جماعة محتاجة أعرف تفسير للي حساه .. أنا عيلتي مفيش بينا أي مشاعر نهائي ،هما كويسين الحمدلله بس مش قريبين لبعض ،مفيش بقا أحضان أو اننا نلمس حتى بعض لمسة إيد ،ولا بنتصور ولا بينا جو العيلة اللي بتحس بدفى بقا مع بعض وبتاع ...وان حصل وحد لمس التاني مثلاً في مناسبة وحد فينا اتصور مع التاني ،بحس بشعور كدة الإحراج واني لا مش متعودة ، ومش عاوزة حد يشوفنا بنتصور ،حتى أختي لما كبرنا شوية بقيت تبقى عاوزة تتصور معايا ونقرب من بعض ببقى متضايقة ومش حابة وبجاريها كدة عشان مزعلهاش بس مببقاش مبسوطة خالص ببقى عاوزاها تبعد عني (مش كُره فيها بس متعودتش). أخويا بقا لما كبر واعتمد على نفسه واتغرب بقا قريب مني جداً وبنتكلم سوا في كل حاجة وكله عارف اننا قريبين من بعض ،جات خطوبته وكان مصمم نتصور ومهتم بيا أنا وأختي (كنت مستغربة أوي ). وعاوز يتصور معانا ويحضنّا ،من وقتها وهو اتغير بالشكل ده وبقى قريب مننا اوي وعاوز يعمل لينا كل حاجة تبسطنا ،وده شيء أكيد باسطني ،بس ما زال الاهتمام ده مش مريح من ناحيتي . جه فرحه واتصورنا برضو سوا وبيهتم بينا وبعد الفرح سلم علينا وباس إيدي وكدة وانا بلغوش بأي كلام أهبل ،بس الأحساس مكنش مريح ولا بيبسطني ،سواء من اختي أو أخويا ،التلامس الجسدي ده مش بحبه خالص بيضايقني أوي ،وحتى أصحابي نادراً لما أحضنهم وأبقى مبسوطة ومستمتعه باللحظة ،هي صديقة ليا واحدة اللي بحب يبقى بينا تلامس عادي تحضني وتسلم عليا ،لانها بطبعها حنينة أوي فتلقائي ببقى معاها حنينة وبعبّر كمان عن مشاعري قدامها عادي ...المهم بقا أعمل ايه في المشكلة دي ،مش بعرف أستمتع بأي لحظة حلوة تربطني انا وعيلتي مع بعض ...

6

4