الفترة دي أنا بمر بمشاكل كتير. أول مشكلة إنّي اشتغلت شغل ماكانش شبهي، واضطريت أكمل فيه عشان العقد وأنا لسه طالبة وماكنتش فاهمة أي حاجة. اللي كان مخليني مستحملة إني مش لوحدي، كان معايا كذا حد من صحابي. لكن جو الشغل كان كله أحزاب وحوارات، وكان فيه بنت عاملة نفسها المديرة علينا وهي مش مديرة. المشكلة إن صحابي اتقربوا منها وصاحبُوها، وأنا الوحيدة اللي حسيت إنها مش شبهي خالص. حصلت خناقة كبيرة بيني وبينها، ومن وقتها وأنا بتجاهلها. الغريب إن صحابي رغم إنهم اتخانقوا معاها برضه بيتعاملوا معاها عادي، وده مضايقني جدًا. دلوقتي مشكلتي النفسية إني حاسة نفسي مهزوزة قدامهم، مع إني عارفة ومتأكدة إن أنا اللي معايا الحق، وهم الغلطانين. بس جوايا حاسة إني أنا الغلط ومفروض أسمع الكلام. مش بعرف أناقشهم أو أقولهم (لأ)، بعكس صحابي اللي بيواجهوا ويتكلموا. وده مخليني حاسة إني مش مرنة ومش عارفة المفروض أتصرف إزاي في المواقف دي."

1

8