلي لكن برده في أقصي مراحل الثبات الخارجي 
مبقتش بعرف أعبر عن زعلي مبقتش بعرف اقدم اي مشاعر لأي حد ممكن اكون بحب حد جدا بس جوايا ومش قادره اعبر بدا ممكن اكون مخنوقه جدا و جوايا ببكي دم لكن خارجياً انا في تمام التماسك وممكن اضحك واهزر كمان ده غير الزعل الغير مبرر من كل الي حواليا والحساسية الزايده أدق التفاصيل البسيطه بتزعلني ممكن مثلاً نبقي واقفين سته وانا اتكلمت قولت حاجه ومخدوش بالهم ف أزعل وجوايا يبقي موضوع مش بقول بس من جوايا بشيل ممكن مامتي تبقي بتجيب مثلا حاجات برا و ابقي انا واخويا طالبين حاجات وتجيبله حاجته و تنسي الي طلبته ف جوايا الموضوع يبقي كبير جدا رغم أنه بسيط بقيت كمان طول الوقت بتخيل سيناريوهات وحشه جدآ جدآ وعندي كسل اعمل اي حاجة انا كنت شخص نشط جدا وبيحب الحياه تحولت لشخص معندوش طاقه يقوم من السرير طول الوقت وعايز ينام وحقيقي مش عارفه اتعامل معايا

Lemon_56819 🇪🇬 · Accepted Answer

ارجعى اللى الله يا اختى هوا احن علينا من انفسنا و اطلبى العون و الاستغاثة من الله سبحانه و تعالى و التزمى الصلاه و قراءة القرأن والله فيه شفاء للصدور و اكثرى من الصلاه على سيد الخلق محمد رسول الله صلوات ربي و سلامه عليه 
اسأل الله ان يشرح صدرك و ييسر امرك و ان يبدل حالك لا احسن حال

Pistachio_54176 🇪🇬 · Answer

معني انك بتضايقي من حاجات بسيطة او بتزعلي ف ده كدة معناه انك بتحسي المشكلة هنا مش فالإحساس المشكلة هنا فالتعبير وانك ترجعي تعيشي حياتك طبيعي لكن كدة انتي معندكيش تبلد يعتبر والحل انك تدي كل حاجة حقها حتي فالزعل عشان المشاعر دي متفضلش موجودة بحس ان ده الصح من رأيي يعني وفالاول وفالاخر دي حياتك وانتي براحتك بردو

Carrot_53193 🇪🇬 · Answer

واجهي مشاكلك واللي يزعلك ردي عليه ختى لو بكلمة اهم حاجة يكون فيه.رد فعل

Apple_55747 🇪🇬 · Answer

لاتقلقي ده طبيعي من اللي مريتي فيه انتي انسانه عاقله جداً والتشتت ده بينتهي لما نقرب من ربنا كل شي بيترتب

Coconut_56027 🇪🇬 · Answer

أنا الحمد لله ملتزمه بالصلوات الخمس وعلي قد مقدر بحاول اواظب علي السنن وبحفظ القرآن الكريم وبدرس علوم شرعية لكن مش عارفه ارجع لطبيعتي الحاجة الوحيده الي بتقومني إني أصلي أو اروح دار التحفيظ وارجع تاني زي ما كنت

Coconut_56027 🇪🇬 · Answer

أوقات بتكون حاجات بسيطة زي المواقف الي ذكرتها موضوع مش مستاهل

Coconut_56027 🇪🇬 · Answer

ماهي دي المشكله انا مبعرفش اعيش حزني

Coconut_56027 🇪🇬 · Answer

بحاول والله وبعافر لكن معنديش طاقه عندي حاله من التبلد في كل شئ حتي المهام اليومية البسيطة جدآ

Apple_55747 🇪🇬 · Answer

لاتضغطي على نفسك وحده وحده كل شي هايتحل بأذن الله ولكن لا تفكري بالسلب كتير ولا تجلدي ذاتك 
بالتدريب تفكير إجابي بالتدريب شوي شوي واستعيني بالله يعلم مابداخلك كله ، اشعر فيكي